Read eggon MoAfisu 2 Bible Online

MoAfisu 2 - eggon bible

MoAfisu 2

¹Ayga, agimi e wo la Ogbgaodzi ma mbo, okyku o fa olbi o di mbo ta la odlobi bimi.

²Omba mi lo, agimi e lu ayakplobi ba ozhẽ ba obiŋ hi ma, nga e fa olbi e da areŋ la a ri ekʼpo eshri egbga la e ri ekʼpo ahrẽ. Ogbga he lo angyiŋ o la o ri ekʼpo pa la moarehwĩ la a shye eshri ta la Ahogbrẽ ohuhuhi.

³Ambo ayga, agi pyeŋ e wo eka mo angyiŋ, nga agi e dzu la okoklo bi ba egʼba. Nga agi e kpo ekployaŋ a mbo ba egʼba ta la aga bi e klo. Nga alo o dzu ba Ahogbrẽ á kpo gi pyeŋ ewu eka baŋ a kpo areyaŋ a mbo ewu.

⁴Ambo okayiekŋe ba Ahogbrẽ o gre eshri, nga oklo baŋ okyku gi o wo nzenze o gre eshri.

⁵Omba ba agi e kpo odlobi nga e dzu eka ba agi e kpu, nga, Ahogbrẽ a shri gi a kŋe a bga ta la Ekristi okyku o da gi e hwiŋ esõ. Agimi e hwiŋ oshla he lo okyku okpoghwo ba Ahogbrẽ angyiŋ.

⁶Nga okro ba okŋeobga ta la Ekristi Eyesu a da gi e kso, okyku o da gi e ri ekʼpo ka la ŋa Ongyeŋ.

⁷Aŋa a kpo ohe lo okyku o tsa okpoghwo baŋ la o gre eshri omba pyeŋ la o ra, ibu ba oklo baŋ a tsa gi okyku Eyesu Ekristi.

⁸Okyku eshi agimi é gro okyku okpoghwo ba Ahogbrẽ angyiŋ okro ba obmi ba adlidzi. O wo okpo-kpo bimi angyiŋ mbo, ambo ototno ba Ahogbrẽ angyiŋ.

⁹Ekplokyeŋ ba o nyom egʼba okyku lo e wo ma mbo. Okyku eshi alo o wo ozhẽ ba ozgayi bimi angyiŋ mbo.

¹⁰Ahogbrẽ angyiŋ a wo are la a kpo gi. Nga ozhẽ ba okŋeobga ta la Ekristi angyiŋ, aŋa a kpo gi okyku o da gi e kpo otum odzadzi baŋ a sheŋ a shri a zga ma okyku gi.

¹¹Agimi e tne aga e ka eka ba agimi e wo moa la a wo moaEyahuda mbo ayga ozhẽ ba ombrombre ba egʼba. MoaEyahuda a la a sko emo a zga moa la a sheŋ ongyum, moahi lo a la a bzi gimi moa la a sheŋ ongyum mbo. Osheŋongyum he lo o wo otum ba egʼba ba moarehwĩ a la a kpo sha angyiŋ.

¹²Omba mi lo agimi e wo ogyugyuŋ ta la Ekristi. Agimi e wo moazhẽ, nga agimi e wo eshki moarehwĩ ba Ahogbrẽ a sla mbo. Agimi e wo abgo ohwihwim baŋ a hwim lo mbo. Esĩ lo angyiŋ e wo ekployaŋ a mbo baŋ a la a lu pa la moarehwĩ baŋ. Agimi e dzu obiŋ hi ta la okayiozhẽ, ta la Ahogbrẽ angyiŋ mbo!

¹³Ambo ohuhuhi, okro ba okŋeobga ta la Ekristi Eyesu, agimi la e wo ogyugyuŋ ayga, moa a shri gimi a ba osusku okyku eku ba Ekristi.

¹⁴Okyku eshi Eyesu ababgo baŋ a shri opyapyaŋ a shri a kom gi, ozhẽ baŋ o kŋe moa Eyahuda pa la moa la a wo moaEyahuda mbo o bga nga o da mo a dzu moarehwĩ akyakyeŋ. La egʼba baŋ nga aŋa a kypi anzoŋ la a gʼba moaEyahuda pa la moa la a wo moaEyahuda mbo nga ba alo a da mo a dzu moafpu emo.

¹⁵A bga odaŋ moaEyahuda, ta la anwye-odaŋ lo, ta la oshioshĩ la o wo ma, okyku o daŋ a mbdzi moa-embre eha he lo okyku o da mo a dzu ogu olehe okyekyeŋ, la o wo la ekpom ka la ŋa, okyku o da opyapyaŋ o ba.

¹⁶Okro ba eku ba Ekristi baŋ a kpu egŋe aki angyiŋ, Ekristi a bga ofpu he lo. Okro ba egŋe aki he lo nga, a kŋe embre eha he lo a bga nga a bla mo a shri a ba okro ba Ahogbrẽ.

¹⁷Okyku eka he nga, Ekristi, a ba a nyum Oshpaodzadzi ba opyapyaŋ he lo a ygi moarehwĩ pyeŋ. A nyum lo a ygi gimi a ba Eyahuda mbo la e wo ogyugyuŋ ta la Ahogbrẽ, pa la moaEyahuda la a wo osusku ka la ŋa.

¹⁸Okro ba Ekristi angyiŋ, agi pyeŋ, moaEyahuda, pa la moaEyahuda mbo, e kpo e gbu ba agi e ba egi ayi ba Adigi okro ba Ogbgaodzi okyekyeŋ.

¹⁹Okyku eka he, agimi la e wo moaEyahuda mbo e wo moazhẽ nga mbo ku-ku. Ohuhuhi, agimi e wo moarehwĩ ba obiŋ pa la moarehwĩ ba Ahogbrẽ. Nga agimi e wo moarehwĩ ba ogu ba Ahogbrẽ angyiŋ a mo!

²⁰Agimi a mbo, moa a mbdzi gimi okũ ba moare la a nyum oshpa, pa la moarehwĩ ba Ahogbrẽ a hom mo otum, a mbdzi. Eyesu eshrishri eŋa angyiŋ a wo ezhim ba emvygi lo.

²¹Aŋa angyiŋ a kom aku lo pyeŋ abgo, nga a da lo a ta ma-ma nga a dzu Anyuŋ-akulu ba esesla okro ba Adigi-odne.

²²Okro ba okŋeobga ka la ŋa, moa a mbdzi gimi a mbo pa la moahwõ pyeŋ, a da gimi e dzu odne ba Ahogbrẽ a dzu ma ozhẽ ba Ogbgaodzi baŋ.