Read eggon 1 MoaOkorinti 9 Bible Online

1 MoaOkorinti 9 - eggon bible

1 MoaOkorinti 9

¹Ame e wo are la a hwile egʼba mbo? Ame e wo are la a nyum oshpa angyiŋ mbo? Ame e ka Eyesu Adigi-odne mbo? Agimi e zhiŋ okyku otum ba ame e kpo okyku Adigi-odne mbo?

²O wo ba moahwõ a yga me eka are la a nyum oshpa mbo a mbo, ame e yi zhezheŋ ba agimi é ba e yga me! Agimi nga okyku odzudzu bimi ozhẽ ba Adigi-odne e wo egŋe angyiŋ ba ame e wo are la a nyum oshpa.

³Omba ba moare a la a klo odlo pa la me le, ame e la e shki eshri me eka he lo. Ame e lu mi le,

⁴Ame e wo la ozhẽ ma ba ame e zhĩ okyku algori ta la ami, okyku otum ba ame e la e kpo mbo?

⁵Ame e wo la ozhẽ ma ba ame e kpo eka ba moahwõ la a nyum oshpa a kpo mbo? Nga ame e wo la ozhẽ ma ba ame e sko ashe la a bmi ba adlidzi ta la eme odzi he lo eka ba moanáŋ ba Adigi-odne, ta la Ebitru, moa a kpo mbo?

⁶Abarnaba pa la me sha angyiŋ, e wo moarehwi ba alo o raŋ o gre bi e kpo eshrishri egi?

⁷Ayi a gno oshpa ba anwyeakyuŋ la a vgi eŋa ababgo baŋ omba baŋ a wo otum ba akyuŋ? Ayi a gno oshpa ba areagbi la a jygu evyi agbi baŋ ambo a la a fa a taŋ mbo? Ayi a gno oshpa ba are la a kpaŋ a la a wa abmo ba endga baŋ mbo?

⁸O wo eheŋ-ekyeŋ ba ame e bre ayi e ta egŋe ayakplo ba areyaŋ a mbo a sheŋ a yi mbo, okyku eshi odaŋ a mbo o lu ekakahelo.

⁹Agi e tsi engla odaŋ ba Omusa, o lu mi le, Arekyeŋ a bʼbu andu anyu omba baŋ a jygu aglu-agbi mbo. E ka, Ahogbrẽ a lu odlo eshri moandu lo angyiŋ?

¹⁰Omba baŋ a tsi etku ohe lo, a nyuŋ gi angyiŋ mbo? Adlidzi, o wo eka he lo, okyku eshi moa a ta lo okyku gi! Okyku eka he nga are la a laŋ agbi, ta la are la a yla algo ba agbi lo, o raŋ o gre ba moa a mbo a kpo otum mo la okayiozhẽ ba moa á ba a hwiŋ egbre mo.

¹¹Agi e sheŋ e fu eyi ba eso agʼbaha bimi. O wo odzi ba agi e klo ohre okro bimi mbo?

¹²O wo ba moahwõ a klo ohre he lo okro bimi le, ohre bi o ka o gre o mo e mbo? Ambo agi e klo ohre okro bimi mbo. Ambo agi e zga egi ayi sha okyku o da ekplokyeŋ e tpi Oshpaodzadzi ba Ekristi ayi mbo.

¹³Agimi e yi mbo? Moarehwi la a kpo otum Anyuŋ-akulu a fa algo ba Anyuŋ-akulu lo angyiŋ a la a ri. Nga moare la a shri oshriondba a shri a ndba ambgu, moa a la a hwiŋ ma a la a ri.

¹⁴Nga ekakahelo, Adigi-odne a jygu odaŋ a lu ma moa la a su osu ba Oshpaodzadzi á hwiŋ algori mo o ma.

