Read eggon 1 MoaOkorinti 6 Bible Online

1 MoaOkorinti 6 - eggon bible

1 MoaOkorinti 6

¹O wo ba anáŋ a wo la ombgu ta la anáŋ le, okyku eshi aŋa a la a shri anáŋ lo a yi akuombgu moaevbu? O raŋ o gre baŋ a da moa la a lu Ahogbrẽ ma a nyuŋ lo a kpo mbo?

²Agimi e yi ba moa la a lu Ahogbrẽ ma angyiŋ á ba a sõ obiŋ hi ombgu ondakyeŋ mbo? O wo ba alo o kpo o gbu bimi e sõ obiŋ hi ombgu, agi e ka e kpo e gbu bimi e nyuŋ anwye ayakplo eka he e kpo e gbu mbo?

³Agimi e yi ba agi é ba e sõ moanwyeadga ba Ahogbrẽ a mbo ombgu mbo? O wo eka he angyiŋ le, ayakplo ba obiŋ hi a wo akplokyeŋ mbo!

⁴O wo ba edgu ayakplo he a zgi le, agi e shri lo e kom moarehwi la a yi ekplokyeŋ eshri odzudzu ba Eklisiya mbo a nyuŋ lo a kpo?

⁵O wo ekplo anzi angyiŋ ka la gimi! Moa á gbaŋ arekyeŋ eshki bimi la a kpo a gbu baŋ a nyuŋ odlo a kpo agʼbaha moare omba moa a tpi emo eso ayi?

⁶Ambo agimi e la e shri egimi e yi akuombgu e sku nga e la e da moaevbu a sõ gimi ombgu!

⁷Eka bimi e la e kpo embgu ta la egimi hi o tsa ba agimi pyeŋ e sheŋ e nye. O raŋ o gre ba moa a kpo ogʼga ka la gimi, o sku ba agimi e kpo embgu ta la egimi mbo?

⁸Ambo agimi e la e ta egba e la e ndzu egimi, nga e la e kpo ogʼga ta la egimi, pa la moanigimi a mbo!

⁹Adlidzi angyiŋ, agimi e yi zhe-zheŋ ba moarehwi ba odlobi á ba a yi Oreŋ ba Ahogbrẽ mbo mbo? Agimi e bile egimi mbo, okyku eshi moarehwi la a la a kpo ayakplo ba eshre, nga a la a kpo ololo, nga a la a ri eshra, nga a klo moarealom,

¹⁰nga a la a kpo ogʼga, nga a gro ayi anzho, nga a wa ajige a la a dro, nga a la a klo odlo nga a la a pre odaŋ, akyeŋ a mbo eshki moahi lo á hwiŋ Oreŋ ba Ahogbrẽ mbo.

¹¹Moakyeŋ eshki bimi, moa a wo eka he lo ayga. Ambo moa a sheŋ a ndza odlobi bimi bgu. Moa a sheŋ a shri gimi a da Ahogbrẽ. Opyapyaŋ o gre o ba agʼbaha bimi okro ba eshko ba Adigi-odne Eyesu Ekristi, ta la Ogbgaodzi ba Ahogbrẽ bi.

¹²O dzu mbo arekyeŋ a zgi anyu a lu mi le, Moa a bmi okyku o da me e kpo ekployaŋ a mbo. Ambo o ka, ekployaŋ a mbo angyiŋ e raŋ boŋ o kpo mbo. Ame nga e kpo e gbu ba ame e lu ma moa a bmi ba ame e kpo ekployaŋ a mbo. Ambo ame é da akplokyeŋ a da me e dzu awaghrẽ baŋ mbo.

¹³O dzu mbo arekyeŋ a zgi anyu a lu mi le, Algo a wo okyku akpyki angyiŋ, nga akpyki a wo okyku algo angyiŋ. Alo o wo eka he, ambo Ahogbrẽ á da ayakplo aha he lo pyeŋ a bre á yi. Egʼba ba arehwĩ e wo okyku o daŋ a la a kpo ayakplo ba eshre ta la alo angyiŋ mbo. E wo okyku Ahogbrẽ Adigi-odne angyiŋ. Adigi-odne nga a wo okyku o kpo otum ta la egʼba lo.

¹⁴Aho-gbrẽ a kso Adigi-odne okro eku baŋ a kpu, ekakahelo angyiŋ aŋa á ba a kso gi la ekʼpo baŋ.

¹⁵Agimi e yi ba egʼba bimi e wo ogʼba ba egʼba ba Ekristi angyiŋ. Okyku eka he o wo odzi ba ame e sko egʼba la e wo ogʼba ba egʼba ba Ekristi, e shri e yi e kŋe e bga ta la egʼba ba ashe ba eshre? O wo adzi mbo!

¹⁶Agimi e yi ba are la a shri egʼba baŋ a kŋe a bga ta la ashe ba eshre, ba egʼba mo e zhiŋ e dzu okyekyeŋ mbo? Akpa ba Ahogbrẽ a lu ohe lo a ka a sheŋ a ta mbo ku-ku. A lu mi le, Moa aha lo á zhiŋ á dzu egʼba ekyekyeŋ.

¹⁷Nga are la a kŋe eshri baŋ a bga ta la Adigi-odne le, a zhiŋ a dzu okyekyeŋ ka la ŋa a mo.

¹⁸Agimi e kyu ayakplo ba eshre abgo. Odlobi ohwõ pyeŋ ba are a la a kpo, o la o tpi egʼba baŋ ayi mbo, ambo orieshra o la o tpi egʼba baŋ ayi.

¹⁹Agimi e yi ba egʼba bimi e wo okro ba Ogbgaodzi ba Ahogbrẽ a shri a da gimi o la o dzu ma eshyẽ mbo? Agimi e wo okyku egigimi angyiŋ mbo, ambo okyku Ahogbrẽ.

²⁰Aŋa a gbmo gimi la ekplo la e wo la egbmo nzenze, okyku eka he agimi e shri egʼba bimi e kpo otum okyku o hlu Ahogbrẽ eshko.