Read eggon 2 MoaOkorinti 5 Bible Online

2 MoaOkorinti 5 - eggon bible

2 MoaOkorinti 5

¹Agi e yi ba ambla ba abro egʼba ba agi e dzu ma ohuhuhi obiŋ hi a kypi le, Ahogbrẽ á kpo gi odne Ongyeŋ okyku o da gi e dzu ma. Aŋa á kpo odne he lo ababgo baŋ angyiŋ. Alo ó dzu ma gbagbu-amo.

²Nga ohuhuhi, agi e la e ta ayaŋ e gre eshri, okyku odne bi la o wo ongyeŋ ba moa á shri lo á ghwo gi.

³Ambla ba moa a ghwo gi alo egʼba le, agi é gbaŋ egʼba mbo ku-ku.

⁴Omba ba gi e wo la edgu abro ba obiŋ hi agi e la e ta agyim la avuolo ba ewu. Alo a dzu eka bi e klo e ngʼba e sku egʼba bi ba obiŋ hi angyiŋ mbo, ambo agi e klo ba moa a shri edgu egʼba ba Ongyeŋ angyiŋ a shri a da gi, okyku o da ekplo la e wo e ba eso e mbgi ekplo la e wo e ba egʼba la é ba e kpu.

⁵Ahogbrẽ eshrishri eŋa a kpo gi okyku onyinyiŋ hi lo. A shri Ogbgaodzi baŋ a shri a da gi okyku o da lo o dzu ohwihwim baŋ ka la gi, okyku ekployaŋ a mbo baŋ a wo la alo ma okyku gi.

⁶Okyku eka he, agi e wo oghwo-esõ ombamba pyeŋ. Agi e yi o wo ba agi e dzu odne ba egʼba he le, agi e wo ogyugyuŋ ta la odne ba Adigi-odne.

⁷Agi e dzu ma ozhẽ ba obmi ba adlidzi angyiŋ, ambo ozhẽ ba oka-ka angyiŋ mbo.

⁸Agi e e wo la oghwo-esõ e gre eshri. Nga o raŋ gi eso o gre eshri ba agi e dzu odne egʼba he e zga nga ba agi e yi e dzu odne ba Adigi-odne ka la ŋa.

⁹Ekplo la e gre pyeŋ, agi e klo e raŋ ŋa eso angyiŋ odne bi ahe ta la odne bi a mi.

¹⁰Okyku eshi, o dzu omgbybi ba agi pyeŋ é tspi egi ayi ba emgbakyiŋ ombgu ba Ekristi, okyku o da areyaŋ a mbo a hwiŋ egbre baŋ eka ekplo baŋ a kpo, odzi o mbo le obi, omba baŋ a wo ma obiŋ hi.

¹¹Agi e yi ekplo la e raŋ e gre ba moa a kpo eyli ba Adigi-odne, okyku eka he agi e la e zga ayi pa la moarehwi. Ahogbrẽ a yi gi zhezheŋ, nga ame e wo la okayiozhẽ ma ba agimi e yi me zhezheŋ eso bimi a mbo.

¹²Agi e la e zga ngre okyku o da gimi e bmi ka la gi angyiŋ mbo. Ambo agi e la e zga ngre okyku o shri esĩ ba odlo angyiŋ okyku o da gimi e kpo ovye okyku gi. Nga okyku o da gimi e kpo e gbu nga e yi eka bimi é ba e tno moa la a la a nyom egʼba ta la ozba arehwĩ o sku ba moa a nyom egʼba ta la eda baŋ.

¹³Agi e wo moadro? O wo ba agi e wo moadro a mbo agi e wo okyku Ahogbrẽ angyiŋ, nga o wo ba agi e wo moa la a yi eda a mbo agi e wo okyku Ahogbrẽ angyiŋ.

¹⁴Okyku eshi oklo ba Ekristi okyku gi angyiŋ o la o ri ekʼpo ka la gi, okyku eshi ohuhuhi agi e ka e bmye ba arekyakyeŋ á ba a kpu okyku moarehwi pyeŋ. O dzu eka moare pyeŋ a pu eku baŋ a kpu he lo.

¹⁵A kpu okyku moarehwi pyeŋ okyku o da moa la a yi a wo la eso ma a dzu emomo nga mbo, ambo okyku o da mo a dzu okyku ŋa sha, okyku eshi aŋa a kpu nga moa a kso ŋa eku okyku mo.

¹⁶Okyku eka he, o wo ozhẽ ba agi e sõ are ombgu okro okpo-kpo ba arehwĩ mbo. O wo ba agi e sõ Ekristi ombgu ayga ozhẽ okpo-kpo ba arehwĩ a mbo, agi e la e kpo eka he ohuhuhi nga mbo.

¹⁷Omba ba moa a kŋe are a bga ta la Ekristi, a zhiŋ a dzu are alahe angyiŋ. A kyu ayakplo agbyi abgo nga a vu ayakplo ahe.

¹⁸Ayakplo he lo pyeŋ, Ahogbrẽ angyiŋ a kpo lo. Okro Ekristi aŋa a zhiŋ gi la e wo moafpu ŋa a da gi e dzu moakyeŋazba. Nga a da gi otum bi e zhiŋ moahwõ e da mo a dzu moakyeŋazba a mbo ko-ko.

¹⁹Oshpa ba agi e la e nyum o la o tsa eka ba Ahogbrẽ a la a ri ekpom ta la areyaŋ a mbo okro Ekristi. Ahogbrẽ a ka a ta akplokyeŋ eshri odlobi mo a zga ma mbo. Ambo a lu oshpa a da gi eka baŋ a zhiŋ mo a da mo a dzu moakyeŋazba.

²⁰Ohuhuhi agi e la e lu odlo okyku Ekristi. O wo eka ba Ahogbrẽ ababgo baŋ angyiŋ a la a vẽ gimi ozhẽ bi. Okyku Ekristi agi e vẽ gimi okyku o da Ahogbrẽ a zhiŋ gimi la e wo moafpu ŋa a da gimi e dzu moakyeŋazba!

²¹Ekristi a wo la odlobi mbo ku-ku, ambo Ahogbrẽ a daŋ a sko olbi ba edlobi bi ka la gi otsotse, okyku o da gi okro okŋeobga ka la ŋa e hwiŋ odlodzi ba Ahogbrẽ.