Read eggon 2 MoaOkorinti 7 Bible Online

2 MoaOkorinti 7 - eggon bible

2 MoaOkorinti 7

¹Agimi akyemeazba, moa a hwim ayakplo he lo pyeŋ okyku gi angyiŋ! Okyku eka he, e da gi e tspi kyekye, nga e ngʼba e sku ekployaŋ a mbo la e ta egʼba o mbo le eso bi eshre. Agi e zga gble okyku o da gi e dzu zhezheŋ la esesla ibu eyli ba Ahogbrẽ.

²Agi e vẽ gimi okyku o da gimi e hwile eso bimi okyku gi. Agi e ka e ta akpu egi ayi ba arekyeŋ mbo ku-ku. Agi e ka e tpi arekyeŋ ayi mbo ku-ku. Agi e ka e bile arekyeŋ mbo ku-ku.

³Ame e lu odlo he okyku o sõ gimi ombgu angyiŋ mbo. Eka ba ame e sheŋ e lu ka la gimi, agi e klo gimi nzenze. Nga o wo bi e wo ma la eso o mbo le e kpu a mbo, alo o dzu eka bi e wo otsotse angyiŋ ombamba pyeŋ.

⁴Ame e bmi ka la gimi e gre eshri, okyku eka he ame e gno oraŋ ka la gimi. Eka ba ame e kpo ewu nzenze a mbo, ame e wo la okayiozhẽ, nga ame e bli la ovye e gre eshri.

⁵Ambo ambla ba agi e gbu Amasidoniya, agi e wo la esõ-egbubiŋ ma mbo ku-ku. Oklodlo o wo okroyaŋ a mbo. Moa a la a kʼpi ohwa pa la moahwõ, okyku eka he eyli e wo gi eso.

⁶Ambo Ahogbrẽ la a la a gbu moare ba eso e tpi mo ayi obiŋ, aŋa angyiŋ a gbu gi eso obiŋ omba ba Etitu a ba.

⁷Oba-ba baŋ he lo sha angyiŋ o gbu gi eso obiŋ mbo, ambo oshpa ayakplo baŋ a shri a ba eka bimi e gbu ŋa eso obiŋ, o gbu gi eso obiŋ a mbo ko-ko. Aŋa a lu a da gi eka bimi e klo e ka me e gre eshri. Nga a sa a lu eka ba agimi e gno oraŋ ku-ku mbo. Nga a lu odlo eka bimi e wo la eso ekyekyeŋ okyku o tspi osheshye okyku me. Ame e wo la ovye ma ohuhuhi e gre ba ayga a mo.

⁸O wo ba akpa ba ame e ta gimi mi a tpi gimi eso ayi le, ame é kpo eshi a mo? Ame e sheŋ lo e ta bgu. Ame e kpo e gbu e mbi ba ame e da odlo lo o vu me olo, omba ba ame e ka ba akpa lo a tpi gimi eso ayi okyku omba fi.

⁹Ambo ohuhuhi ame e wo la ovye ma. Ame e wo la ovye ma okyku ba ame e tpi gimi eso ayi angyiŋ mbo, ambo okyku ba esõ-etpiayi he lo e nyiŋ odzudzu bimi. Ahogbrẽ a kpo otum ta la esõ-etpiayi lo, okyku eka he, agi e shri otsigbukyeŋ angyiŋ e shri e kom gimi mbo.

¹⁰Esõ-etpiayi ba Ahogbrẽ a la a kpo otum ta la lo e la e shri oghwobiŋ angyiŋ o shri o ba, ambla he nga are á hwiŋ oshla. Ekplokyeŋ ba e wu okũ e wo ohe lo mbo! Ambo esõ-ebili ba obiŋ hi e la e shri eku angyiŋ e shri e ba.

¹¹Agimi e ka eka ba Ahogbrẽ a kpo otum ta la esõ-etpiayi bimi he lo. O shri ozgagble angyiŋ o shri o da gimi nzenze, nga alo o shri ekhwo o da gimi nzenze, okyku o tsa ba agimi e wo la ombgu eshri bimi mbo! Nga eso e vre gimi nga agimi e wo la eyli, ta la okayiozhẽ, ta la ozgayi, ta la okoklo ba eso ekyekyeŋ okyku o nye areyaŋ a mbo la a ta akpu eda! Agimi e tsa eshri bimi zhezheŋ ba agimi e wo la akpu odlo he lo ku-ku mbo.

¹²Okyku eka he, eka ba ame e ta gimi akpa he, ame e ta lo okyku akpu ba arekyeŋ a ta angyiŋ mbo. Ambo ame e ta akpa he lo okyku o tsa gimi zhezheŋ egi ayi ba Ahogbrẽ, eka bimi e wo la oklo ogyugyuŋ ba adlidzidzi okyku gi.

¹³Okyku eka he lo angyiŋ eso e gbu gi obiŋ. Agi e hwiŋ oghwo-esõ sha angyiŋ mbo, ambo Etitu a da gi e gno oraŋ e gre eshri okyku ognoraŋ baŋ a wo alo ma okyku eshi agimi e kpo e ghwo la ŋa nga e gbu ŋa eso obiŋ.

¹⁴Ame e tsom gimi egi ayi baŋ e gre eshri. Agimi nga e ta me anzi egi ayi baŋ mbo. Ombamba pyeŋ agi e la e lu adlidzi angyiŋ e da gimi. Nga ozhẽ he lo, otsom ba agi e tsom gimi egi ayi ba Etitu o gre va ototno mbo. O tsa ba alo o wo adlidzi angyiŋ.

¹⁵Okyku eka he nga, oklo baŋ okyku gimi o ta ma-ma angyiŋ ombayaŋ a mbo baŋ a tne aga eka bimi e wo la eso ma okyku ba agimi e bmi ta la odlo lo, nga e yga ŋa la eyli ta la egʼba ezhgara.

¹⁶Ame e kpo e gbu ba ame e sko oshye me e zga okro bimi ogbukyekyeŋ. Okyku eka he ame e wo la ovye ma nzenze!