Read eggon MoaEgalasiya 5 Bible Online

MoaEgalasiya 5 - eggon bible

MoaEgalasiya 5

¹Agi e wo la odzudum ma. Ekristi a sheŋ a shri odzudum a da gi! Okyku eka he agimi e tspi eka moarehwi la a wo la odzudum ma, nga agimi e bmi e dzu moawaghrẽ nga mbo.

²E ngli e gno! Ame, Oblus angyiŋ, e lu odlo he ka la gimi. O wo ba agimi e bmi e da mo a sheŋ gimi ongyum le, o wo eka ba Ekristi a wo la owlama egi ayi bimi ku-ku mbo.

³Ame e klo o shĩ ekplo he lo. Ame e sa e lu, areyaŋ a mbo la a bmi a da mo a sheŋ ŋa ongyum, o dzu omgbybi baŋ a kpaŋ odaŋ lo mvye.

⁴Agimi are la e klo ba opyapyaŋ o dzu agʼbaha bimi ta la Ahogbrẽ ozhẽ ba okpaŋodaŋ, e ngʼba egimi e sku Ekristi angyiŋ. Agimi e wo abgo ba okpoghwo ba Ahogbrẽ mbo ku-ku.

⁵Okayiozhẽ bi o wo ba Ahogbrẽ á ba a shri opyapyaŋ á shri á zga agʼbaha baŋ ka la gi. Agi nga e la e dzu e bli ohe lo angyiŋ, la ekʼpo ba Ogbgaodzi ba Ahogbrẽ, alo e kpo otum ozhẽ obmi ba adlidzi bi.

⁶Okyku eshi, omba ba agi e wo okŋeobga ta la Ekristi Eyesu, osheŋongyum, ta la osheŋongyum mbo, alo o shri ondun-dumokyeŋ o shri o ba mbo ku-ku. Ekplo la e wo edzi, e wo obmi ba adlidzi la o la o kpo otum ozhẽ ba oklo sha angyiŋ.

⁷Agi e mbi e la e zga ayi adzadzi, ayi a sa a da gimi e tspi ta la okpo otum ta la adlidzi lo? Aŋa a kpo anyu a rba gimi a gbu?

⁸Ahogbrẽ la a bzi gimi angyiŋ a kpo ohe lo mbo.

⁹Moa a lu mi le, Eyist tsi sha e kpo e gbu ba alo e da agbrotsa a nyom.

¹⁰Ambo ame e yi e ra e bmi ba adlidzi ka la gimi. Okŋeobga bi ta la Adigi-odne o da me e bmi ba adlidzi ba agimi é ba e kso la agakyeŋ ondundum mbo. Nga are la a tpi gimi ayi he lo, o wo baŋ a wo ayi a mbo Ahogbrẽ á tsa ŋa ewu.

¹¹Agimi anáŋ, okyku eshi moa a la a kpo me ewu ma-me a ta ohuhuhi, o wo ba ame e nyum oshpa ma osheŋongyum o wo ozhẽ angyiŋ? Moa a wo la adlidzi angyiŋ e mbi, oshpa ba ame e nyum eshri ba egŋe aki ba Ekristi, o shri ewukyeŋ o shri o ba mbo.

¹²Ame e wo la ekhwo okyku o da moare la a so gimi ayi a vu ozhẽ a yi nga a yi a hrẽ emo!

¹³Agimi anáŋ, moa a bzi gimi okyku o da gimi e hwiŋ odzudum angyiŋ. Ambo agimi e da ozhẽ he lo o dzu ekplo ba agimi é ba e da ogroayi ba egʼba o ri ekʼpo eshri bimi mbo. Ambo agimi e bmi e da oklo o da gimi e kpo e ghwo la egimi.

¹⁴Okyku eshi odaŋ lo pyeŋ, moa a kŋe lo a bga odaŋ okyekyeŋ la o lu mi le, Aŋo o klo a ba ekpazhi boŋ eka boŋ o klo eŋo.

¹⁵Ambo o wo ba agimi e kpo eka ebyi akla nga e la e tpi egimi ayi nga e la e fa egimi eso le, agimi e nyuŋ e kpo-kpo mbo le agimi é tpi egimi pyeŋ ayi.

¹⁶Ame e lu e da gimi, o raŋ o gre ba agimi e da Ogbgaodzi angyiŋ o ri ekʼpo eso bimi okyku o da gimi e bmi ta la okoklo ba egʼba mbo.

¹⁷Okyku eshi okoklo ba egʼba o la o ta eko ta la okoklo ba Ogbgaodzi. Nga okoklo ba Ogbgaodzi o la o ta eko ta la okoklo ba egʼba. Moaha he lo a wo moafpu emo angyiŋ. Okyku eka he nga alo o tsa bimi e kpo e gbu bimi e kpo ekployaŋ a mbo bimi e klo e gbu mbo.

¹⁸O wo ba Ogbgaodzi angyiŋ o la o tsa gimi le, agimi é dzu moawaghrẽ ba odaŋ angyiŋ mbo.

¹⁹Ayakplo ba odzudzu ba egʼba a la a kpo a wo zheŋ. Alo a tsa ba alo a wo la eshre, ta la odzudzu la o wo shasha mbo, ta la ayakplo la a wo eka lo mbo,

²⁰o hlu okpko eshko, ta la o hlu ololo eshko. Moare a zhiŋ a dzu moafpu, moa a la a klo ambgu, nga a ta efpu, nga a kpo olom. Moa a la a gʼba emo a zga egagʼba ta la eshishki.

²¹Moa a la a kpo efpu, nga a wa ajige a kpo ayi, nga a la a kpo eshki ba o wa ajige. Nga moa a la a kpo edgu ayakplo he lo. Ame e shĩ gimi eka ba ame e shĩ gimi ayga, moa la a kpo edgu ayakplo he lo, moa á hwiŋ Oreŋ ba Ahogbrẽ mbo ku-ku.

²²Ambo Ogbgaodzi o la o shri oklo o ba ta la eso ekyle, ta la opyapyaŋ, ta la ota eso akpyli, ta la okpoghwo, ta la oshasha, ta la adlidzi,

²³ta la opresõ-obiŋ, ta la ovueŋoghwo. Odaŋ-okyeŋ la o tla ayakplo edgu ahe o wo ma mbo.

²⁴Moare la a wo a ba Eyesu, moa a sheŋ a bga edgu odzudzu mo ba egʼba ta la ogroayi ba egʼba, ta la okoklo ba egʼba lo.

²⁵Ogbgaodzi o shri eso angyiŋ o shri o da gi. O dzu omgbybi baŋ á ba a ri ekʼpo eso bi a mbo.

²⁶O raŋ o gre ba agi e nyom egʼba o mbo le e tpi egi eso ayi, o mbo le ba agi e kpo efpu ta la egi mbo.