¹⁵Ambo ame e ka e kpo otum okyku ohre mbo, nga akpa ba ame e ta he, ame e ta lo okyku o hwiŋ ohre angyiŋ mbo. O raŋ o gre ba ame angyiŋ e kpu ori! Arekyeŋ a kpo a gbu baŋ a zhiŋ onyomegʼba me baŋ a da lo o dzu otum ba odlo ba ototno mbo!

¹⁶Ame e ka e nyom egʼba okyku ba ame e nyum oshpa mbo, okyku eshi alo o dzu me omgbybi ba ame e nyum oshpa lo. A ba eshri me o wo ba ame e nyum oshpa lo mbo le!

¹⁷O wo ba ame e kpo otum me la okoklo me angyiŋ le, alo o dzu omgbybi ba moa a hre me. Ambo o wo ba alo o dzu otum ba moa a shri a da me okyku o kpo-kpo angyiŋ le, o dzu omgbybi ba ame e kpo lo.

¹⁸Ame e la e hwiŋ ohrekyeŋ? Ohre me angyiŋ o wo ozhẽ ba ame e hwiŋ okyku o nyum Oshpaodzadzi lo ototno, nga ame e la e zhĩ okyku ohrekyeŋ mbo.

¹⁹Ame e la e hwile egʼba. Ame e wo awaghrẽ ba arekyeŋ mbo. Ambo ame e da eshri me e dzu awaghrẽ ba areyaŋ a mbo, okyku o da me e zhiŋ moare nzenze.

²⁰Omba ba ame e kpo otum pa la moaEyahuda le, ame e la e kpo ekplo-yaŋ a mbo eka moaEyahuda, okyku o da me e zhiŋ mo, nga ame e la e sko odaŋ ba Omusa e zga akplokyeŋ mbo. Ame e la e kpo eka ba ame e sko lo e zga akplokyeŋ omba ba ame e kpo otum pa la moa la a sko lo a zga akplokyeŋ okyku o da me e zhiŋ mo.

²¹Ekakahelo, omba ba ame e la e kpo ekplo-yaŋ a mbo eka ba are la a wo a ba Eyahuda mbo, ba ame e ngʼba e sku odaŋ ba moaEyahuda, okyku o da me e zhiŋ moa la a wo moaEyahuda mbo. Ohe lo o tsa eka ba ame e la e pre odaŋ ba Ahogbrẽ angyiŋ mbo. Ame tli eka he e wo abgo ba odaŋ ba Ekristi angyiŋ.

²²Omba ba ame e wo pa la moa la obmi ba adlidzi mo o wo lgelge ame e la e dzu la obmi ba adlidzi la o wo lgelge eka mo, okyku o da me e zhiŋ mo. Okyku eka he ame e dzu ekployaŋ a mbo okyku areyaŋ a mbo, okyku o da me e shla moakyeŋ o wo ba alo o kpo o gbu.

²³Ame e la e kpo ohe lo pyeŋ okyku Oshpaodzadzi lo angyiŋ, okyku o da me a mbo e hwiŋ owlama ba alo.

²⁴Agimi e yi eka ba moa a la a kpo omba ba moa a knye oŋe. Moare pyeŋ angyiŋ a la a knye, ambo arekyekyeŋ sha a la a ri. Okyku eka he agimi e knye oŋe e wlu ayi okyku o da gimi e ri.

²⁵Areyaŋ a mbo la a la a nye o kpo ekpyle le, a la a nye o ta eso akpyli. Aŋa a la a kpo ohe lo okyku ela egbre la e wo la owlama okyku omba ple sha. Ambo agi e la e kpo ekpyle bi okyku egbre ba gbagbu-amo.

²⁶Okyku eka he ame e la e zga ayi e knye okyku o yi o gbu engla ba o tspi ma. Okyku eka he ame e wo eka ba are la a ta akum. Edgu are he lo a la a she abgo mhẽ.

²⁷Ame e da egʼba me e sheŋ e zhĩ ta la akum lo, nga e da lo e bga ta la lo, okyku o da mo a tla me ambla ba ame e bzi moahwõ a ba okyku o da mo ambo a kpo ekpyle lo.