Read eggon 2 MoaOkorinti 12 Bible Online

2 MoaOkorinti 12 - eggon bible

2 MoaOkorinti 12

¹O dzu omgbybi ba ame e nyom egʼba ambo ame e yi ba alo o wo owlamakyeŋ mbo. Ambo ame é lu odlo eshri okoka, ta la otsotsa angyiŋ ohuhuhi. Adigi-odne angyiŋ a shri lo a da me.

²Ame e yi arekyeŋ ba Ekristi, ba moa a sko ŋa a gre Ongyeŋ okpyemgbyeŋ. Ohi lo o kpo eyi ekʼpoenyi la e bre e gre. Ame e yi ba alo o kpo eka he adlidzi mbo, o dzu mbo aŋa a ka okoka angyiŋ, ambo Ahogbrẽ sha angyiŋ a yi.

³Ame e shĩ lo é ta ma, ame e yi ba moa a sko ŋa a gre Aparades, ambo ame e yi ba alo o kpo eka he adlidzi mbo. Alo o wo okoka angyiŋ a mu, Ahogbrẽ sha angyiŋ a yi lo.

⁴Okro he lo aŋa a gno odlo ba moa a lu la amgboŋ odlo a gbu mbo.

⁵Okyku eka he ame é nyom egʼba okyku alom he lo ambo ame é nyom egʼba okyku eshri eme mbo. Ambo ame é nyom egʼba okyku ayakplo la a tsa ba ame e sheŋ e nye dne.

⁶O wo ba ame e klo e nyom egʼba le, ame e wo adro angyiŋ mbo, okyku eshi ame e la e lu adlidzi angyiŋ. Ambo ame é nyom egʼba mbo, okyku eshi ame e klo ba arekyeŋ a tsom me a gre eka ekplo baŋ a ka ba ame e la e kpo, nga a sa a gno ba ame e la e lu mbo.

⁷Moa a da ezga ba egʼba e hwiŋ me, ahe lo e la e kpo otum eka anwyeadga ba Eshitaŋ. Moa a da lo e hwiŋ me okyku o da me e nyom onyomegʼba okyku ayakplo ba egbregbre ba ame e ka lo mbo, nga okyku o yla me andzu nga o nyom me onyomegʼba.

⁸Ame e sheŋ e fa olu e vẽ Adigi-odne engyi etra eshri ohe lo okyku o daŋ a sko lo a sku me.

⁹A tno ma a lu mi le, Okpoghwo me o tse ŋo ma okyku eshi ekʼpo me e wo oshye e gre pyeŋ omba ba oshye boŋ o sheŋ o nye. Ame e wo la ovye ma e gre eshri okyku ba ame e nyom egʼba okyku osheŋonye me, okyku o da me e ka okpokpaŋ ba ekʼpo ba Ekristi eshri me.

¹⁰Ame e bmi ta la oshye-osheŋonye nzenze ta la odzi, ta la ewu, ta la okpoewu, ta la okpgo okyku Ekristi. Okyku eshi omba ba ame e sheŋ e nye angyiŋ, ame e wo oshye.

¹¹Ame e la e kpo ayakplo eka ba ame e wo adro, ambo agimi angyiŋ e da me e kpo lo. O raŋ ba agimi e tsa eka ba agimi e gno oraŋ pa la me. O wo ba ame e wo akplokyeŋ mbo a mbo, moarehwi bimi la a la a nyum oshpa he moa a ka a gre me mbo ku-ku.

¹²Ayakplo la a tsa ba ame e wo are la e nyum oshpa, ame e kpo lo oheheŋ angyiŋ egi ayi bimi. Alo o wo egŋe, ta la egbregbre ayakplo.

¹³Moa a kpo gimi eshi, ewu ba moa a kpo gimi a gre moaEklisiya ehwõ? Ekplo-kyekyeŋ ba ame e kpo, ame e kpo gimi ewu okyku okpoghwo mbo. Agimi e bmi le e kyu me abgo okyku ohe lo.

¹⁴Odgo otra angyiŋ o wo he lo ba ame e zga eso ba o ba o kpre gimi e ka. Ame é ka ayi egʼba bimi ku-ku mbo. Ame e klo gimi angyiŋ, ame e klo amgbaŋ bimi angyiŋ mbo. O raŋ ba moanwye angyiŋ a vgi moadimo mbo, ambo o raŋ o gre ba moadimo angyiŋ a vgi moanwye mo.

¹⁵Ame é gno oraŋ okyku o tpi ekployaŋ a mbo ba ame e wo la alo ma ayi ta la eso me a mbo, okyku o kpo o ghwo la gimi. Agimi e klo me hli okyku ba ame e klo gimi nzenze?

¹⁶Agimi a mbo é bmi ba ame e da eme e dzu ekplo ba ewu angyiŋ eshri bimi mbo. Ambo o dzu mbo arekyeŋ á lu mi ma ame e bile gimi nga e zhĩ ba amgbaŋ okro bimi la eda.

¹⁷Ekayaŋ? Ame e kpgo gimi ozhẽ ba moanwyeadga ba ame e hom mo otum okro bimi?

¹⁸Ame e vẽ Etitu okyku o daŋ a yi. Ame e hom anáŋ la a lu Ekristi ma otum ka la ŋa otsotse. Agimi e lu mi ma Etitu a kpgo gimi? Aŋa pa la me, agi e la e kpo otum la ayaŋ akyekyeŋ angyiŋ mbo? Nga odzudzu bi o wo ezhẽ okyekyeŋ angyiŋ mbo?

¹⁹O dzu mbo ba alo o wo he agimi e la e tne aga eka ba agi e klo o shki eshri bi o ta angyiŋ egi ayi bimi. O mbo! Agi e lu odlo lo eka ba Ekristi a klo bi e lu lo angyiŋ. Agi e lu lo egi ayi ba Ahogbrẽ, nga ekployaŋ a mbo ba agi e kpo agi e kpo lo okyku o kpo o ghwo la gimi angyiŋ.

²⁰Ame e fu eso eha, o dzu mbo, omba ba ame e gbu a mi le, ame é hwiŋ gimi la edgu odzudzukyeŋ ondundum, o dzu mbo agimi a mbo é hwiŋ me la edgu odzudzukyeŋ ondundum. Ame e ka eka ba ame é ba e hwiŋ oklaodlo ta la efpu, ta la esõ-ebi, ta la okloeshri, ta la odzi, ta la onjygu, ta la onyomegʼba, ta la oslaokro.

²¹Ame e ka eka ba Ahogbrẽ me á ba a pre me eshri obiŋ omba ba ame é ba okro bimi omba mi lo. Ame nga é wu okũ okyku moa la a kpo odlobi ayga, nga ba moa a ka a ghwo obiŋ okyku ayakplo ba eshre ba moa a kpo a wo mbo, alo angyiŋ a wo ayakplo ba orieshra ta la ayakplo ba ogroayi ayakplobi.