Read eggon MoaEfilibi 3 Bible Online

MoaEfilibi 3 - eggon bible

MoaEfilibi 3

¹Ekplo ba amom-abgo ekpyemgbyeŋ nga, agimi anáŋ, ame e la e vẽ Adigi-odne okyku o daŋ a shri ovye nzenze a shri a da gimi. O kpo me ewu okyku ba ame e bla e shĩ ekplo ba ame e sheŋ e ta mbo. Nga alo o kpo o ghwo okyku o da gimi e dzu opyapyaŋ.

²E nyuŋ e ka okyku moare la a la a kpo ayakplobi. Moa a wo ebu, moa angyiŋ a wo moare-hwĩ la a la a zga omgbybi okyku o tska egʼba.

³Agi angyiŋ e wo moarehwĩ ba moa a sheŋ ongyum ba adlidzi, moa angyiŋ mbo, okyku eshi agi e la e hlu Ahogbrẽ eshko ozhẽ ba Ogbgaodzi angyiŋ, nga agi e la e kpo ovye ibu odzudzu bi okro ba Ekristi Eyesu. Agi e sko okpo-kpo ba egʼba e zga akplokyeŋ mbo.

⁴Ame e mbi e kpo e gbu ba ame e shri esõ me e shri e zga ibu edgu ayakplo he lo. Nga o wo ba arekyeŋ a tne aga eka baŋ a hwiŋ odzudum okyku okpo-kpo ba egʼba angyiŋ le, ame e wo la ozhẽ ma ba o tne aga eka he lo e gre areyaŋ a mbo.

⁵Moa a sheŋ me ongyum omba ba ame e kpo asati akyeŋ. Ibu ba ombrombre ame e wo arehwĩ ba Esrayila angyiŋ. Ame e wo arehwĩ ba ogu ba Ebenjami, arehwĩ ba embre ba Eyahuda arehwĩ ba amanzhli baŋ a dzum mbo ku-ku. Ozhẽ ba okpaŋodaŋ moaEyahuda angyiŋ le, ame e wo arehwĩ ba Efarisi angyiŋ.

⁶Ame e wo la ozgayi ma e gre eshri. Okyku eka he lo angyiŋ, ame e kpo Eklisiya ewu. Eka ba moarehwĩ a sko a zga ma are á dzu are ba odlodzi ozhẽ ba okpaŋodaŋ, nga ame e ka ekplokyeŋ ba ame e sheŋ e nye ma ku-ku mbo.

⁷Ambo ayakplo pyeŋ e mbi, ba ame e sko lo okyku o da me e hwiŋ ma, ame e tla lo nga e sko lo e zga akplokyeŋ mbo okyku Ekristi.

⁸Ambo ayakplo he sha angyiŋ mbo, ambo ame e sko ekployaŋ a mbo e zga akplokyeŋ mbo okyku ekplo la e wo owlama e gre eka he, alo angyiŋ a wo oyioyi eshri ba Ekristi Eyesu Adime-odne. Okyku ŋa angyiŋ, ame e ndba ekployaŋ a mbo e ta a bi, okyku eshi ame e sko lo e zga eka ekro angyiŋ, okyku o da me e hwiŋ Ekristi,

⁹nga okyku o da me e kŋe eshri me e bga ka la ŋa la esõ ekyekyeŋ. Nga ohuhuhi odlodzi ba eshri me ame e wo la alo ma mbo. Edgu odlodzi he lo moa a la a hwiŋ lo ozhẽ ba okpaŋodaŋ angyiŋ. Ambo ohuhuhi ame e wo la odlodzi ba moa a shri lo a di ozhẽ ba obmi ba adlidzi ta la Ekristi. Odlodzi he lo o zgi okro ba Ahogbrẽ angyiŋ o ba, nga okũ lo o wo okro ba obmi ba adlidzi angyiŋ.

¹⁰Ekplo ba ame e klo angyiŋ e wo okyku o yi Ekristi nga o hwiŋ ekʼpo ba oksongbybi baŋ a kso. Nga o pu ka la ŋa ewu baŋ a kpo, nga o dzu eka baŋ ibu eku baŋ,

¹¹la okayiozhẽ ba moa á ba a kso me eku a mbo nga ba ame é hwiŋ esõ.

¹²Ame e sko eshri me e zga eka ba ame e sheŋ e kpo ohe lo e khwo angyiŋ mbo. Nga ame e sko lo e zga eka ba ame e sheŋ e bli angyiŋ mbo. Ame e la e zga ayi okyku o da me e hwiŋ alo angyiŋ, okyku eshi ame e sheŋ e wo arehwĩ ba Ekristi Eyesu angyiŋ a mo.

¹³Ambo, agimi anáŋ, ame e tne aga eka ba ame e sheŋ e hwiŋ alo mbo ku-ku. Aga akya-kyeŋ la a wo esõ me ibu odzudzu me, alo a wo okyku o da me e gre esõ ekployaŋ a mbo la e wo egi okũ e ghre nga e zga ayi ngre okyku o da me e gbu okro la o wo egi ayi me.

¹⁴Okyku eka he ame e la e knye tsoŋ e yi ibu ba ori egbre, okyku o da me e ri egbre he lo. Alo angyiŋ o wo obzi ba Ahogbrẽ a bzi ibu ba Ekristi Eyesu okyku odzudzu la o wo ongyeŋ.

¹⁵Agi pyeŋ la e bmye ayi e klu odzudzu ba Ogbgaodzi, o raŋ o gre bi e wo la edgu aga he angyiŋ. Ambo o wo moa-kyeŋ a wo la edgu agakyeŋ ondundum eshki bimi le, Ahogbrẽ á tsa gimi alo zhezheŋ.

¹⁶O wo ba alo o wo ekayaŋ a mbo, agimi e da gi e la e knye la edgu odaŋ ba agi e la e kpo otum ta la lo ma-me e bli omba he.

¹⁷Agimi anáŋ pyeŋ, e mbili me ombayaŋ a mbo. Agi e sheŋ e shri egŋe la e wo shasha e zga egi ayi bimi, okyku eka he e mbili moa la a kpo otum ta la egŋe he lo.

¹⁸Ame e sheŋ e lu ohe lo e da gimi engyi oshushku bgu, nga ame e sa e shĩ gimi e shri lo e ta ma-ma ta la amanyi ayi angyiŋ ohuhuhi. Moare nzenze ba odzudzu mo o da mo a dzu moafpu ba eku ba Ekristi egŋe aki a wo ma.

¹⁹Eygi mo e wo enzhe ba ovo angyiŋ. Okyku eshi ahogbrẽ mo angyiŋ a dzu okoklo ba egʼba. Moa a la a nyom egʼba ta la ayakplo e mbi ba alo o raŋ o gre ba moa a kpo anzi okyku lo. Nga moa a tne aga ayakplo ba obiŋ hi sha.

²⁰Agi nga agi e wo moarehwĩ ba Ongyeŋ. Nga agi e la e ka ayi ozhẽ okyku o da Areoshla bi a zgi Ongyeŋ a ba. Aŋa angyiŋ a wo Adigi-odne Eyesu Ekristi.

²¹Aŋa á nyiŋ egʼba bi la e wo la oshye mbo la é ba e kpu, á da lo é dzu eka ba egʼba baŋ ba ayimom ba esesla baŋ. Aŋa á kpo otum he lo ta la ekʼpo la e daŋ ozhẽ e daŋ a la a ri ekʼpo eshri ekployaŋ a mbo.