Read eggon Etitu 1 Bible Online

Etitu 1 - eggon bible

Etitu 1

¹Akpa he lo a zgi abgo me Oblus la a wo awaghrẽ ba Ahogbrẽ, ta la are la a nyum oshpa ba Eyesu Ekristi. Moa a sla me okyku o da me e yi e kpo e ghwo la moarehwĩ ba Ahogbrẽ a sla ibu obmi ba adlidzi mo, nga e sa e tsa adlidzi ba ozhẽ bi e sõ la onyenye.

²Esĩ ba onyenye he lo angyiŋ e wo okayiozhẽ ba esõ ba gbagbu-amo. Omba ba moa a kpo obiŋ hi a wo mbo, Ahogbrẽ la a la a sheŋ akpro mbo, a hwim baŋ á ba a shri edgu esõ he lo á shri á da gi.

³Nga, omba la o wo shasha lo angyiŋ a tsa areyaŋ a mbo alo ibu oshpa baŋ lo. Moa a shri oshpa he lo a da me, nga odaŋ ba Ahogbrẽ Areoshla bi angyiŋ o la o da me e su lo.

⁴Ame e ta Etitu akpa. Aŋa a wo anwye me ba adlidzi ibu ba obmi ba adlidzi ba agi e wo ma. Ahogbrẽ la a wo Adigi, ta la Ekristi Eyesu Areoshla bi, moa a shri okpoghwo ta la opyapyaŋ a shri a doŋ.

⁵Ame e dzu ŋo e zga obiŋ ba Ekreta okyku o doŋ o kpo otum la o ra, nga okyku o sla moandakʼpo Eklisiya ba oskuyaŋ a mbo. Ambo o kpo otum ta la onyenye me.

⁶Okyku eshi o dzu omgbybi ba andakʼpo Eklisiya a dzu are la a wo shasha, nga baŋ a wo are la a wo la ashe akyekyeŋ sha e ma. Nga o dzu omgbybi ba moanwye baŋ, moa a bmi ba adlidzi, nga moa a dzu moa la a gbu atuŋ okyku moa a wo wayawaya nga a shye eshri mbo.

⁷Otum ba Ahogbrẽ o wo abgo baŋ angyiŋ, okyku eka he lo o raŋ o gre baŋ a tspi shasha nga a dzu are la a shye eshri mbo, nga a kpo olom shoshoŋ mbo, nga a dzu are la a wa ami anab nzenze mbo. O raŋ o gre baŋ a wo are la esõ khakha mbo, nga a dzu are la a kpo oriayi mbo.

⁸O raŋ o gre baŋ a dzu are la a yga moazhẽ odne baŋ la anyu eŋo-eŋo nga a klo ekplo la e wo edzadzi. Aŋa a dzu are la a vu eŋa a ghwo, ta la are la a tspi kyekye, nga la a wo esesla, nga a nye eda.

⁹O raŋ o gre baŋ a kom oshpa lo abgo osheshye, oshpa la o dzu edgu oshpa ba moare a bmi ta la alo, nga ba alo o wo ozhẽ okyekyeŋ ta la onyenye he lo. Ozhẽ he lo angyiŋ, á ba a kpo á gbu baŋ á shĩ moahwõ ta la onyenye ba adlidzi, nga á kpo á gbu baŋ á tsa akpu ba moare la a tla onyenye ba adlidzi lo.

¹⁰Moare nzenze la a sla okro ayi a wo ma. Moa edgu he lo a la a bile moare la odlo ototno moa a la a lu. Onzenze eshki mo moa a wo moare la a kyu ozhẽ moaEyahuda abgo nga a ba a lu Ekristi ma.

¹¹O dzu omgbybi ba moa a tspi mo la edgu odlo he lo, okyku eshi moa a la a shoŋ moa-odne mvye egʼba la edgu onyenye la o wo ozhẽ mbo. Moa a la a kpo ekplo anzi he lo okyku o da mo a hwiŋ amgbaŋ.

¹²Arekyeŋ eshki moa la a sheŋ akpro ma Ahogbrẽ a hom mo otum, aŋa a wo a ba Ekreta. A lu mi le, Moarehwĩ ba obiŋ ba Ekreta a la a sheŋ akpro ombamba pyeŋ. Moa a wo edgu ébyi la e wo ebi, nga moa a la a kpo oreŋ nga a la a kpo ambyela.

¹³Ekplo ba alom he lo a lu e wo adlidzi angyiŋ. Okyku eka he, o shrom moare he lo o wlu ayi, okyku o da mo a tspi osheshye ibu ba obmi ba adlidzi mo.

¹⁴Nga okyku o da mo a kpo otum ta la enzho moaEyahuda nga a kpaŋ odaŋ moarehwĩ la a tla adlidzi lo nga mbo.

¹⁵Ekployaŋ a mbo e wo kye pa la moa la a wo kye. Ambo ekplokyeŋ e wo kye mbo pa la moa la a wo eshre nga moa a wo la obmi ba adlidzi mbo, okyku eshi aga mo ta la enzi ba esõ mo moa a sheŋ a tpi ayi.

¹⁶Moa a la a lu ma moa a yi Ahogbrẽ, ambo odzudzu mo lo o kpo evom odlo mo. Moa a bli la efpu esõ mo pa la moare, nga moa a la a tsi Ahogbrẽ a ghwo ayi mbo. Moa a ka a kpo ekplokyeŋ la e wo edzi a gbu mbo.