Read eggon MoaIbrani 12 Bible Online

MoaIbrani 12 - eggon bible

MoaIbrani 12

¹Agi nga e wo la moaegŋe nzenze la a ta gi a kpaŋ. Agi nga e se ekployaŋ a mbo la e la e bme gi egŋe ozhẽ ta la odlobi la o la o ri gi egʼba, nga agi e knye oŋe la o wo egi ayi bi la esõ ekyekyeŋ.

²Agi e tslo ayi bi e shki Eyesu sha. Obmi ba adlidzi bi o wo okro baŋ sha angyiŋ, a zga okũ lo a yi a fu okro lo. Aŋa a da esõ baŋ e zgi okyku egŋe aki lo mbo! Ambo a sheŋ a yi edgu ovye la o dzu o bli ŋa. Okyku eka he, a tne aga akplokyeŋ eshri anzi la o wo ibu eku ba egŋe aki ku-ku mbo. Ohuhuhi nga a dzu obgori ba emgbakyiŋ oreŋ ba Ahogbrẽ angyiŋ.

³Agimi e tne aga ewu baŋ a kpo, eka baŋ a ta esõ akpyli omba ba moarehwĩ ba odlobi moa a tla ŋa la ofpu nzenze! Okyku eka he nga, agimi e da egʼba e shki gimi ami nga e ndba ozhẽ he lo e ta mbo.

⁴Okyku eshi eka ba agimi e la e ta eko ta la odlobi, agimi e ta eko lo e gbu ibu eku a wo mbo.

⁵Agimi e gre esõ e ghre odlo ba Ahogbrẽ la o shĩ gimi, baŋ a lu ka la gimi eka moanwye baŋ? A lu mi le, Aŋo anwye me, o ngli atuŋ o gno omba ba Adigi-odne a la a nye ŋo. O da egʼba e shki ŋo ami omba baŋ a la a shrom ŋo mbo.

⁶Okyku eshi Ahogbrẽ a la a nye areyaŋ a mbo baŋ a klo ŋa, Nga a la a yla areyaŋ a mbo baŋ a klo ŋa andzu eka ba anwye baŋ.

⁷Agimi e ghwo esõ ta la onyenye ba ada nga e sko lo e zga akplokyeŋ abi mbo, okyku eshi ewu bimi e la e kpo pyeŋ e tsa eka ba Ahogbrẽ a sko gimi a zga moanwye baŋ angyiŋ. Anwye ba adaŋ a nye ŋa ondakyeŋ mbo a wo ma?

⁸O wo baŋ a nye gimi otsotse pa la moanwye baŋ mbo le, alo o dzu eka ba agimi e wo moanwye baŋ ba adlidzi angyiŋ mbo. O dzu eka ba agimi e wo moanwye ba ekpa angyiŋ.

⁹Moadigi ba egʼba moa a la a nye gi, ambo agi e la e fa olbi e da mo o di-di lo. O raŋ o gre ba agi e bmi e da Adigi ba ayaŋ bi e gre eka he nzenze okyku o da gi e hwiŋ esõ!

¹⁰Moadigi ba egʼba moa a nye gi okyku omba ple, eka ba ekplo ba moa a klo. Ambo Ahogbrẽ a la a kpo okyku o da gi angyiŋ e hwiŋ owlama eshri lo, nga okyku o da gi e pu esesla baŋ ka la ŋa.

¹¹Omba ba moa a la a nye gi omba he lo o dzu ekplo ba esõ-etpiayi angyiŋ okro bi, o dzu ekplo ba ovye angyiŋ mbo. Ambla fi nga moare á tspi kyekye okyku onyenye he lo, moa á yla egbre ba opyapyaŋ ba odzudzu ba odlodzi.

¹²Agimi e si awanzha abgo bimi, nga e ygi erim bimi la a wo oshye mbo!

¹³E zga gble e la e dzi ezhẽ la e wo tsoŋ, okyku o tpi odga la o wo oshye mbo ayi mbo, ambo okyku o shri oshye angyiŋ o shri o da lo.

¹⁴E zga ngre okyku o da opyapyaŋ o dzu agʼbaha bimi pa la moarehwĩ pyeŋ. Nga e zga ngre okyku o da gimi e dzu la odzudzu la o wo la esesla, okyku eshi arekyeŋ la a wo la odzudzu esesla he lo mbo, á ka Adigi-odne mbo ku-ku.

¹⁵Agimi e nyuŋ e kpo-kpo okyku o da arekyeŋ eshki bimi a zhiŋ ogbu o blu okpoghwo ba Ahogbrẽ mbo. E nyuŋ e kpo-kpo okyku o da arekyeŋ eshki bimi a hlu eka esĩ aki la e no, nga a la a kpo areyaŋ a mbo ewu la ekpre baŋ he lo mbo.

