Read eggon 2 MoaOkorinti 8 Bible Online

2 MoaOkorinti 8 - eggon bible

2 MoaOkorinti 8

¹Agimi anáŋ, agi e klo bimi e yi ekplo ba okpoghwo ba Ahogbrẽ a kpo Eklisiya pyeŋ, ogʼba obiŋ ba Amasidoniya.

²Ewu ba moa a kpo e nye mo nzenze. Ambo moa a wo la ovye ma nzenze a gre eshri, okyku eka he moa a shri okpoghwo nzenze a shri a di. Moa a wo la ekŋe a gre eshri ambo moa a kpo a ghwo la moaekŋe.

³Ame e lu adlidzi e da gimi, moa a shri ekployaŋ a mbo ba moa a kpo a gbu angyiŋ a shri a di. Nga ekplo la e wo edzi angyiŋ, la obibmi ba eso mo.

⁴Moa a vẽ gi nga moa a bre ayi okyku o shri okpoghwo o shri o di okyku moarehwi ba Ahogbrẽ la a wo obiŋ ba Eyahuda.

⁵Moa a kpo ekplo ba agi e ka e zga aga ba alo ku-ku mbo! Moa a zga esĩ a shri eshri mo a shri a da Adigi-odne, nga okyku oklo ba Ahogbrẽ moa a shri emo a da gi a mbo.

⁶Okyku eka he agi e la e shĩ Etitu la a zga esĩ otum he lo, okyku o daŋ a zga ayi ma, nga a kpo a ghwo la gimi, nga o da gimi e kpo otum ba oklo lo o khwo.

⁷Agimi e wo la angyiŋ e gre eshri okyku ekployaŋ a mbo ba agimi e wo la alo ma ozhẽ ba obmi ba adlidzi, ta la odlo ba anyu,, ta la oyioyi, ta la ozgayi ba okpoghwo, ta la oklo bimi okyku gi. Okyku eka he agi e klo bimi e dzu la okpoghwo angyiŋ ibu edgu otum ba oklo he lo.

⁸Ame e ka e jygu odaŋokyeŋ angyiŋ mbo, ambo ame e lu e da gimi eka ba moakyeŋ a kpo a ghwo la moahwõ la eso ekyekyeŋ, okyku o da me e ka adlidzi ba edgu oklo bimi angyiŋ.

⁹Okyku eshi agimi e yi okayiekŋe ba Adigi-odne Eyesu Ekristi. Aŋa a wo la angyiŋ ma nzenze, ambo a zhiŋ a dzu a ba ekŋe okyku gimi, okyku o da gimi e gbu angyiŋ okro ekŋe baŋ he lo.

¹⁰Aga me odlo he lo, o raŋ o gre bimi e kpo ekplo bimi e zga esĩ ayiesõ e khwo ohuhuhi. Agimi angyiŋ e wo moarehwi ba ori la e zga esĩ la aga he lo, nga e bmi okyku o kpo akplokyeŋ eshri lo.

¹¹E kso e kpo otum e yi! E kpo lo e zga ayi eka bimi e hwim lo, nga agimi e kpo lo la ekployaŋ a mbo ba agimi e wo la alo ma.

¹²O wo bimi e wo la ozgayi okyku o kpo o ghwo le, Ahogbrẽ á yga okpoghwo bimi la aga ekplo bimi e wo la alo ma. Aŋa á ka ayi ozhẽ okyku ekplo bimi e gbaŋ lo mbo.

¹³Ame e la e zga ngre okyku o sko ewu o sku moahwõ nga o shri lo o zga gimi eshri mbo. Ambo eka bimi e wo la anzho ma nzenze ohuhuhi he, o raŋ o gre ba agimi e kpo e ghwo la moaekŋe. Nga omba ba agimi a mbo e wo la ekŋe, nga ba moa a wo la alo ma nzenze le, moa á kpo á ghwo la gimi. Ozhẽ odzudzu eka he angyiŋ okpoghwo o wo ma.

¹⁵Odlo ba Ahogbrẽ o lu mi le, Are la a pla anzho a shki nzenze, Aŋa a wo la alo ma ple sha. Nga are la a pla anzho a shki ple sha, Aŋa a wo la alo ma nzenze.

¹⁶Agi e vye la Ahogbrẽ nzenze baŋ a da Etitu a wo la ozgayi okyku o kpo o ghwo la gimi, eka ba agi a mbo a wo la ekhwo ma!

¹⁷A yga ovẽ bi sha mbo, ambo aŋa la esosõ baŋ a wo la ekhwo okyku o yi o kpo o ghwo la gimi, okyku eka he a zga eso ba o yi okro bimi.

¹⁸Agi é da anáŋ-akyeŋ la a gbu eso obiŋ a ba ka la ŋa. Eklisiya mvye e bmi ta la anáŋ he lo eka baŋ a la a nyum Oshpaodzadzi.

¹⁹Nga moa a sla ŋa osla angyiŋ okro moaEmisiya okyku o daŋ a dzi ka la gi otum ba oklo ba o hlu eshko ba Adigi-odne, nga okyku o tsa ba agi e klo o kpo o ghwo angyiŋ.

²⁰Agi e la e kpo oheheŋ okyku o da gi e da ewukyeŋ e kso ozhẽ okpoghwo he lo mbo.

²¹Okũ ekployaŋ a mbo bi e kpo e wo okyku o da gi e kpo ekplo la e raŋ e gre egi ayi ba Adigi-odne sha mbo, ambo egi ayi ba moarehwi a mbo.

²²Okyku eka he agi e hom anigi otum e daŋ a ba pa la mo. Agi e sheŋ e mbga ŋa engyi oshushku e ka, nga agi e hwiŋ ŋa la ekhwo ba okpoghwo ombamba pyeŋ. Eka baŋ a bmi ka la gimi la eso ekyekyeŋ, a wo la ekhwo okyku o kpo o ghwo la gimi a ta ma-ma.

²³Eshri Etitu nga, aŋa a wo are la a la a kpo otum pa la me okyku o kpo o ghwo la gimi angyiŋ. Moanáŋ ahwõ la a dzi ka la ŋa nga, moa a gre okyku Eklisiya andandandim ba moa a wo ma, okyku o da Ekristi a hwiŋ ohlueshko.

²⁴Agi e klo ba agimi e tsa mo oklo bimi, okyku o da Eklisiya pyeŋ e ka e bmye nga e bmi ba adlidzi ta la otsom ba agi e tsom gimi la alo.