Read eggon 1 Etimoti 4 Bible Online

1 Etimoti 4 - eggon bible

1 Etimoti 4

¹Ogbgaodzi o lu zhezheŋ o lu ma moabze á tla ozhẽ ba Eyesu omba ba amom-abgo. Nga moa á fa olbi á da egbgabi la e sheŋ akpro, nga moa á yga onyenye ba ábili.

²Onyenye he o ba ozhẽ moare la a sheŋ akpro, nga moa a la a bile moare. Enzi ba esõ mo e sheŋ e kpu, nga alo e sheŋ e zhĩ.

³Moa edgu moare he lo a la a nye moare a lu ma alo o wo odzi ba moa a kyu ashe mbo, nga o raŋ o gre ba moa a ri edgu algokyeŋ mbo. Ambo Ahogbrẽ angyiŋ a kpo algo pyeŋ okyku o da mo a ri, ambla ba moa la a bmi ba adlidzi ka la ŋa nga a yi adlidzi, moa a vye la ŋa okyku lo.

⁴Ekployaŋ a mbo ba Ahogbrẽ a kpo e wo edzi. O raŋ o gre moa a tla ekplokyeŋ ku-ku mbo. Ambo o raŋ o gre moa a yga ekplo-yaŋ a mbo ta la olu ba ovye.

⁵Okyku eshi odlo ba Ahogbrẽ ta la olu angyiŋ o da Ahogbrẽ a bmi.

⁶O wo boŋ o la o nye moanáŋ eka he angyiŋ le, aŋo ó dzu anwyeotum ba adlidzi ba Ekristi Eyesu, omba boŋ o la o vgi esõ boŋ la edlo ba obmi ba adlidzi ta la onyenye ba adlidzi boŋ o lu lo ma.

⁷Ambo o ngʼba o sku enzho ba ototno. Moa a wo ekplokyeŋ ozhẽ ba Ahogbrẽ mbo. O nyuŋ o tspi osheshye ozhẽ ba Ahogbrẽ.

⁸O nye egʼba ayakplo o wo la owlama fi, ambo o nye esõ ozhẽ ba Ahogbrẽ o wo la owlama ozhẽyaŋ a mbo. Ozhẽ he lo o hwim okyku esõ ba gbagbu-amo okyku ohuhuhi ta la omba la o yi o ba.

⁹Odlo he lo o wo o ba adlidzi angyiŋ. O yga lo la esõ ekyekyeŋ nga o bmi ba adlidzi ta la alo.

¹⁰Okyku eka he lo agi e kpo nga e kpo otum la osheshye, okyku eshi agi e sko Ahogbrẽ la a wo la esõ ma angyiŋ e zga okayiozhẽ bi. Aŋa angyiŋ a wo Areoshla moarehwĩ pyeŋ, ambo esĩ ba oshla he lo e wo okyku moa la a bmi ba adlidzi ka la ŋa.

¹¹Aŋo o jygu mo odaŋ nga o nye ayakplo he lo.

¹²O da arekyeŋ a dzĩ ŋo okyku boŋ o yi o wo ola anwye mbo. Ambo o dzu eka egŋe angyiŋ okyku moa la a bmi ba adlidzi. Aŋo o tsa mo ekployaŋ a mbo ibu odlo boŋ o lu ta la okyekye boŋ, ta la oklo boŋ, ta la obmi ba adlidzi boŋ, ta la adlidzi boŋ.

¹³O shri omba boŋ o wo la alo ma, ta la ozgayi boŋ o wo la alo ma, o zga o tsi engla ba Akpa ba Ahogbrẽ egi ayi moare, ta la onyumoshpa, ta la onyenye o tsa ba ame e ba.

¹⁴Aŋo o ndba oyioyi ba Ogbgaodzi o shri o doŋ, omba ba moarehwĩ ba Ahogbrẽ a hom mo otum a hwile anyu a lu odlo, ta la omba ba moandakʼpo a shki ŋo abgo eshri o ta mbo.

¹⁵Aŋo o shri eshri boŋ o di okyku ayakplo he lo, nga o kpo lo okyku o da moare pyeŋ a ka boŋ o vre o yi o ta ma-ma otum he lo.

¹⁶O nyuŋ eshri boŋ o zga nga o nyuŋ o kpo ta la onyenye boŋ. Aŋo o kpo ayakplo he lo ombamba pyeŋ okyku o doŋ o shla eŋo, pa la moare la a gno odlo boŋ o lu lo.