Read eggon 1 MoaEtasolonika 3 Bible Online

1 MoaEtasolonika 3 - eggon bible

1 MoaEtasolonika 3

¹Ekplo ba amom-abgo ekpyemgbyeŋ nga, alo o gre gi eshri esõ. Okyku eka he agi e zga aga ba o dzu ambambga osku ba Atanese.

²Nga omba lo agi e hom Etimoti otum, aŋa a wo anigi la a la a kpo otum ka la gi otsotse okyku Ahogbrẽ. Aŋa a la a nyum Oshpaodzadzi eshri ba Ekristi. Agi e hom ŋa otum okyku o daŋ a shĩ gimi nga okyku o daŋ a kpo a ghwo la gimi ozhẽ ba obmi ba adlidzi bimi,

³okyku o da arekyeŋ eshki bimi a zhiŋ a yi ambla okyku ewu he mbo. Agimi a mbo e yi ba ewu he lo e dzu ekplo ba Ahogbrẽ a shri a zga okyku gi angyiŋ.

⁴Nga omba ba agi e yi e wo ka la gimi, agi e sheŋ e lu e da gimi ba moa á ba a kpo gi ewu, nga eka ba agimi e sheŋ e yi zhezheŋ alo o kpo eka he lo ka la gi adlidzidzi.

⁵Okyku eka he angyiŋ ame e hom Etimoti otum. Alo o gre me eshri esõ angyiŋ a mo, okyku eka he ame e hom ŋa otum okyku o daŋ a yi odzudzu bimi okro obmi ba adlidzi. Adlidzi, alo o wo eka ba Eshitaŋ a bile gimi nga ba otum bi o wo otum ba ototno angyiŋ mbo!

⁶Ohuhuhi nga Etimoti a zgi okro bimi a ba okro bi, nga a shri oshpa ba o raŋ gi esõ eshri obmi ba adlidzi bimi, ta la oklo bimi a mbo a shri a ba. A lu a da gi a lu ma agimi e lu odlo odzi eshri bi ombamba pyeŋ. Nga a lu ma agimi e wo la ekhwo ma okyku o ka gi eka bi a mbo e wo la ekhwo ma okyku o ka gimi.

⁷Okyku eka he lo, agimi anáŋ, ibu ewu ta la avuolo ba agi e wo ma pyeŋ, agi e hwiŋ oshye-esõ okyku gimi. Ambo obmi ba adlidzi bimi angyiŋ o shri oghwo-esõ o da gi.

⁸Nga ohuhuhi agi é wo la esõ adlidzi ma, o wo ba agimi e tspi gaŋ la odzudzu bimi okro ba Adigi-odne.

⁹Okyku eshi, ohuhuhi agi e kpo e gbu ba agi e vye la Ahogbrẽ okyku gimi. Agi e vye la ŋa okyku ovye ba agi e wo la alo ma egi ayi ba Ahogbrẽ bi okyku gimi.

¹⁰La olulum ta la okyukyku, agi e vẽ Ahogbrẽ la esõ bi pyeŋ okyku o da gi e ka gimi la eyayi bi, nga okyku o da gi e shri ekplo ba agimi e wo la alo ma mbo okro obmi ba adlidzi bimi, e shri e da gimi.

¹¹Nga Ahogbrẽ bi, la a wo Adigi eshrishri eŋa, ta la Adigi-odne Eyesu, moa a bmi le, a hwile gi ozhẽ okyku o da gi e ba okro bimi!

¹²Adigi-odne a bmi le, a da gimi e klo egimi nga e klo moahwõ pyeŋ. Nga a da oklo o hlu o ta ma o ta-ta eka ba agi e la e klo gimi.

¹³Ozhẽ he lo angyiŋ aŋa á da esõ bimi e tspi osheshye. Nga agimi é tspi la obiobli la esesla egi ayi ba Ahogbrẽ bi la a wo Adigi omba ba Adigi-odne Eyesu á ba pa la moarehwĩ baŋ.