Read eggon 1 MoaOkorinti 5 Bible Online

1 MoaOkorinti 5 - eggon bible

1 MoaOkorinti 5

¹Ame e gno moare a la a lu ma orieshra o wo agʼbaha bimi o gre eshri. Alo o gba o bre o gre eka moaevbu a mbo a la a kpo. Ame e gno ma arekyeŋ eshki bimi a la a kpo ayakplo ba eshre ta la ashe ba adaŋ.

²Ekayaŋ agimi e ngla egʼba? Ambo o raŋ o gre bimi e da ohe lo o kpo gimi ewu eso bimi. Nga are la a kpo edgu ekplo he lo, moa a se ŋa a sku eshki shoshoŋ!

³Ame e yi ba ame e wo ogyugyuŋ ka la gimi la egʼba, ambo aga me pyeŋ a wo a mi ka la gimi. Eshko ba Eyesu Ekristi nga, ame e sheŋ e sõ are la a kpo edgu ohe lo ombgu bgu. Ame e kpo ohe lo eka ba ame e wo a mi ka la gimi.

⁴Omba ba agimi e shki otsotse, aga me a mbo a wo ka la gimi otsotse, okro ekʼpo ba Adigi-odne Eyesu Ekristi la a wo ka la gi.

⁵O raŋ o gre bimi e se are he lo eshki, okyku o da Eshitaŋ e kpo ŋa ewu egʼba, okyku o da mo a shla eso baŋ olum Onda ba Adigi-odne.

⁶O wo odzi ba agimi e nyom egʼba mbo! Agimi e sheŋ e yi enzho la e lu mi le, Ela eyist etsitsi sha e la e nyom anyuŋ agbrotsa.

⁷O raŋ o gre bimi e se atsoŋ eyist ba odlobi okyku o da gimi e dzu la erum mbo ku-ku. Omba he lo agimi é dzu agbrotsa alehe ba eyist e wo ma mbo. Adlidzi ame e yi bimi e wo eka he lo. E ka, moa a nyuŋ abgo ba Apaska bi a kpo a khwo bgu, okyku eshi Ekristi la a wo anwye ekylu ba Apaska, moa a sheŋ a shri ŋa a ndba bgu.

⁸Okyku eka he, agimi e da gi e ri Apaska la agbrotsa la a wo la Eyist egbyi ma mbo. Eyist he lo angyiŋ e wo odlobi ta la ayakplo ba eshre. Ambo agimi e da gi e ri abgo la agbrotsa la a wo eyist ma mbo, alo angyiŋ a wo agbrotsa la a wo la erum mbo nga a wo la adlidzi ma.

⁹Akpa ba ame e ta gimi e sheŋ e gre, ame e shĩ gimi ma agimi e kŋe eshri bimi e bga pa la moarehwi la a kpo ayakplo ba eshre mbo.

¹⁰Ambo ame e nyuŋ moaevbu la a la a kpo ayakplo ba eshre, nga a la a gro ayi anzho, nga a la a pre odaŋ, nga a la a hlu okpko eshko angyiŋ mbo. O wo bimi e klo e ngʼba e sku mo tli angyiŋ le, alo ó dzu omgbybi bimi é zgi é sku obiŋ hi!

¹¹Ambo ame e klo bimi e ngʼba e sku anáŋ la a la a kpo ayakplo ba eshre nga a gro ayi anzho, nga a hlu okpko eshko, nga a la a klo odlo, nga a wa ajige a la a dro, nga a la a pre odaŋ. Agimi e ka e dzu obiŋ e ri algo ta la edgu are he lo mbo.

¹²Ambo alo o wo otum me angyiŋ mbo ba ame e sõ moare la a wo eshki bi mbo ombgu. Ahogbrẽ angyiŋ á ba a sõ mo ombgu. O wo odzi bimi e sõ moarehwi ba eshki bimi ombgu mbo? Akpa ba Ahogbrẽ a lu mi le, E se are la a la a kpo ayakplobi e sku eshki bimi.