Read eggon Efilimo 1 Bible Online

Efilimo 1 - eggon bible

Efilimo 1

¹Akpa he lo a zgi abgo me Oblus ba moa a vu a ta aku okyku Ekristi Eyesu, alo a zgi abgo ba anigi Etimoti bubgu. Agi e ta lo e kom ŋo akyegiazba Efilimo la a kpo otum ka la gi otsotse,

²ta la eshki ba Ahogbrẽ la e shki odne boŋ, ta la anigi-alashle Afiya, ta la Akibu are la a nyum oshpa ka la gi.

³Ahogbrẽ Adigi, ta la Adigi-odne Eyesu Ekristi a shri okpoghwo ta la opyapyaŋ a shri a da gimi.

⁴Aŋo Efilimo, anime, ame e fa olu e tne aga boŋ ombamba pyeŋ. Ame e tsi etku boŋ nga e vye la Ahogbrẽ me.

⁵Okyku eshi ame e gno eka boŋ o klo moarehwĩ pyeŋ la a lu Ahogbrẽ ma, nga ame e gno eka boŋ o bmi ba adlidzi ta la Adigi-odne Eyesu.

⁶Ame e fa olu okyku o da ekpom bi la e bmi ba adlidzi e ta okaobmye ma o ta-ta eshri owlamayaŋ a mbo ba agi e wo la alo ma ibu odzudzu bi okro ba Ekristi.

⁷Aŋo anime ba ame e klo ŋo, okyku oklo boŋ angyiŋ ame e hwiŋ ovye nzenze, nga ame e hwiŋ oshye-esõ e ta ma-ma! Okyku eshi aŋo angyiŋ o gbu moare pyeŋ la a lu Ahogbrẽ ma esõ obiŋ.

⁸Okyku eka he nga, ame e kpo e gbu ba ame e ghwo esõ e jygu ŋo odaŋ okyku o doŋ o kpo eka he lo, okyku ba ame e wo anóŋ eshko ba Ekristi.

⁹Ambo ekakahelo oklo me okyku ŋo angyiŋ o da me e vẽ ŋo eka he lo. Ame e wo Oblus, are ba Ekristi Eyesu a hom ŋa otum, nga ohuhuhi ame e wo oprusuna okyku eshko ba Ekristi.

¹⁰Okyku eka he ame e vẽ ŋo okyku Onesimu. Aŋa a wo anwye me angyiŋ eshko ba Ekristi. Okyku eshi, omba ba ame e wo aku ame e dzu adaŋ ozhẽ ba obmi ba adlidzi he lo.

¹¹Omba la o bre o gre he aŋa a wo la owlama ka la ŋo mbo ku-ku. Ambo ame e ka ŋa a wo la owlama okyku ŋo pa la me ohuhuhi.

¹²Ohuhuhi nga, ame e daŋ a bla a ba okro boŋ. Esõ me nga e wo otsotse ka la ŋa.

¹³Ame e mbi e klo baŋ a dzu ahe pa la me omba ba ame e wo aku okyku o nyum oshpa lo, okyku eshi aŋa á nyiŋ otum boŋ o la o kpo, á sko á kpo.

¹⁴Ambo ame e klo o vu ŋo omgbybi okyku o kpo o ghwo la me mbo, okyku eshi ame e klo boŋ o kpo ekplo la e raŋ ŋo esõ angyiŋ. Ame e ka é kpo ekplokyeŋ mbo, o wo le aŋo o bmi ayga dne.

¹⁵O dzu mbo Onesimu a kso a sku ŋo okyku omba ple nga okyku o daŋ a ba a dga ekpyemgbyeŋ a mo.

¹⁶Okyku eshi, ohuhuhi aŋa a wo awaghrẽ sha angyiŋ mbo, ambo aŋa a gre awaghrẽ. A wo anigi angyiŋ okŋeobga ba Ekristi. Ame e ka ŋa la owlama nzenze! Aŋa á wo la owlama ka la ŋo á gre me a mbo nganga. A wo awaghrẽ nga a sa a wo anigi okŋeobga ba Adigi-odne!

¹⁷Okyku eka he, o wo boŋ o sko me o zga eka ba arehwĩ boŋ le, aŋo o yga ŋa la obamo eka boŋ o yga me angyiŋ.

¹⁸O wo baŋ a kpo ŋo ekplokyeŋ la e wo ebi, o mbo le o wo baŋ a ri ŋo okŋe le, aŋo o ta lo o zga ma ba ame é ba e hre lo.

¹⁹Okro he lo, ame é ta lo ababgo me. Ame Oblus ame é hre ŋo alo. O wo akplokyeŋ ba ame e dzũ ŋo ba oshye boŋ pyeŋ o wo pa la me angyiŋ mbo.

²⁰Okyku eka he, aŋo anime, o wo boŋ o bmi le, o kpo o ghwo la me ozhẽ he lo okyku Adigi-odne. Aŋo anime okŋeobga ba Ekristi, aŋo o da esõ e gbu me obiŋ!

²¹Ame e yi zhezheŋ boŋ ó kpo ekplo ba ame e vẽ ŋo he lo. Ame e yi boŋ ó kpo ekplo la e gre ehi lo a mbo.

²²Ambla he nga aŋo o klo aku o zga ma okyku me, okyku eshi ame e ka ayi ozhẽ ba Ahogbrẽ á ba a gno olu bimi nga baŋ á ba a hwile ozhẽ okyku o da me e bmre e ba okro bimi.

²³Moa a vu Ebafara a ta aku pa la me okyku Ekristi Eyesu. Aŋa a shko ŋo.

²⁴Moa la a kpo otum pa la me otsotse moa a ri Amarku, ta la Aristaku, ta la Edema, ta la Oluka. Moa pyeŋ a shko ŋo.

²⁵Okpoghwo ba Adigi-odne Eyesu Ekristi o dzu ka la gimi pyeŋ.