Read eggon MoaIbrani 10 Bible Online

MoaIbrani 10 - eggon bible

MoaIbrani 10

¹Odaŋ moaEyahuda o wo emle ba adlidzi ba ayakplo ba adlidzi angyiŋ mbo. Alo o zgi ayakplo adzi la á ba a ba sha angyiŋ. Edgu oshriondba he lo moa a la a shri lo a shri a di eyiyaŋ a mbo. Odaŋ lo nga o kpo anyu ó ba o da moarehwĩ la a ba okro ba Ahogbrẽ á bli shasha ozhẽ ba oshriondba he lo?

²O wo ba moa a ndza odlobi ba moarehwĩ la a lu Ahogbrẽ la adlidzi angyiŋ le, olbi ba odlobi ó ra esõ mo ku-ku nga mbo. Okyku eka he, moa á kyu oshriondba pyeŋ abgo.

³Eka ba alo o wo, ekayaŋ a mbo, moa a la a shri oshriondba a shri a di okyku o da moare a tne aga ba odlobi mo eyiyaŋ a mbo.

⁴Okyku eshi amanzhli ba ándu-alalom ta la ébme a kpo a gbu ba alo a sko odlobi moare a sku mo mbo.

⁵Okyku okũ he lo, omba ba Ekristi a wo osusku ba o ba obiŋ hi le, a nyuŋ Ahogbrẽ a lu mi le, Aŋo o klo oshriondba ta la ofaodi ba ébyi mbo, Ambo aŋo o nyuŋ egʼba o kpo okyku me.

⁶Aŋo o la o gno oraŋ ta la ébyi ba moa a kpoŋ lo ovo pyeŋ ambgu lo mbo. Aŋo o la o gno oraŋ ta la oshriondba la o wo okyku o sko odlobi moare mbo.

⁷Okyku okũ he lo nga ame e lu mi le, Ahogbrẽ, o ka, ame e wo ahe, Okyku o kpo ekplo boŋ o klo ba ame e kpo, Eka ba moa a ta odlo akpa ba odaŋ eshri me.

⁸Oriori a lu mi le, Aŋo o klo, o mbo le aŋo o la o gno oraŋ ta la oshriondba, ta la ofaodi ba ébyi mbo. Nga o la o gno oraŋ ta la ofaodi ba ébyi ba moa a kpoŋ lo ovo ambgu, ta la oshriondba ba moa a shri a di okyku o da lo a sko odlobi moare mbo. Oshriondba he lo moa a la a shri lo a di ozhẽ ba odaŋ angyiŋ, ambo ekakahelo a lu eka he lo.

⁹Ambla he nga a lu mi le, Ahogbrẽ o ka, ame e wo ahe okyku o kpo ekplo boŋ o klo ba ame e kpo angyiŋ. Okyku okũ he lo angyiŋ, Ahogbrẽ a kypi edgu oshriondba la o wo ogbyi nga a shri oshriondba ba Ekristi a di eshri oshriondba la o gbyi moa a la a shri a ndba.

¹⁰Okyku ba Eyesu Ekristi a kpo ekplo ba Ahogbrẽ a klo baŋ a kpo lo angyiŋ moa a ndza odlobi bi pyeŋ ibu ba egʼba baŋ baŋ a shri a ndba odgo okyekyeŋ nga o khwo.

¹¹Areyaŋ a mbo ba Esrayila la a wo andakʼpo olu ba Ahogbrẽ a la a tspi nga a kpo otum baŋ elulum, nga a la a shri edgu oshriondba okyekyeŋ a shri a di engyi oshushku. Ambo oshriondba he lo o kpo o gbu ba alo o sko odlobi moare o sku mo mbo ku-ku.

¹²Ambo Ekristi nga a shri oshriondba a shri a di odgo okyekyeŋ angyiŋ okyku odlobi moare. Oshye ba oshriondba he lo ó tspi gbagbu-amo. Ambla he nga aŋa a yi a dzu obgori ba Ahogbrẽ.

¹³Ahe lo nga, a la a dzu a bli omba ba Ahogbrẽ á da moafpu ŋa á tsu á gbu egi ayi baŋ.

¹⁴Moa la moa a ndza odlobi mo, Eyesu a da mo a bli zhezheŋ ozhẽ oshriondba okyekyeŋ gbagbu-amo.

¹⁵Ogbgaodzi a mbo o la o zgi egŋe egi ayi bi. Oriori a lu mi le,

¹⁶Ame é hwim eka he angyiŋ pa la mo. Adigi-odne a lu mi le, Ambla ba elum he lo, Ame é shri odaŋ me é ghwo mo esõ. Nga ame é ta lo aga esõ mo.

¹⁷Ambla he nga a lu mi le, Ame é tne aga eshri ba odlobi mo ta la ayakplobi ba moa a la a kpo nga mbo ku-ku.

¹⁸Okyku eka he, eka ba moa a sheŋ a kyu mo abgo odlobi mo, oshriondba okyku o sko odlobi moare o wo otum ba ototno angyiŋ a mo. Agimi e da gi e ba osusku ta la Ahogbrẽ

¹⁹Agimi anáŋ, agi e wo ozhẽ la o wo zheŋ okyku o yi Enjygu ba Esesla Nzenze ibu ba eku ba Eyesu.

