Read eggon MoaIbrani 1 Bible Online

MoaIbrani 1 - eggon bible

MoaIbrani 1

¹Ayga Ahogbrẽ a da moarehwĩ baŋ a hom mo otum a lu odlo pa la moadigi engyi oshushku ezhẽ andandandim.

²Ambo omba ba amom-abgo ekpyemgbyeŋ he, a lu odlo ka la gi ozhẽ ba Anwye baŋ. Ahogbrẽ a daŋ a dzu are la a wo la ekployaŋ a mbo ma. Nga okro ba Anwye baŋ he lo angyiŋ aŋa a kpo obiŋ hi pyeŋ.

³Anwye Ahogbrẽ he lo a la a shka ayi ayimom esesla ba Ahogbrẽ. Aŋa a ghwo emle ba Ahogbrẽ a gre eshri. Nga a la a kom obiŋ hi abgo la odlo baŋ la o wo la ekʼpo ma. Ambla baŋ a ndza odlobi moarehwĩ a khwo, aŋa a dzu Ongyeŋ obgori ba Ahogbrẽ la a wo la Anyuŋ Ekʼpo ma.

⁴Moa a da ekʼpo ba Anwye lo e gre ekʼpo moanwyeadga eka ba eshko ba Ahogbrẽ a shri a daŋ a mbo e gre eshko mo.

⁵Okyku eshi Ahogbrẽ a lu edgu odlo he lo pa la moanwyeadga baŋ ondakyeŋ a ka mbo. Edgu odlo lo o lu, Aŋo angyiŋ o wo Anwye me. Anye angyiŋ ame e dzu Adoŋ. Ahogbrẽ nga a sa a lu odlo he ta la anwyeadgakyeŋ ondakyeŋ mbo. Edgu odlo lo o lu, Ame é dzu Adaŋ, Aŋa nga á dzu Anwye me.

⁶Nga omba ba Ahogbrẽ a klo o da Anwye ori baŋ a ba obiŋ hi, aŋa a sa a lu mi le, O dzu omgbybi ba moanwyeadga ba Ahogbrẽ pyeŋ a hlu ŋa eshko.

⁷Ahogbrẽ a lu odlo eshri moanwyeadga a lu mi le, Ahogbrẽ a da moanwyeadga baŋ a zhiŋ a dzu egbga, Nga a da moanwye-odne baŋ a zhiŋ a dzu embyli ovo.

⁸Ahogbrẽ a lu odlo eshri Anwye lo a lu mi le, Aŋo Ahogbrẽ, emgbakyiŋ oreŋ boŋ é dzu ma gbagbu-amo! Nga la adlidzi angyiŋ aŋo o la o ri ekʼpo oreŋ boŋ.

⁹Aŋo o la o klo ekployaŋ a mbo la e wo shasha nga aŋo o la o tla ekployaŋ a mbo la e wo odlobi. Okyku ohe lo angyiŋ Ahogbrẽ la a wo Ahogbrẽ boŋ a sla ŋo, Nga a shri ovye ba ekʼpo la e gre pyeŋ, a shri a doŋ. Ekʼpo boŋ e gre e baŋ a shri a da moa la a kpo otum ka la ŋo.

¹⁰A sa a lu mi le, Okũ oriori, aŋo Adigi-odne angyiŋ o kpo obiŋ hi, Nga la abgo boŋ angyiŋ, aŋo o kpo ongyeŋ pyeŋ.

¹¹Moa á khwo pyeŋ, ambo aŋo ó ra ó dzu ma. Moa á tsoŋ eka aknye.

¹²Nga aŋo ó gbmi mo eka moa a gbmi akyli angyiŋ, Nga moa á nyiŋ mo eka ba moa a nyiŋ aknye. Ambo aŋo ó dzu okyekyeŋ, aŋo ó tsoŋ ku-ku mbo gbagbu-amo.

¹³Ahogbrẽ a lu edgu odlo he pa la moanwyeadga baŋ ondakyeŋ a ka mbo. Edgu odlo lo o lu, Aŋo o dzu obgori me, O tsa ba ame e da moafpu ŋo Á ba a tsi á gbu egi ayi boŋ.

¹⁴Moanwyeadga lo a wo eshi angyiŋ? Moa pyeŋ, moa a wo egbga la e la e hlu Ahogbrẽ eshko angyiŋ. Ahogbrẽ nga a la a hom mo otum okro moarehwĩ la á ba a hwiŋ oshla, okyku o da mo a kpo a ghwo la mo.