Read eggon 2 MoaOkorinti 3 Bible Online

2 MoaOkorinti 3 - eggon bible

2 MoaOkorinti 3

¹Odlo he lo o dzu eka ba agi e la e nyom egʼba angyiŋ? Agi e wo ozhẽ okyekyeŋ eka moahwõ, nga o dzu omgbybi ba agi e shri akpa ba otsom e shri e kom gimi, o mbo le ba agi e yga lo okro bimi?

²Agimi eshrishri egimi angyiŋ e wo akpa ba otsom ba agi e wo la alo ma. Moa a ta lo eso bi, okyku o da areyaŋ a mbo a yi lo nga a tsi lo.

³O wo zhezheŋ ba Eyesu ababgo baŋ angyiŋ a ta akpa he lo, nga aŋa angyiŋ a hom gi otum ta la lo. Moa a ta lo la etu angyiŋ ashye ézhim mbo, ambo moa a ta lo eso ba arehwĩ la Ogbgaodzi ba Ahogbrẽ la a wo la eso ma.

⁴Agi e lu edgu odlo hi okyku eshi agi e wo la obmi ba adlidzi ta la Ahogbrẽ okyku Ekristi angyiŋ.

⁵Ekplokyeŋ la e tse ma e wo ka la gi, ba agi e ka eka ba agi e kpo otum he lo e gbu mbo. Oshye ba agi e wo la alo ma o zgi okro ba Ahogbrẽ angyiŋ o ba.

⁶Aŋa a kpo gi nga a shri oshye a da gi okyku o da gi e kpaŋ ohwihwim olehe he lo. Alo o wo odaŋ moa a ta lo akpa angyiŋ mbo, ambo o wo Ogbgaodzi. Odaŋ moa a ta lo he lo o la o shri eku angyiŋ o shri o ba, ambo Ogbgaodzi o la o shri eso angyiŋ o shri o di.

⁷Odaŋ ba Omusa moa a ta lo ashye ézhim, nga moa a ka ayimom ba esesla ba Ahogbrẽ omba ba moa a shri lo a shri a di. Alo a shraŋ ayi, ekakahelo a mbo, ayimom eyayi ba Omusa, alo a dzu moare ayi a gre eshri, okyku eka he moarehwi ba Esrayila a kpo a gbu ba moa a ka ŋa tsuŋ mbo. O wo ba odaŋ ba otum ba alo o wo okyku o shri eku angyiŋ o ba la ekekʼpo eka he le,

⁸ekekʼpo ba otum ba Ogbgaodzi a mbo o gre eka he a mbo nzenze!

⁹Ombgu ba moa á sõ moare okro otum he lo o wo la ekekʼpo o gre eshri. Nga ombgu ba moa á sõ moare nga ba moa á ba a gro okro ba otum he lo o sa o wo la ekʼpo e gre pyeŋ!

¹⁰O dzu mbo agi e kpo e gbu ba agi e lu mi ma ekekʼpo ba ayga e khwo, okyku ba agi e wo la anyuŋ ekʼpokyeŋ ohuhuhi.

¹¹O wo ba ekekʼpo e wo ekplokyeŋ la e ta abyi nzenze mbo le, moa a hwiŋ ekekʼpo la e wo nzenze e gre eshri angyiŋ ekplo la é ba e dzu gbagbu-amo!

¹²Okyku okayiozhẽ ba agi e wo la alo ma he lo, o da gi e shye eso e gre eshri.

¹³Agi e wo eka ba Omusa angyiŋ mbo. Aŋa a shri ashye oknye a kha eyayi baŋ okyku o da moarehwi ba Esrayila a ka ayimom lo eka ba alo a shraŋ nga a blu, mbo.

¹⁴Ambo moa a shye eso a gre eshri. Nga ma-me o ta anye he, moa a la a kha eyayi la ashye oknye omba ba moa a la a tsi odaŋ ogbyi lo. Moa a ngla ashye oknye he lo omba ba are a kŋe eshri baŋ a bga ta la Ekristi sha angyiŋ.

¹⁵Nga ma-me o ta anye he, ombayaŋ a mbo ba moa a tsi engla odaŋ Omusa ashye oknye lo a yi a kha eso mo.

¹⁶Ambo odlo Ahogbrẽ o lu mi ma moa a sheŋ a ngla lo. O lu mi le, Moa a ngla ashye oknye ba Omusa omba baŋ a zhiŋ a gre egi ayi ba Adigi-odne.

¹⁷O ka, ogbu he lo Adigi-odne a wo Ogbgaodzi angyiŋ, nga okro ba Ogbgaodzi o wo ma odzudum a mbo o wo ma.

¹⁸Okyku eka he nga, agi pyeŋ e la e tsa ayimom ba esesla ba Ahogbrẽ la eyayi moa a kha lo la emakyeŋ mbo. Nga ayimom ba esesla mi lo e zgi okro ba Adigi-odne la a wo Ogbgaodzi. Aŋa angyiŋ a la a zhiŋ gi a da gi e la e sko emle baŋ. Aŋa a la a da gi e ta ma ombamba pyeŋ la ayimom ba esesla he lo.