Read eggon 2 Etimoti 4 Bible Online

2 Etimoti 4 - eggon bible

2 Etimoti 4

¹Ame e jygu ŋo odaŋ egi ayi ba Ahogbrẽ, ta la Ekristi Eyesu, aŋa la á ba a sõ moarehwĩ pyeŋ ombgu. Aŋa á sõ moa la a wo ma pa la moa la a kpu pyeŋ ombgu. Okyku oba-ba baŋ ta la Oreŋ baŋ angyiŋ ame e la e shĩ ŋo,

²okyku o doŋ o nyum oshpa lo, nga o zga omgbybi boŋ o lu lo o ygi moare omba la o wo odzi, ta la omba la o wo odzi mbo. Nga o tsa mo o da mo a ka adlidzi, nga o shrom mo, nga o shĩ mo, nga o nye mo la oheheŋ.

³O ka, omba o yi ó ba, ba moare ba á bmi ta la onyenye ba adlidzi mbo, nga moa á kpo ayakplo ba esõ mo e klo sha, nga moa á pla moa la a nye moare á shki emo ombamba pyeŋ. Moare he lo a la á nye mo ayakplo moa a klo, la a raŋ mo esõ.

⁴Moa á tla o gno oshpa ba adlidzi, nga moa á kpo nga, moa á klo o gno enzho ba ototno.

⁵Ambo aŋo, o vu eŋo o ghwo ozhẽyaŋ a mbo. Aŋo o ta esõ boŋ akpyli, nga o kpo eka ba are la a nye moare Oshpaodzadzi he lo, nga o kpo otum boŋ pyeŋ eka ba awaghrẽ ba Ahogbrẽ.

⁶O me e mbi, omba ba o shri me o ndba Ahogbrẽ, o sheŋ o kpo bgu. Ame é dzu obiŋ hi é zga a mo.

⁷Ame e kpo ekployaŋ a mbo ba ame e kpo e gbu okyeoknye he lo. Ame e sheŋ e knye lo e bli. Nga ame e kpaŋ la obmi ba adlidzi lo.

⁸Ohuhuhi nga egbre e wo ma okyku me okyku ba ame e ri. Egbre he lo e wo egbre ba odlodzi ba Adigi-odne la a sõ ombgu ba adlidzi angyiŋ, aŋa á shri lo á da me Onda mi lo. Aŋa á shri lo á da me sha angyiŋ mbo, ambo á shri lo á da areyaŋ a mbo la a la a dzu a bli ŋa la oklo okyku oba-ba baŋ.

⁹Aŋo o zga ngre nga o ba okro me o ta adzadzi.

¹⁰Okyku eshi, Edema a zhiŋ a shri eshri baŋ a da obiŋ hi nga a knye a dzu me a zga a gre eŋa Etasolonika. Ekrisiŋ nga a gre eŋa Egalasiya, Etitus nga a gre eŋa Edlamasiya.

¹¹Ohuhuhi, Oluka sha a wo pa la me ahe. Aŋo o da Amarku a ba otsotse ka la ŋo, okyku eshi aŋa a mbo á kpo á gbu baŋ á kpo á ghwo la me otum he lo.

¹²Ame e hom Etikiku otum e daŋ a gre Afisu.

¹³Omba boŋ o ba le, aŋo oshri akyli ba ame e dzu e zga Otrosa ibu ba Ekapa. Aŋo o shri lo o kom me ma. O shri akpekpa lo a mbo o shri o ba, nga ame e shĩ ŋo okyku akpekpa ba ame e ta ayakplo ma, aŋo o gre esõ ahi lo o ghre mbo.

¹⁴Alaksanda la a ta ondga, a klo adga me a gre eshri. Ahogbrẽ á kpo ŋa ma eka ekplo baŋ a kpo me.

¹⁵Aŋo a mbo, o nyuŋ o kpo-kpo ka la ŋa, okyku eshi a bmi ta la oshpa bi e la e nyum mbo ku-ku.

¹⁶Arekyeŋ a wo pa la me onda ba oriori ba moa a shri me a gre akuombgu lo mbo. Moa pyeŋ a knye a dzu me a zga. Ame e vẽ Ahogbrẽ okyku o daŋ a sko lo a zga ombgu pa la mo mbo!

¹⁷Ambo Adigi-odne a dzu pa la me nga a shri oshye a da me, nga ame e hwiŋ oshye ba o nyum oshpa mvye e ygi moa la a wo moaEyahuda mbo pyeŋ. Nga moa a shla me anyu ba émbdze.

¹⁸Adigi-odne nga á kpaŋ me á sku oylayaŋ a mbo. Nga á shri me pyapyaŋ á shri á yi Oreŋ baŋ la o wo Ongyeŋ. Ekekʼpo e dzu e baŋ gbagbu-amo! Amin.

¹⁹Ame e shko Ebriskila ta la Akila, pa la moa-odne ba Onesiforu pyeŋ.

²⁰Erastu a ra a dzu Okorinti, nga ame e dzu Otrofimu e zga Emilatu okyku eshi aŋa a wo oshye mbo.

²¹O zga ngre o ba o sheŋ omba ba afpe o ta. Oyubulu ta la Opudeŋ, ta la Elinu, ta la Ekladiya, moa a shko ŋo. Moanáŋ ahwõ pyeŋ, moa a shko ŋo.

²²Adigi-odne a dzu ka la ŋo, nga okpoghwo ba Ahogbrẽ o dzu ka la gimi pyeŋ.