Read eggon MoaIbrani 7 Bible Online

MoaIbrani 7 - eggon bible

MoaIbrani 7

¹Amalkizedeki angyiŋ a wo anyuŋ-areŋ ba Esalem, nga a wo andakʼpo olu ba Ahogbrẽ la a wo la ekʼpo ma pyeŋ. Omba ba Ebrahim a zgi eko a ba omba baŋ a bga moanyuŋ-areŋ lo okro ba eko he lo, omba he lo nga Amalkizedeki a hwiŋ ŋa ozhẽ nga a fa anyuadzi a daŋ.

²Ebrahim nga a fa ogʼba okyeŋ eshki egʼba okʼpo ba ekployaŋ a mbo baŋ a wo la alo ma a shri a da Amalkizedeki. Okũ ba oriori ba eshko ba Amalkizedeki o wo, Anyuŋ-areŋ ba Odlodzi. Okyku baŋ a sa a wo anyuŋ-areŋ ba Esalem, okũ ba eshko he lo angyiŋ e wo, Anyuŋ-areŋ ba Opyapyaŋ.

³Oshpa ba akplokyeŋ eshri ba adaŋ ta la anaŋ o wo ma mbo. Oshpa ba moadaŋ ba oriori a mbo o wo ma mbo. Nga oshpa ba moa a mbre ŋa ta la oshpa baŋ a kpu a mbo o wo ma mbo. A wo eka ba Anwye ba Ahogbrẽ angyiŋ. Aŋa á dzu andakʼpo olu ba Ahogbrẽ gbagbu-amo.

⁴Agimi e ka edgu ekekʼpo baŋ a wo la alo ma! Ebrahim la a wo adigi a fa ogʼba okyeŋ eshki ba egʼba okʼpo ba ekployaŋ a mbo baŋ a hwiŋ okro ba eko a shri a da Amalkizedeki.

⁵Nga moarehwĩ ba ogu ba Elivi, moa la a wo moandakʼpo olu ba Ahogbrẽ, odaŋ o da mo ekʼpo ba o pla ogʼba okyeŋ eshki ba egʼba okʼpo abgo moarehwĩ ba Esrayila. Alo o tsa zheŋ ba moa a pla anzho abgo moarehwĩ ba obiŋ mo. Ambo moa a mbo a wo moarehwĩ ba ogu ba Ebrahim angyiŋ.

⁶Ambo Amalkizedeki a wo arehwĩ ba ogu ba Elivi angyiŋ mbo, ambo a yga ogʼba okyeŋ eshki ba egʼba okʼpo abgo ba Ebrahim, nga a fa anyuadzi a da are ba Ahogbrẽ a hwim ayakplo ka la ŋa.

⁷Alo o wo adlidzi angyiŋ, ba are la a fa anyuadzi a ygi, a wo la ekekʼpo a gre are la ba moa a fa lo a ygi ŋa.

⁸Ozhẽ ba moandakʼpo olu ba Ahogbrẽ he lo, moare la a la a kpu angyiŋ a la a pla ogʼba okyeŋ eshki ba egʼba okʼpo lo. Ambo ozhẽ ba Amalkizedeki are la a wo la esõ ma angyiŋ a la a pla ogʼba okyeŋ eshki ba egʼba okʼpo lo. Alo o kpo eka ba Odlo ba Ahogbrẽ o lu.

⁹Okyku eka he, eshri o lu odlo eshri ba ohre ogʼba okyeŋ eshki ba egʼba okʼpo he lo, omba ba Ebrahim a hre lo, moaElivi ba moarehwĩ ba ogu mo a pla lo abgo mo, moa a mbo a hre lo.

¹⁰Omba he lo moa a mbre Elivi a wo mbo. Ambo moa a kpo lo a zga ma eka he angyiŋ ba Elivi á kpo eka ba Ebrahim la a wo egʼba adaŋ Ebrahim omba ba Amalkizedeki a zhiŋ a sheŋ ŋa.

¹¹Moa a shri odaŋ a da moarehwĩ ba Esrayila ozhẽ ba odaŋ ba Ahogbrẽ okyku moandakʼpo olu ba Ahogbrẽ la a wo ogu ba Elivi a shri a zga. Okyku eka he o wo ba otum moa edgu moandakʼpo olu ba Ahogbrẽ he lo o bli angyiŋ le, e mbi o dzu mo omgbybi ba moa a hwiŋ edgu andakʼpo olu ba Ahogbrẽ la a wo ondundum okyku o daŋ a ba nga mbo. Ahe lo, moa a klo baŋ a wo a ba ogu ba Aharuna angyiŋ mbo, ambo moa a klo baŋ a wo a ba ogu ba Amalkizedeki andakʼpo olu ba Ahogbrẽ angyiŋ.

¹²Omba ba otum ba andakʼpo olu ba Ahogbrẽ o zgi ogu ba Elivi le, o dzu omgbybi ba moa á nyiŋ odaŋ lo.

