Read eggon MoaIbrani 13 Bible Online

MoaIbrani 13 - eggon bible

MoaIbrani 13

¹O raŋ o gre ba agimi e klo egimi eka moanáŋ eshko ba Ekristi.

²Agimi e yga moazhẽ adne bimi. Moakyeŋ a la a yga moazhẽ eka he lo nga moa a yga moanwyeadga ba Ahogbrẽ la efĩ.

³Agimi e tne aga ba moare ba moa a shri mo a ta aku, eka ba agimi e wo aku pa la mo. Agimi e tne aga ba moare la a la a kpo ewu eka ba agimi e la e kpo ewu lo pa la mo.

⁴Areyaŋ a mbo a ka eble la ololbi. O dzu omgbybi ba moarealom pa la moashe, moa a kpo adlidzi ta la emo, okyku eshi Ahogbrẽ á sõ moa la a wo eshre pa la moa la a ta ekpa ombgu.

⁵Agimi e da oklo ba amgbaŋ o kpo ekʼpo ka la gimi mbo. Ambo agimi e la e kpo oheheŋ ta la ekplo ba agimi e wo la alo ma. Okyku eshi Ahogbrẽ a lu mi le, Ame é dzu gimi é zga ku-ku mbo nga ame é ndba gimi é ta ku-ku mbo.

⁶E da gi e dzu la oshye-esõ nga e lu mi le, Adigi-odne angyiŋ a wo are la a kpo a ghwo la me. Ame é kpo eyli mbo ku-ku! Arehwĩ á kpo me akplokyeŋ a gbu?

⁷E dzu moandakʼpo bimi ba ayga la a lu odlo ba Ahogbrẽ a ygi gimi. Agimi e tne aga adzadzi e ka, eka ba moa a la a dzu nga a kpu. Agimi nga e la e mbili obmi ba adlidzi moahi lo.

⁸Ore ta la anye, ta la akyi, ta la gbagbu-amo, Eyesu Ekristi á nyiŋ ku-ku mbo.

⁹Agimi e da edgu onyenyekyeŋ la o wo ondundum o sko gimi o sku ozhẽ ba adlidzi lo mbo. O wo odzi ba esõ bi e hwiŋ oshye okro ba okpoghwo ba Ahogbrẽ. O wo ozhẽ ba okpaŋ odaŋ ba algo angyiŋ mbo. Moa la a la a kpaŋ edgu odaŋ he lo, moa a hwiŋ owlama akplokyeŋ ba alo mbo ku-ku.

¹⁰Moandakʼpo olu ba Ahogbrẽ la a la a shri oshriondba a shri a di abro ba moaEyahuda, moa a wo la ekʼpo ma ba moa a fa ebyi la e wo ambgu bi lo a taŋ mbo.

¹¹Anyuŋ-andakʼpo olu ba Eyahuda lo a la a shri amanzhli ba ébyi lo a la a shri a yi Enjygu ba Esesla Nzenze lo, okyku o da lo a dzu oshriondba ba odlobi, ambo moa a la a kpoŋ egʼba ébyi lo ovo alidzi la apu lo.

¹²Okyku okũ he lo, Eyesu a mbo a kpu alidzi la ayizhẽ ba osku lo okyku o daŋ a ndza odlobi moare la amanzhli baŋ a sku mo.

¹³Agimi e da gi e zgi e yi alidzi la apu lo nga e kpo ewu ka la ŋa otsotse.

¹⁴Okyku eshi osku ba gbagbu-amo o wo ma obiŋ hi okyku gi mbo, agi e la e ka ayi ozhẽ okyku osku la ó ba o ba.

¹⁵Okyku eka he, o raŋ o gre ba agi e da ohlueshko o dzu oshriondba bi okyku o ndba Ahogbrẽ ombamba pyeŋ okro ba Eyesu. Alo o dzu, agi e la e vye la ŋa ombamba pyeŋ la enzi bi.

¹⁶Agimi e dzu ayakplo la a wo adzi e zga mbo, nga e tla e la e kpo e ghwo egimi mbo. Ahe lo angyiŋ a wo oshriondba la o raŋ Ahogbrẽ esõ.

¹⁷O raŋ o gre ba agimi e ka moandakʼpo la olbi nga e kpaŋ odlo mo. Moa a la a kpaŋ esõ bimi a la a dzu a dum mbo, okyku eshi o dzu mo omgbybi ba moa á ba a shri etsko otum mo á ba a shri á da Ahogbrẽ. O wo ba agimi e la e fa olbi e da mo le, moa á kpo otum mo la esõ ekyle. O wo eka he mbo le, moa á kpo lo la esõ ebili. Nga alo ó kpo ó ghwo la gimi mbo.

¹⁸Agimi e fa olu okyku gi ombamba pyeŋ. Agi e yi zhezheŋ ba agi e wo la enzi esõ la e wo pyapyaŋ egi ayi ba Ahogbrẽ, okyku eshi agi e la e klo o kpo ayakplo la a wo shasha angyiŋ ombamba pyeŋ.

¹⁹Ame nga e la e vẽ gimi nganga, okyku o da gimi e fa olu okyku me, okyku o da Ahogbrẽ a da me e ba okro bimi oshoshoŋ.

²⁰Ahogbrẽ a kso Adigi-odne Eyesu eku. Aŋa angyiŋ a wo Anyuŋ Are la a kpaŋ ékylu okyku eku baŋ a kpu. Ibu eku lo angyiŋ moa a klu ohwihwim ba gbagbu-amo.

²¹Aŋa nga la a wo Ahogbrẽ ba opyapyaŋ, o wo baŋ a bmi le, a shri ekployaŋ a mbo la e wo edzi ba agimi e wo la alo ma mbo a shri a da gimi, okyku o da gimi e kpo ayakplo baŋ a klo. Aŋa nga, okro ba Eyesu Ekristi, aŋa a kpo esõ bi ekplo la e raŋ ŋa esõ. Nga ekekʼpo e dzu e ba Ekristi gbagbu gbagbu-amo! Amin.

²²Ame e vẽ gimi anáŋ, okyku o da gimi e ngli atuŋ e gno oshpa ba oshye-esõ he lo esõ heheŋ. Okyku eshi akpa ba ame e ta gimi he lo a ka a dzõ nzenze mbo.

²³Ambo ame e klo ba gimi e yi ba moa a se anigi Etimoti a sku aku bgu. O wo baŋ a ba oshoshoŋ angyiŋ le, ame é daŋ á ba pa la me omba ba ame é ba e ba okro bimi.

²⁴Agimi e shri oshko bi e shri e da moandakʼpo bimi pyeŋ pa la moarehwĩ ba Ahogbrẽ pyeŋ. Moanáŋ la a wo Etali, moa a shko gimi.

²⁵Okpoghwo ba Ahogbrẽ o dzu ka la gimi pyeŋ.