Read eggon 1 Etimoti 1 Bible Online

1 Etimoti 1 - eggon bible

1 Etimoti 1

¹Akpa he lo a zgi abgo me Oblus, are la a nyum oshpa ba Ekristi Eyesu la okoklo ba Ahogbrẽ la a wo Areoshla bi ta la Ekristi Eyesu la a wo okayiozhẽ bi.

²Akpa he lo a wo okyku Etimoti anwye me ba adlidzi ibu obmi ba adlidzi. Ahogbrẽ la a wo Adigi, ta la Ekristi Eyesu Adigi-odne, moa a shri okpoghwo ta la okayiekŋe, ta la opyapyaŋ a shri a doŋ.

³Ame e klo boŋ o dzu Afisu eka ba ame e lu e doŋ, omba ba ame e wo ozhẽ ba o yi Amasidoniya. Moarekyeŋ Afisu a la a nye onyenye ba akpro. O raŋ o gre boŋ o tspi la mo.

⁴O lu o da mo a kyu enzho ta la oshpa ba ashko ba egu moa a la a klo nzenze. Ohe lo o la o shri oklaodlo sha o shri o ba. Ohe lo ó bli ekplokyeŋ ba Ahogbrẽ a klo mbo. Moa a la a yi ekplo ba Ahogbrẽ a klo ozhẽ ba obmi ba adlidzi sha.

⁵Ame e jygu odaŋ he lo okyku o da oklo la o zgi esõ la e wo pse, ta la enzi ba esõ la e wo pyapyaŋ, ta la obmi ba adlidzi la o wo obilekyeŋ tsi a mbo mbo.

⁶Moakyeŋ eshki a zgi a sku ozhẽ lo, nga moa a ta ozhẽ akpu okyku ba moa a la a lu odlo ba ototno.

⁷Moa a la a klo o dzu moa la a nye odaŋ ba Ahogbrẽ, ambo moa a yi odlo moa a la a nye ta la ayakplo moa a la a lu odlo osheshye eshri lo osheshye mbo.

⁸Agi e yi ba odaŋ o wo odzi o wo ba moa a la a kpo otum ta la alo ozhẽ shasha.

⁹O raŋ o gre bimi e ka e bmye ba moa a la a jygu odaŋ okyku moare la a wo eda edzi angyiŋ mbo, ambo okyku moare la a la a tsi odaŋ-okyeŋ a la a ghwo ayi mbo, pa la moare la a gre abgo, pa la moare la a yi Ahogbrẽ mbo, pa la moare ba odlobi. Odaŋ o wo okyku moa la a lu Ahogbrẽ ma mbo, pa la moa la a wo la Ogbgaodzi ma mbo, pa la moa la a bga moadimo pa la moanimo, pa la moa la a bga ebga,

¹⁰pa la moa la a kpo ayakplo ba eshre, pa la moa la a ri eshra, pa la moa la a kpo ogʼga, pa la moa la a sheŋ akpro nga a zgi egŋe ba akpro, pa la moa la a kpo ayakplo la a bmi ba onyenye ba adlidzi mbo.

¹¹Edgu onyenye he lo angyiŋ moa a ta lo Oshpaodzadzi. Moa a shri lo a da me okyku o da me e su lo. Alo o wo Oshpaodzadzi ba Ahogbrẽ la a wo la ekekʼpo a gre eshri angyiŋ.

¹²Ame e vye Ekristi Eyesu Adigi-odne la a shri oshye a da me okyku o kpo otum he lo. Ame e vye la ŋa e gre eshri okyku baŋ a sko me a zga eka ba ame e tse ma, nga a sla me okyku o da me e kpo otum baŋ.

¹³Ambo ayga ame e lu odlo ba ototno eshri baŋ, nga ame e kpo ŋa ewu, nga ame e dzĩ ŋa. Ambo Ahogbrẽ a ka me ayiekŋe okyku eshi ame e bmi ba adlidzi mbo, nga ame e ka e yi ekplo ba ame e kpo mbo ku-ku.

¹⁴Adigi-odne nga a shki me la okpoghwo baŋ nzenze, nga a shri obmi ba adlidzi ta la oklo a da me. Agi e hwiŋ lo omba bi e kŋe e bga ta la Ekristi Eyesu.

¹⁵Odlo la o lu ma Ekristi Eyesu a ba obiŋ hi okyku o shla moa ba odlobi, o wo adlidzi angyiŋ, nga o raŋ o gre ba areyaŋ a mbo a yga lo la esõ ekyekyeŋ, nga a bmi ba adlidzi ta la lo.

¹⁶Ambo okyku ekplo he lo sha angyiŋ, Ahogbrẽ a ka me ayiekŋe, okyku o da moare a ka ota esõ akpyli ba Ekristi Eyesu okyku me la e wo la odlobi e gre moahwõ pyeŋ, okyku o da me e dzu egŋe egi ayi moarehwĩ pyeŋ la á ba a bmi ba adlidzi ka la ŋa, okyku o da mo a hwiŋ esõ ba gbagbu-amo.

¹⁷Ahogbrẽ a wo Anyuŋ-areŋ ba gbagbu-amo, a wo la a kpu ku-ku mbo, nga moa a ka ŋa a gbu mbo, aŋa sha a wo Ahogbrẽ gbagbu-amo. Nga ekʼpo, ta la esesla moa a wo a baŋ pyeŋ! Amin.

¹⁸Aŋo Etimoti anwye me, ame e shri odaŋ he lo e ghwo ŋo abgo. Odaŋ he lo o wo eshri ekplo ba moa a ka nga a lu odlo eshri boŋ ogbyigbyi angyiŋ. Okyku eka he o da odlo he lo angyiŋ o dzu anzho eko boŋ ibu eko edzadzi boŋ o la o ta he lo,

¹⁹nga o kpaŋ obmi ba adlidzi boŋ ta la enzi ba esõ la e wo pyapyaŋ. Moabze a la a kpaŋ ekplo la e wo esõ mo mbo, okyku eka he obmi ba adlidzi mo o tpi ayi.

²⁰Eshki mo edgu moarehwĩ he lo, Ehemaniyu ta la Alaksanda a wo eshki mo. Moahi lo, ame e kyu mo abgo e da Eshitaŋ okyku o da mo a nye eda nga a kyu ayakplo ba ototno ba moa a la a lu eshri ba Ahogbrẽ abgo.