Read eggon MoaEgalasiya 2 Bible Online

MoaEgalasiya 2 - eggon bible

MoaEgalasiya 2

¹Ambla ba eyi okʼpoenyi ame e bla e gre Orushalima ta la Abarnaba. Ame e da Etitu a mbo a dzi pa la me.

²Ame e gre okyku Ahogbrẽ a tsa la ame e yi. Eshki ba agi e kpo pa la moandakʼpo ambambga, ame e wre edgu oshpa ba ame e la e nyum e ygi moa la a wo moaEyahuda mbo e da moandakʼpo lo. Okyku eshi ame e klo ba otum me ba ayga ta la otum me ba ohuhuhi, ba alo o tpi ayi ototno mbo.

³Akyemeazba la a ri Etitu a wo a ba Egrise angyiŋ, ambo moa a vu ŋa omgbybi okyku o daŋ a sheŋ ongyum mbo.

⁴Ambo moarekyeŋ la a ba la obile ma moa a wo moanáŋ angyiŋ, moa a gre a ba eshki lo. Moa a klo o sheŋ ŋa ongyum. Moare he lo a ba eka moare la a kpre okro a ka angyiŋ, moa a ba okyku o yi edgu odzudum ba agi e wo la alo ma okyku okŋeobga bi e wo la alo ma ta la Ekristi Eyesu. Moa a klo bi e dzu moawaghrẽ sha.

⁵Agi e ka e bmi pa la mo tsi mbo ku-ku, okyku o da gi e kpaŋ adlidzi ba Oshpaodzadzi okyku gimi.

⁶Ambo moabze la a sko emo a zga eka moandakʼpo, ame e lu ohi okyku eshi alo o dzu akplokyeŋ angyiŋ pa la me mbo, o wo ba moa a wo eshi a mbo. Okyku eshi Ahogbrẽ a la a sõ moare ombgu la okoka ba edzi angyiŋ mbo. Moandakʼpo he lo moa a ka a shri ebra ehekyeŋ a shri a da me mbo.

⁷Ambo moa a ka a bmye ba Ahogbrẽ angyiŋ a shri otum onyum oshpa a shri a da me okyku o da me e nyum oshpa e ygi moa la a wo moaEyahuda mbo, eka baŋ a shri otum ba onyum oshpa a shri a da Ebitru okyku o daŋ a nyum oshpa a ygi moaEyahuda.

⁸Okyku eshi, la ekʼpo ba Ahogbrẽ angyiŋ moa a sla me okyku o da me e nyum oshpa e ygi moa la a wo moaEyahuda mbo, eka moa a sla Ebitru okyku o daŋ a nyum oshpa a ygi moaEyahuda.

⁹Eyakubu ta la Ebitru, ta la Eyohana, moahi lo a wo eka moandakʼpo, moa a ka a bmye ba Ahogbrẽ angyiŋ a shri otum he lo a shri a da me. Okyku eka he nga moa a wa obgo ta la Abarnaba pa la me a mbo. Okyku bi e wo moa la a kpo otum otsotse, agi e bmi ba agi é ba e kpo otum pa la moa la a wo moaEyahuda mbo, nga ba moa á ra á kpo otum pa la moaEyahuda.

¹⁰Moa a zhĩ ekplokyekyeŋ sha, okyku o da gi e tne aga moaekŋe la a wo eshki mo. Alo angyiŋ o wo ekplo ba ame e la e zga ngre ta la alo.

¹¹Omba ba Ebitru a ba osku Antakiya ame e shraŋ ŋa eshki, okyku eshi aŋa a ta akpu zhezheŋ.

¹²Ambla ba moarekyeŋ ba Eyakubu a hom mo otum a ba a wo mbo, Ebitru a la a ri algo pa la moanáŋ la a wo moaEyahuda mbo. Ambo ambla ba moarehwi he lo a gbu nga Ebitru a se okũ a ba ambla ma aŋa á ri algo pa la mo nga mbo, okyku eshi aŋa a kpo eyli moare la a bmi ta la odaŋ la o wo okyku o sheŋ moa la a wo moaEyahuda mbo ongyum.

¹³Moanáŋ ahwõ ba Eyahuda moa a zga esĩ a kpo eka moa la a kpo eyli. Moa a kpo eka ba Ebitru a kpo. Nga Abarnaba a mbo a da eyli moa la a kpo he lo e vu ŋa.

¹⁴Omba ba ame e ka ba moa a dzi ozhẽ shasha ta la adlidzi ba Oshpaodzadzi mbo, ame e nyuŋ Ebitru egi ayi moare pyeŋ e lu mi le, Aŋo o wo a ba Eyahuda angyiŋ, ambo aŋo o la o dzu eka are la a wo a ba Eyahuda mbo. Aŋo o la o dzu eka a ba Eyahuda angyiŋ mbo. Okyku eshi aŋo o klo o vu moa la a wo moaEyahuda mbo omgbybi okyku o da mo a dzu eka moaEyahuda?

¹⁵Adlidzi angyiŋ agi e wo moaEyahuda okro ombrombre, ambo agi e wo moadlobi la a wo moaEyahuda mbo mbo.

¹⁶Ambo agi e yi ba opyapyaŋ o gre o ba agʼbaha ba Ahogbrẽ ta la arehwi ozhẽ obmi ba adlidzi ta la Eyesu Ekristi. O wo ozhẽ okpaŋodaŋ angyiŋ mbo. Agi a mbo e bmi ba adlidzi ta la Ekristi Eyesu okyku o da opyapyaŋ o gre agʼbaha bi ta la Ahogbrẽ ozhẽ obmi ba adlidzi ta la Ekristi sha, alo o wo ozhẽ ba okpaŋodaŋ angyiŋ mbo. Opyapyaŋ o gre o ba agʼbaha ba Ahogbrẽ ta la arekyeŋ ozhẽ okpaŋodaŋ angyiŋ mbo ku-ku.

¹⁷O wo ba agi e zga ngre okyku o da opyapyaŋ o ba agʼbaha bi ta la Ahogbrẽ ozhẽ ba okŋeobga ta la Ekristi le, alo o wo zhezheŋ ba agi a mbo e wo moarehwi ba odlobi eka moa la a wo moaEyahuda mbo a wo. O wo ba alo o wo eka he angyiŋ le, o dzu eka ba Ekristi a tspi okyku odlobi angyiŋ? O wo eka he tsi a mbo mbo!

¹⁸O wo ba ame e zga esĩ ba o mbdzi ekplo ba ame e sheŋ e kypi e ygi obiŋ, alo o tsa ba ame e pre odaŋ lo angyiŋ.

¹⁹Okro odaŋ ame e dzu okom a mo. Odaŋ he lo angyiŋ o bga me okyku o da me e dzu la eso ma okyku Ahogbrẽ. Moa a gŋe me egŋe aki ta la Ekristi otsotse.

²⁰Okyku eka he, ame e wo la eso ma ohuhuhi mbo, ambo Ekristi angyiŋ a wo eso me. Eso ba ame e wo la alo ma ohuhuhi, ame e wo la alo ma okyku obmi ba adlidzi ta la Anwye ba Ahogbrẽ la a klo me nga a shri eso baŋ a di okyku me.

²¹Ame e ka e tla okpoghwo ba Ahogbrẽ mbo. O wo ba arehwi a hwiŋ opyapyaŋ agʼbaha baŋ ta la Ahogbrẽ ozhẽ ba odaŋ angyiŋ le, o dzu eka ba eku ba Ekristi e dzu otum ba ototno angyiŋ.