Read eggon MoaOkolosi 4 Bible Online

MoaOkolosi 4 - eggon bible

MoaOkolosi 4

¹Agimi adaŋ-odne, e nyuŋ e kpo-kpo, nga e kpo adlidzi okpo-kpo bimi e kpo pa la moawaghrẽ bimi. Agimi e tne aga e ka, okyku eshi agimi a mbo e wo la Adaŋ-odne ma Ongyeŋ.

²Agimi e fa olu ombamba pyeŋ. Nga e dzu ayi omba ba agimi e fa olu, nga e vye la Ahogbrẽ.

³Nga e fa olu okyku gi a mbo, okyku o da Ahogbrẽ a hwile gi ozhẽ la o wo odzi, okyku o da gi e nyum oshpa ba odlo baŋ, nga e lu eshyẽ ba Ekristi. Okyku ohe lo angyiŋ ame e lom aku ohuhuhi.

⁴Agimi e fa olu okyku o da me e nyum oshpa lo adzadzi ozhẽ la o raŋ o gre okyku o da lo o wo zheŋ.

⁵E nyuŋ e kpo-kpo pa la moare la a bmi ba adlidzi mbo. Agimi e kpo otum adzadzi ta la anvaŋyaŋ a mbo ba agimi e hwiŋ,

⁶nga e lu odlo la o wo ble nga o wo odzi angyiŋ pa la moare. Nga o raŋ o gre ba agimi e yi eka ba o shri otnoma la o wo odzi angyiŋ o shri o da areyaŋ a mbo.

⁷Anigi ba moa a bzi ŋa ma Etikiku, a wo anwye-odne ba adlidzi angyiŋ. Aŋa a la a kpo otum ba Adigi-odne otsotse pa la me. Aŋa á shri oshpa me á shri á da gimi.

⁸Okyku eka he lo angyiŋ ame e hom ŋa otum okro bimi, okyku o lu o da gimi eka ba agi pyeŋ e kpo otum lo, okyku o da gimi e wo la ovye ma.

⁹Onesimu anigi la a wo la adlidzi, á ba ka la ŋa. Aŋa a wo eshki bimi. Moahi lo á lu eka ekployaŋ a mbo e la e kpo ahe á da gimi.

¹⁰Aristaku la a wo aku pa la me, a shko gimi. Amarku a mbo la a wo akha Abarnaba a shko gimi. Moa a sheŋ a tsa gimi ayakplo eshri baŋ okyku o da gimi e yga ŋa o wo baŋ a ba.

¹¹Ojoshua, ba moa a bzi ŋa ma Ojustu, aŋa a mbo a shko gimi. Moatra he sha a wo moaEyahuda la a la a kpo otum pa la me okyku Oreŋ ba Ahogbrẽ. Moa a kpo a ghwo la me a gre eshri.

¹²Ebafara a mbo a shko gimi. Aŋa a mbo a wo arehwĩ ba eshki bimi angyiŋ. Aŋa a mbo a wo awaghrẽ ba Ekristi Eyesu angyiŋ. A la a fa olu osheshye okyku gimi ombamba pyeŋ. Aŋa a la a vẽ Ahogbrẽ okyku o da gimi e tspi la osheshye la esõ la e bmye ayi e klu, la obmi ba adlidzi nga la obibmi la esõ ekyekyeŋ ta la okoklo ba Ahogbrẽ.

¹³A wo arehwĩ la a la a kpo otum la osheshye angyiŋ. Ame e kpo e gbu ba ame e zgi egŋe he lo eshri baŋ okyku gimi, ta la moarehwĩ ba Eladosiya, ta la Ehiraboli.

¹⁴Oluka la a wo elikita bi, ta la Edema, moa a shko gimi.

¹⁵Agimi e shko moanáŋ la a wo Eladosiya nzenze. Nga e shko ashe la a ri Enimfa pa la moare la a la a shki a fa olu odne baŋ.

¹⁶Ambla ba agimi e tsi akpa he lo e khwo bgu le, agimi e gre esõ e ghre okyku o da mo a sa a tsi lo a ygi Eklisiya ba Eladosiya mbo. Nga agimi a mbo e sa e tsi akpa ba moarehwĩ ba Eladosiya á ba a shri á kom gimi.

¹⁷Nga ame e klo ba agimi e lu e da Akibu e lu mi le, Aŋo o gre esõ o ghre okyku o bli otum ba Adigi-odne ba moa a shri a doŋ mbo.

¹⁸Ame e ta engla he lo ababgo me angyiŋ. Oshko he lo o zgi abgo ba Oblus. Agimi e gre esõ aslika me e ghre mbo! Okpoghwo ba Ahogbrẽ o dzu ka la gimi.