Read eggon MoaEgalasiya 4 Bible Online

MoaEgalasiya 4 - eggon bible

MoaEgalasiya 4

¹Ambo ame é lu odlo é ta ma-ma. Anwye la á yga ogu ba adaŋ, moa a la a kpo ŋa eka awaghrẽ ototno. Ambo ekakehelo a mbo, ekployaŋ a mbo e wo e baŋ angyiŋ.

²Omba baŋ a yi a wo anwye, moare la a kpaŋ ŋa a wo ma. Moa a la a kpo ŋa ekployaŋ a mbo o tsa ba omba ba adaŋ a zga ŋa o bli.

³Ekakehelo omba ba Ogbgaodzi o bli gi a wo mbo, agi a mbo e dzu moawaghrẽ ba egbga ba obiŋ hi la e ri ekʼpo obiŋ hi lo angyiŋ.

⁴Ambo ambla ba omba lo o ba, Ahogbrẽ a da Anwye baŋ a ba. A ba eka ba anwye ba ashe ba obiŋ hi. A la a kpo otum ta la odaŋ moaEyahuda,

⁵okyku o daŋ a shri odzudum a da moa la a wo abgo ba odaŋ lo, nga okyku o da gi e dzu moanwye ba Ahogbrẽ.

⁶Okyku o tsa ba agi e wo moanwye baŋ, Ahogbrẽ a da Ogbgaodzi ba Anwye baŋ o ba o gre gi eso bi. Ogbgaodzi o la o lu angyangyeŋ o lu mi le, Ada, Adugu.

⁷Okyku eka he, agimi e wo moawaghrẽ nga mbo, ambo moanwye angyiŋ a mo. Eka ba agimi e wo moanwye baŋ he, Ahogbrẽ á shri ekployaŋ a mbo baŋ a wo la alo ma okyku moanwye baŋ á shri á da gimi.

⁸Ayga agimi e yi Ahogbrẽ mbo ku-ku. Okyku eka he agimi e dzu moawaghrẽ ba egbga la e wo moahogbrẽ angyiŋ mbo.

⁹Ambo ohuhuhi ba agimi e yi Ahogbrẽ, o mbo le ame é lu ma ba Ahogbrẽ a yi gimi, okyku eshi agimi e klo e bla e yi ozhẽ egbga la e wo la oshye ma mbo, ba ayiekŋe la a la a ri ekʼpo? Okyku eshi agimi e klo e bla e dzu moawaghrẽ mo nganga?

¹⁰Agimi e ka elum ebze ta la eha ebze, ta la omba obze, ta la eyi ebze la anyuanyuŋ!

¹¹Agimi e wo me ayiekŋe! O wo eka ba otum me pyeŋ okyku gimi o dzu otum ba ototno e mbo?

¹²Agimi anáŋ, ame e vẽ gimi okyku o da gimi e dzu eka me. E ka, ame e wo eka bimi angyiŋ. Agimi e ta akpu egi ayi me mbo.

¹³Agimi e yi ekplo la e da me e zga esĩ e nyum oshpa e ygi gimi ori. Alo o wo okyku ba ame e no olo angyiŋ.

¹⁴Oshye egʼba me o dzu ekplo ba ewu angyiŋ ka la gimi, ambo agimi e ka e dzĩ o mbo le e tla me mbo. Ambo ekayaŋ a mbo agimi e yga me eka bimi e yga anwyeadga ba Ahogbrẽ. Agimi e yga me eka bimi é yga Ekristi Eyesu!

¹⁵Agimi e vye e gre eshri! Eshi e kpo? Ame a mbo e kpo e gbu ba ame e lu odlo he lo eshri bimi, agimi e mbi e gʼbu ayi bimi o wo ba agimi e kpo e gbu nga e shri lo e da me!

¹⁶Ohuhuhi ame e zhiŋ e dzu afpu gimi okyku ba ame e lu adlidzi e da gimi?

