Read eggon MoAfisu 1 Bible Online

MoAfisu 1 - eggon bible

MoAfisu 1

¹Akpa he lo a zgi abgo Oblus. Aŋa a dzu are la a nyum oshpa ba Ekristi Eyesu okoklo ba Ahogbrẽ angyiŋ. Alo a wo okyku moare la a lu Ahogbrẽ ma la a wo osku ba Afisu, moa la a la a kpo adlidzi esõ mo odzudzu mo ta la Ekristi Eyesu.

²Ahogbrẽ la a wo Adigi, ta la Adigi-odne Eyesu Ekristi a shri okpoghwo ta la opyapyaŋ a shri a da gimi.

³Agimi e da gi e vye la Ahogbrẽ la a wo Adaŋ Adigi-odne Eyesu Ekristi! Okyku eshi okro okŋeobga bi ta la Ekristi, Ahogbrẽ a shri owlama ba okpoghwo ba Ogbgaodzi la o wo Ongyeŋ a shri a da gi a gre eshri.

⁴Omba ba moa a ka a kpo obiŋ hi a wo mbo, Ahogbrẽ a sheŋ a sla gi okyku o da gi e dzu moarehwĩ baŋ okro ba Ekristi, nga okyku o da gi e dzu la esesla, ta la akpu ko mbo egi ayi baŋ. Okyku oklo baŋ lo,

⁵Ahogbrẽ a sheŋ a hwim a lu ma aŋa á da gi e ba okro baŋ, nga é dzu moanwye baŋ ozhẽ ba Eyesu Ekristi. Alo angyiŋ a wo ŋa ekplo ovye ta la ekplo baŋ a zga esõ baŋ.

⁶Agimi e da gi e hlu Ahogbrẽ eshko okyku okpoghwo baŋ ba ekekʼpo, ta la ototno baŋ a shri a da gi okro ba Anwye baŋ a klo ŋa nzenze!

⁷Okyku eshi ibu eku ba Ekristi angyiŋ moa a shri odzudum a shri a da gi, nga Ahogbrẽ a kyu gi abgo odlobi bi. Okpoghwo ba Ahogbrẽ o gre eshri!

⁸A shri lo nzenze a shri a da gi! La okaobmye baŋ ta la okaogyugyuŋ baŋ angyiŋ,

⁹Ahogbrẽ a kpo ekplo baŋ a sheŋ a shri a zga esõ baŋ angyiŋ. A hwile gi ekplo baŋ a hwim a ghre ma baŋ á ba a bli lo ozhẽ ba Ekristi.

¹⁰Ohwihwim he lo, Ahogbrẽ a bli lo omba ba omba lo ó kpo. O wo okyku o daŋ a kŋe ayakplo pyeŋ a bga. Ayakplo baŋ a kpo la a wo Ongyeŋ ta la obiŋ hi mvye, nga okyku o da Ekristi angyiŋ a dzu eshri.

¹¹Ekployaŋ a mbo e la e kpo la ohwihwim ba Ahogbrẽ angyiŋ. Ahogbrẽ nga a sla gi okyku o da gi e dzu moarehwr baŋ okro okŋeobga ta la Ekristi okyku ozga-esõ baŋ, ozhẽ baŋ a sheŋ a hwim a zga ma okũ oriori.

¹²Agi nga la e wo moarehwĩ ba oriori la e sko aga bi e zga okro ba Ekristi, e da gi e hlu Ahogbrẽ eshko la ovyevye!

¹³Nga alo a mbo o wo ekakahelo angyiŋ ka la gimi. Omba ba agimi e gno oshpa ba adlidzi la o wo Oshpaodzadzi, alo angyiŋ o shri oshla o kom gimi, agimi e bmi ba adlidzi ta la Ekristi, nga Ahogbrẽ a bre gimi evgo ba agimi e wo moarehwĩ baŋ ozhẽ baŋ a shri Ogbgaodzi baŋ a hwim ka la gimi a da gimi angyiŋ.

¹⁴Ogbgaodzi angyiŋ o wo ozhezheŋ ba agi é ba e hwiŋ ekplo ba Ahogbrẽ a hwim a zga ma okyku moarehwĩ baŋ. Aŋa a shĩ gi ba Ahogbrẽ á ba a shri odzudum la o bli á ba a shri á da moare la a wo moarehwĩ baŋ. E da gi e hlu eshko baŋ la ovyevye!

¹⁵Okyku eka he lo angyiŋ, a zga omba ba ame e gno oshpa ba obmi ba adlidzi bimi okyku Adigi-odne Eyesu, ta la oklo bimi okyku moarehwĩ pyeŋ ba Ahogbrẽ,

¹⁶ame e tspi o vye la Ahogbrẽ okyku gimi mbo. Ame e la e tne aga bimi olu me.

¹⁷Nga ame e vẽ Ahogbrẽ ba Adigi-odne Eyesu Ekristi, Adigi ba esesla, okyku o daŋ a shri Ogbgaodzi la o ba o shri okaobmye ó shri ó da gimi, nga ó tsa gimi Ahogbrẽ ó da gimi e ka, okyku o da gimi e yi ŋa.

¹⁸Ame e vẽ okyku o da Ahogbrẽ a hwile gimi esõ okyku o da gimi e ka ayimom baŋ, okyku o da gimi e yi okayiozhẽ baŋ a bzi gimi okyku lo, nga okyku o da gimi e yi baŋ a hwim pa la moarehwĩ baŋ, okyku owlama ba egbregbre la o wo nzenze,

¹⁹nga okyku o da gimi e yi ba ekʼpo baŋ la e gre eshri angyiŋ e la e kpo otum ka gi la e bmi ba adlidzi ka la ŋa. Ekʼpo la e wo ka la gi hi, e wo eka oshye ogagre angyiŋ.

²⁰Aŋa a kpo otum ta la alo angyiŋ omba baŋ a kso Ekristi ongybi, nga a daŋ a dzu obgori baŋ Ongyeŋ.

²¹Ekristi angyiŋ a la a ri ekʼpo eshri moa la a la a ri ekʼpo ongyeŋ pyeŋ, pa la moa la a wo la ekʼpo ma nzenze ongyeŋ ta la moandakʼpo ba ongyeŋ. Aŋa a gre ashko ba ekʼpo la a wo obiŋ hi pyeŋ, ta la obiŋ la ó ba o ba.

²²Ahogbrẽ a shri ekployaŋ a mbo a ghwo abgo ba Ekristi. Nga a shri ŋa a da Eklisiya. Nga aŋa angyiŋ a daŋ a dzu anyuŋ Adaŋ-odne eshri ekployaŋ a mbo.

²³Eklisiya e wo egʼba ba Ekristi angyiŋ. E wo obiobli baŋ, nga aŋa angyiŋ a bli ekployaŋ a mbo okroyaŋ a mbo.