¹⁶Agimi e nyuŋ e kpo-kpo okyku o da arekyeŋ eshki bimi a zhiŋ a dzu arehwĩ ba eshre ta la arehwĩ la a dzu areabi la a tla Ahogbrẽ eka ba Esuwa mbo. Aŋa okyku atku ba ehrẽ, a shri ekʼpo baŋ ba andakʼpo a shri a gbmo.

¹⁷Ambla he lo angyiŋ, eka ba agimi e sheŋ e yi, a sa a klo o hwiŋ anyuadzi ba adaŋ. Ambo moa a tla ŋa okyku eshi ozhẽ ba o nyiŋ ekplo baŋ a sheŋ a kpo o wo ma ku-ku nga mbo. Ambo aŋa a klo ozhẽ lo la amanyi ayi ambla.

¹⁸Agimi e ba eka moarehwĩ ba Esrayila a ba okro ekplo ba moa a tka lo a gbu eka ba ovo la o shum ogregregre Aku ba Esinayi mbo. Nga evbu ta la ehwĩ, ta la ogbga-ogbu,

¹⁹ta la akyuŋ ba angzo, ta la akyuŋ ba enzi a wo ma. Omba ba moarehwĩ a gno enzi lo, moa a vẽ ma moa a klo o gno odlokyeŋ nga mbo.

²⁰Okyku eshi alo o wo mo ewu ba moa a kpaŋ odaŋ la o lu mi le, Moa a tra ebyi a mbo la e tka aku lo la ézhim a daŋ a kpu.

²¹Okro lo pyeŋ o zhiŋ o dzu ekro ba eyli o gre eshri, okyku eka he Omusa a lu mi le, Egʼba e zhga me ara nga eyli e kpo me!

²²Ambo agimi e ba Aku ba Ezayoŋ, osku ba Ahogbrẽ la a wo la esõ ma angyiŋ. Osku he lo angyiŋ o wo Orushalima la o wo Ongyeŋ. Moanwyeadga nzenze angyiŋ a wo ma.

²³Agimi e ba eshki la e wo la ovye ma angyiŋ. Eshki he lo e wo moanwye andakʼpo ba Ahogbrẽ. Moa a ta ashko mo akpa la a wo Ongyeŋ. Agimi e ba okro ba Ahogbrẽ la a wo are la a sõ moarehwĩ pyeŋ ombgu. Nga agimi e ba eshki esõ ba moarehwĩ pyeŋ ba odlodzi la a sheŋ a bli zhezheŋ.

²⁴Agimi e sheŋ e ba okro ba Eyesu. Aŋa angyiŋ a kpo ohwihwim olehe he lo. Nga agimi e ba okro ba moa a shri amanzhli a shri a hre ma. Alo a tsa gi ayakplo la a wo adzadzi a gre ayakplo ba amanzhli ba Ahabila a tsa.

²⁵Agimi e nyuŋ e kpo-kpo nga e tla o ngli atuŋ o gno odlo baŋ a la a lu mbo. Okyku eshi moarehwĩ la a tla o ngli atuŋ o gno odlo ba Ahogbrẽ ba arekyeŋ a la a lu obiŋ hi, moa a gro mbo ku-ku. Nga o wo ba agi e tla odlo ba are la a dzu Ongyeŋ a la a lu he, agi e ka é ra abgo é gro mbo ku-ku!

²⁶Omba la o bre o gre mi, enzi baŋ e da obiŋ o suŋ. Ambo ohuhuhi a hwim a lu mi le, Ame é sa é da obiŋ sha ó ba o suŋ ohuhuhi mbo, ambo ame é da Ongyeŋ a mbo o suŋ.

²⁷Amgboŋ odlo la a lu mi le, Ẽ sa, a tsa zhezheŋ ba anzho ba moa a kpo lo moa á ba a suŋ lo nga ba moa á ba a gʼbu lo, okyku o da anzho la a ka a suŋ mbo, a ra a shki ma.

²⁸Agimi e da gi e kpo ovye okyku eshi agi e hwiŋ oreŋ ba moa a suŋ lo a gbu mbo ku-ku. Agimi e da gi e vye nga e hlu Ahogbrẽ eshko ozhẽ baŋ á ba a gno oraŋ, la olbi ta la eyli,

²⁹okyku eshi, adlidzi angyiŋ Ahogbrẽ bi a wo ovo la o la o kpo o gbu baŋ a jygi ayakplo pyeŋ.