²⁰Aŋa a hwile gi ozhẽ la o wo ohe. Ozhẽ he lo o wo ozhẽ ba esõ. Alo o sõ ashye oknye lo. Ashye oknye he lo angyiŋ a wo egʼba baŋ.

²¹Agi e wo la anyuŋ-andakʼpo olu ba Ahogbrẽ la a la a kʼpu odne ba Ahogbrẽ ma.

²²Agimi e da gi e ba osusku ta la Ahogbrẽ la esõ ekyekyeŋ, la obmi ba adlidzi la ofueha mbo, nga la esõ moa a ndza lo ibu enzi eyi-esõ la o lbi ba odlobi, nga la egʼba ba moa a ndza lo la amihĩ la a wo leleleŋ.

²³Agimi e da gi e la e kom okayiozhẽ ba agi e la e su osheshye. Okyku eshi agi e bmi ba adlidzi ta la Ahogbrẽ baŋ á bli ohwihwim baŋ lo.

²⁴O raŋ o gre ba agi e nyuŋ egi e ka, nga e kpo e ghwo la egi okyku o da gi e klo egi nga e kpo ayakplo la a raŋ a gre ta la egi.

²⁵E kyu o shki eshki otsotse ta la egi abgo mbo ku-ku eka ba moakyeŋ a la a kyu lo abgo. Ambo o raŋ o gre ba agi e la e shĩ egi angyiŋ okyku eshi agimi e ka e bmye eka ba olum Onda ba Adigi-odne o la o gbogbogbga o wo osusku a mo.

²⁶Oshriondbakyeŋ la o sko odlobi moare o wo ma nga mbo, o wo ba agi e la e bre ayi e kpo odlobi ambla ba agi e sheŋ e yi adlidzi lo.

²⁷Ambo ekplo la e ra nga, agimi e kpo eyli okyku ombgu ta la aŋaŋa ovo moa á ba a jygi moare la a tla Ahogbrẽ la alo!

²⁸Moa a la a ka arekyeŋ ayiekŋe mbo o wo baŋ a pre odaŋ ba Omusa. Moa a la a kpo otum ta la egŋe eha o mbo le egŋe etra okyku o sõ areyaŋ a mbo la a pre odaŋ lo ombgu ba eku.

²⁹Moa á kpo eshi ta la are la a dzĩ Anwye Ahogbrẽ? Moa á kpo eshi ta la are la a sko amanzhli ba ohwihwim ba Ahogbrẽ a zga akplokyeŋ ba esesla mbo? O ka, amanzhli he lo angyiŋ a ndza ŋa a daŋ a dzu pse. Are la a dzĩ Ogbgaodzi la o kpo o ghwo, moa á kpo ŋa eshi? Agimi e tne aga edgu anyuŋ ewu baŋ á kpo e ka!

³⁰Agi nga e yi are la a lu mi le, Ame é bla are lo é kpo ma. Ame é bla é hre ŋa ma. Aŋa a sa a lu mi le, Adigi-odne á sõ moarehwĩ baŋ ombgu.

³¹Alo o wo ekplo ba eyli angyiŋ ba are a gbu ombgu ta la Ahogbrẽ la a wo la esõ ma!

³²Agimi e ka eka ba ayakplo a wo ka la gimi ayga. Omba mi lo, ambla ba ayimom ba Ahogbrẽ a tra gimi, agimi e kpo ewu okyku ayakplo nzenze. Ambo ewu he lo e da gimi e tsi e gbu mbo ku-ku.

³³Ombabze moa a la a dzĩ gimi egi ayi ba moare nga moa a kpo gimi ewu. Nga ombabze agimi e zga esõ ba o yi o pu pa la moarehwĩ ba moa a la a kpo mo eka he lo.

³⁴Agimi e kpo ewu eka moa-oprusuna. Nga omba ba moa a ngʼga gimi anzho a mbo agimi e ghwo egimi esõ nga e dzu la esõ ekyle. Okyku eshi agimi e yi e wo la ayakplo la a wo owlama a gre mi ma. Ayakplo he lo á dzu ma gbagbu-amo.

³⁵Agimi e da egʼba e shki gimi ami mbo. Okyku eshi ambla, agimi é hwiŋ anyuŋ egbre angyiŋ.

³⁶O raŋ o gre ba agimi e kpo heheŋ okyku o da gimi e kpo ekplo ba Ahogbrẽ a klo, okyku o da gimi e hwiŋ ekplo baŋ a hwim ka la gimi.

³⁷Okyku eshi odlo ba Ahogbrẽ o lu mi le, Ambla fi nga, Are la á ba lo, á ba. Aŋa á ngli tsi mbo.

³⁸Moarehwĩ me ba odlodzi moa á bmi ba adlidzi nga moa á hwiŋ esõ. Ambo o wo ba arekyeŋ eshki mo a sa okũ a gre ambla le, ame é gno oraŋ ka la ŋa mbo.

³⁹Agi e wo edgu moarehwĩ la a la a bla a yi ambla nga a la a tpi ayi angyiŋ mbo. Ambo agi e wo la obmi ba adlidzi angyiŋ ma, nga agi e hwiŋ oshla okyku lo angyiŋ.