¹³Nga Adigi-odne ba moa a lu edgu odlo he lo eshri baŋ, a wo a ba ogukyeŋ ondundum angyiŋ. Nga arekyeŋ ba ogu baŋ a kpo edgu otum ba andakʼpo olu ba Ahogbrẽ okro ba ambgu a ka mbo ku-ku.

¹⁴Areyaŋ a mbo a yi ba moa a mbre ŋa ogu ba Eyahuda angyiŋ. Ambo Omusa a tsi etku ogu he lo omba baŋ a lu odlo eshri moandakʼpo olu ba Ahogbrẽ mbo.

¹⁵Odlo lo nga o wo zheŋ o gre mi nganga. Andakʼpo olu ba Ahogbrẽ la a wo ondundum angyiŋ a ba, aŋa angyiŋ a wo eka ba Amalkizedeki.

¹⁶Moa a shri otum he lo a daŋ ozhẽ ba odaŋ moarehwĩ a jygu angyiŋ mbo. Aŋa a dzu andakʼpo olu ba Ahogbrẽ okro ekʼpo ba esõ la e khwo ku-ku nga mbo angyiŋ.

¹⁷Okyku eshi odlo ba Ahogbrẽ o lu mi le, Aŋo ó dzu andakʼpo olu ba Ahogbrẽ gbagbu-amo, eka ba Amalkizedeki a wo.

¹⁸Moa a shri odaŋ ogbyi a zga agba okyku eshi alo o wo la oshye ma mbo, nga o wo la owlama ma mbo.

¹⁹Okyku eshi odaŋ ba Omusa o kpo o gbu ba alo o zhiŋ ekplokyeŋ o da lo o bli mbo. Ambo ohuhuhi nga okayiozhẽ la o gre pyeŋ o wo ma a mo. Ozhẽ he lo angyiŋ agi e ba osusku ta la Ahogbrẽ.

²⁰Nga okʼpiashum ba Ahogbrẽ a mbo o wo ma. Omba ba moa a da moahwõ a dzu moandakʼpo ba olu ba Ahogbrẽ, edgu okʼpiashum he lo o wo ma mbo.

²¹Ambo Eyesu a dzu andakʼpo olu ba Ahogbrẽ ozhẽ okʼpiashum he lo angyiŋ omba ba Ahogbrẽ a lu ka la ŋa a lu mi le, Ahogbrẽ a sheŋ a kʼpi ashum, Nga á nyiŋ aga esõ baŋ mbo. Aŋo ó dzu andakʼpo olu ba Ahogbrẽ gbagbu-amo.

²²Okyku ba ozhẽ he lo o wo ondundum angyiŋ, Eyesu a dzu zhezheŋ ba ohwihwim la o wo odzi o gre.

²³Ekplokyeŋ la e wo ondundum e wo ma. Moandakʼpo olu ba Ahogbrẽ he lo moa a wo nzenze okyku eshi moa a la a kpu nga moa a kpo otum lo a fu ma mbo.

²⁴Ambo Eyesu á dzu ma gbagbu-amo. Nga arekyeŋ á yga otum baŋ ba andakʼpo olu ba Ahogbrẽ nga mbo.

²⁵Okyku eka he, aŋa a kpo a gbu ohuhuhi ta la ombayaŋ a mbo baŋ a shla moare la a ba okro ba Ahogbrẽ ozhẽ baŋ. Okyku eshi a wo ma gbagbu-amo okyku o daŋ a la a vẽ Ahogbrẽ okyku mo.

²⁶Okyku eshi, Eyesu angyiŋ a wo andakʼpo olu ba Ahogbrẽ la a la a shri ayakplo bi e wo la alo ma mbo a la a shri a da gi! A wo la esesla nga a wo la akpu ta la odlobi ma mbo ku-ku. Moa a shri ŋa a zga ondundum shrle pa la moarehwĩ la a la a kpo odlobi. Nga moa si ŋa a gre ongyeŋ ekpyembyeŋ.

²⁷A wo eka moanyuŋ-andakʼpo olu ba Ahogbrẽ ahwõ mbo. Alo o dzu omgbybi baŋ a shri oshriondba a shri a di ombamba pyeŋ ori okyku odlobi baŋ mbo, nga baŋ a sa a shri a di okyku odlobi moarehwĩ mbo. A sheŋ a shri oshriondba okyeŋ a shri a di nga o khwo. Alo o kpo omba baŋ a shri eŋa a shri a ndba.

²⁸Odaŋ ba Omusa o la o sla moare la a bli mbo angyiŋ ó da mo a dzu moanyuŋ-andakʼpo olu ba Ahogbrẽ. Ambo okʼpiashum ba Ahogbrẽ la o zgi ambla ba Odaŋ lo angyiŋ o sla Anwye la a daŋ a bli gbagbu-amo.