Read eggon 1 MoaEtasolonika 4 Bible Online

1 MoaEtasolonika 4 - eggon bible

1 MoaEtasolonika 4

¹Agimi anáŋ, ekplo ba amom-abgo ekpyemgbyeŋ nga, agi e nye gimi edgu odzudzu la o raŋ Ahogbrẽ esõ, okyku o da Ahogbrẽ a gno oraŋ ka la gimi. Ambo agimi e dzu eka he lo angyiŋ. Nga ohuhuhi, agi e vẽ nga e shĩ gimi eshko ba Adigi-odne Eyesu okyku o da gimi e kpo otum la o gre eka he.

²Agimi nga e sheŋ e yi onyenye ba agi e nye gimi okro ba ekʼpo ba Adigi-odne Eyesu.

³Ahogbrẽ a klo ba agimi e dzu la esesla, nga e dzu la eshre tsitsi a mbo mbo.

⁴Areyaŋ a mbo eshki bimi, o raŋ o gre baŋ a yi eka ba o kyu ashe ozhẽ ba esesla la o wo shasha,

⁵ambo la okoklo ba egʼba eka moaevbu la a yi Ahogbrẽ mbo angyiŋ mbo.

⁶Okyku odlo he lo o raŋ o gre ba arekyeŋ a kpo anáŋ akplokyeŋ abi o mbo le a ka a kpgo ŋa mbo ku-ku. Agi e sheŋ e lu odlo he lo ka la gimi, nga agi e shĩ gimi osheshye eka ba Adigi-odne á ba a da ewu e hwiŋ moa la a la a kpo edgu ayakplo ba akpu he lo.

⁷Ahogbrẽ a bzi gi okyku o da gi e ba e dzu la odzudzu ba eshre angyiŋ mbo, ambo okyku o da gi e ba e dzu la odzudzu ba esesla.

⁸Okyku eka he nga, areyaŋ a mbo la a tla onyenye he lo, a tla arehwĩ angyiŋ mbo, ambo a tla Ahogbrẽ angyiŋ la a la a shri Ogbgaodzi a da gimi.

⁹O dzu omgbybi mbo ba ame e ta gimi akpa eshri oklo bimi okyku moanigimi la a bmi ba adlidzi, okyku eshi Ahogbrẽ a sheŋ a nye gimi okyku o da gimi e klo egimi.

¹⁰Agimi nga e sheŋ e kpo eka he lo pa la moanáŋ pyeŋ la a wo Amasidoniya. Okyku eka he agi e vẽ gimi okyku o da gimi e kpo lo e ta ma-ma.

¹¹Agimi e hwim esõ bimi nga e dzu la esõ-egbubiŋ. E ghwo abgo akplo moahwõ mbo, nga e nyuŋ otum bimi e kpo okyku o da gimi e hwiŋ algori eka ba agi e sheŋ e lu e da gimi ayga.

¹²Ozhẽ he angyiŋ moare la a bmi ba adlidzi mbo á ba a ka gimi la olbi. Nga agimi é ka ayi abgo ba arekyeŋ okyku ekplokyeŋ ba agimi e klo mbo.

¹³Agimi anáŋ, agi e klo ba agimi e yi adlidzi eshri moare la a sheŋ a kpu, okyku o da gimi e dzu la esõ-ongʼba eka moare la a wo la okayiozhẽ mbo, mbo.

¹⁴Agi e bmi ba adlidzi ba Eyesu a kpu a khwo a sa a kso. Okyku eka he agi e bmi ba adlidzi ba Ahogbrẽ á ba a shri moa la a kpu la obmi ba adlidzi ta la Eyesu, á ba a ba otsotse ka la ŋa.

¹⁵Onyenye ba Adigi-odne angyiŋ agi e lu e da gimi. Agi la e wo la esõ olum onda ba Adigi-odne á ba a ba, agi é gre moa la a sheŋ a kpu ori mbo ku-ku.

¹⁶Moarehwĩ á gno enzi ba obzi. Moa á gno enzi anyuŋ anwyeadga ba Ahogbrẽ, ta la enzi ba angzo ba Ahogbrẽ. Nga Adigi-odne ababgo baŋ á gile á zgi Ongyeŋ á ba! Ambo moa la a kpu la obmi ba adlidzi la eshko Ekristi, moa á kso mo angyiŋ ori.

¹⁷Ambla he nga agi la e wo ayi ma omba he lo, moa á pla gi á shki pa la mo etabro lo, nga agi pa la mo é yi é tsa Adigi-odne ahrẽ. Nga eka he lo agi é ba e dzu ta la Adigi-odne gbagbu-amo.

¹⁸Okyku eka he, e shri oshye-esõ e da egimi la odlo he lo.