Read eggon Etitu 3 Bible Online

Etitu 3 - eggon bible

Etitu 3

¹Aŋo o dzu moarehwĩ boŋ okyku o da mo a ka moareŋ pa la moa la a ri ekʼpo la olbi, nga a fa olbi a da mo. Aŋo o dzu mo okyku o da mo a dzu a kʼpu okyku o kpo ekployaŋ a mbo la e wo edzi ombamba pyeŋ.

²O shĩ mo okyku o da mo a tsi etku arekyeŋ la onjygu mbo. O lu o da mo a dzu opyapyaŋ, nga a ri ekpom nga a ka areyaŋ a mbo la esõ ble-ble.

³Okyku eshi agi a mbo ayga, agi e wo la eda ma mbo. Agi e fa olbi e di mbo nga e kpo ayakplo ba ototno ayga. Agi e dzu moawaghrẽ ba ogroayi ta la oraŋ andandandim ba obiŋ hi. Ayga agi e tpi omba bi ayi nga e kpo efye nga e ta efpu. Moare a la a tla gi, agi a mbo e tla mo.

⁴Ambo omba ba agi e ka okpoghwo ta la oklo ba Ahogbrẽ Areoshla bi angyiŋ,

⁵aŋa a shla gi. A kpo eka he lo okyku otum odzi bi e kpo angyiŋ mbo, ambo a ka gi ayiekŋe angyiŋ, nga a shla gi okro ba Ogbgaodzi la o ba o ndza gi nga o bla gi o mbre nga o shri esõ elehe o da gi.

⁶Okyku eshi Ahogbrẽ a shri Ogbgaodzi nzenze a shri a da gi okro Eyesu Ekristi Areoshla bi,

⁷ozhẽ ba okpoghwo baŋ angyiŋ, onyuŋokpo o gre o ba agʼbaha bi ta la Ahogbrẽ. Okyku eka he nga agi e hwiŋ esõ ba gbagbu-amo ba agi e la e ka ayi ozhẽ okyku lo.

⁸Odlo he lo o wo adlidzi angyiŋ. Ame e klo boŋ o bla ayakplo he lo o shĩ adzadzi, okyku o da moa la a bmi ba adlidzi ta la Ahogbrẽ a shri aga mo a zga okyku o kpo ayakplo la a wo adzadzi. Ayakplo he lo a wo adzi nga á kpo á ghwo la moare.

⁹Ambo aŋo o ngʼba o sku oklaodlo ba ototno. Edgu odlo ba ototno lo angyiŋ o wo otsiashko ba moadigi ba ogbyigbyi, ta la okʼpiohwa, ta la oklaodaŋ. Edgu ayakplo he lo pyeŋ a wo a ba ototno angyiŋ.

¹⁰Engyi eha aŋo o shĩ are la a shri ogogʼba a shri a ba. Ambla he nga, aŋo o ngʼba o sku ŋa.

¹¹Okyku eshi aŋo o yi ba edgu are he lo a sheŋ a tpi ayi bgu. Odlobi baŋ a kpo lo nga, o tsa baŋ a kpo ayakplo ba ototno.

¹²Omba ba ame e hom Atema o mbo le Etikiku otum okro boŋ le, o zga gble o ba o ka me osku ba Enikapoli. Ame e zga esõ ba o dzu ahe lo omba ba afpe.

¹³O zga ayi ngre nga o kpo o ghwo la Ezena la a wo oloya, nga o kpo o ghwo la Apolo a mbo okyku o da mo a zga esĩ odzi. O shri ekployaŋ a mbo ba moa a wo la alo ma mbo o shri o da mo.

¹⁴O nye moarehwĩ bi okyku o da mo a shri aga mo a zga okyku o kpo ayakplo la a wo adzi, okyku o da mo a kpo a ghwo la moare nga okyku o da mo a dzu ototno mbo.

¹⁵Moare la a wo pa la me pyeŋ moa a shko ŋo. Aŋo o shko moakyegiazba la a wo la obmi ba adlidzi ma okyku gi. Okpoghwo ba Ahogbrẽ o dzu ka la gimi pyeŋ.