¹⁷Moahwõ mi lo, moa a tsa gimi oklo a gre eshri. Ambo aga mo a wo adzi mbo ku-ku. Moa a klo o ngʼba gimi o sku me nga o khwo, okyku o da gimi e ka mo eka ba moa a la a ka gimi.

¹⁸Ohuhuhi, alo o wo odzi ba moa a wo la ozgayi ma okyku o kpo ekployaŋ a mbo la e wo adzi angyiŋ. O raŋ eka he lo ombayaŋ a mbo, alo o raŋ omba ba ame e wo ka la gimi sha mbo.

¹⁹Agimi anwye ba ame e klo gimi! Nganga, alo o wo eka ba ashe a la a kpo ewu omba ombrombre angyiŋ. Ewu ba ame e wo la alo ma okyku gimi, e wo eka he lo angyiŋ o wo le agimi e sko edgu odzudzu ba Ekristi.

²⁰Ame e wo la ekhwo okyku o da me e ba okro bimi ohuhuhi e gre eshri! Okyku o da me e nyiŋ aga me ka la gimi. Odlo bimi o vu me olo eso nzenze!

²¹Ame e zhĩ gimi la e klo o dzu moawaghrẽ ba odaŋ. Agimi e gno ekplo ba odaŋ lo o lu mbo?

²²Alo o lu mi ma Ebrahim a wo moanwye aha ma. Akyeŋ ashe la a wo awaghrẽ angyiŋ a mbre ŋa, ahwõ nga ashe ba odne angyiŋ a mbre ŋa.

²³Anwye baŋ ba awaghrẽ angyiŋ a mbre ŋa moa a mbre ŋa eka moahwõ ototno. Ambo anwye ba ashe ba odne a mbre moa a mbre ŋa ozhẽ ba ohwihwim ba Ahogbrẽ angyiŋ.

²⁴Moa a kpo a gbu ba moa a sko oshpa he lo eka egŋe. Moashe aha he lo moa a dzu ohwihwim oha. Okyeŋ o dzu Ahaga. Alo o zgi Akũ ba Esinayi. Moanwye baŋ a mbre a wo moawaghrẽ angyiŋ.

²⁵Ahaga a dzu eka ba Akũ ba Esinayi, obiŋ ba Arabiya, nga aŋa angyiŋ a dzu egŋe ba osku ba Orushalima ba ohuhuhi. Aŋa pa la moarehwi la a wo ma pyeŋ, moa a wo moawaghrẽ angyiŋ.

²⁶Ambo Orushalima la o wo Ongyeŋ alo o wo la odzudum ma nga alo angyiŋ o wo anigi.

²⁷Odlo ba Ahogbrẽ o lu mi le, Aŋo ashe la o hwiŋ moanwye o ka mbo, o dzu la eso ekyle! Aŋo o ta akhi la ovye okyku boŋ o yi ewu ba ashe la a mbre mbo! Okyku eshi ashe la a wo la arekyeŋ ma mbo, á hwiŋ moanwye á gre Ashe la a wo la alom ma.

²⁸Agimi anáŋ, e wo moanwye ba Ahogbrẽ angyiŋ ohuhuhi okyku ohwihwim baŋ, eka ba Eshaku a mbo a wo.

²⁹Omba mi lo nga, anwye la ba moa a mbre ŋa ozhẽ ba egʼba, a kpo anwye ba moa a mbre ŋa ozhẽ ba Ogbgaodzi ba Ahogbrẽ, ewu. O wo ekakahelo angyiŋ ohuhuhi.

³⁰Ambo odlo ba Ahogbrẽ o lu la eshi? Alo o lu mi le, Aŋo o kyu ashe la a wo awaghrẽ ta la anwye baŋ abgo. Okyku eshi anwye ashe la a wo awaghrẽ á pu ogu ba ada mbo ku-ku ta la anwye ba ashe ba odne.

³¹Okyku eka he agimi anáŋ, agi e wo moanwye ashe la a wo awaghrẽ angyiŋ mbo, ambo agi e wo moanwye ashe ba odne angyiŋ.