Read eggon Eyakubu 1 Bible Online

Eyakubu 1 - eggon bible

Eyakubu 1

¹Akpa he lo a zgi abgo ba Eyakubu awahgrẽ ba Ahogbrẽ ta la Adigi-odne Eyesu Ekristi. Ame e shko moarehwĩ pyeŋ ba Ahogbrẽ, la moa a som ayi a gre okroyaŋ a mbo obiŋ hi.

²Agimi anáŋ! Agimi e ka eka ba agimi e raŋ eshri angyiŋ, okyku omba ba moa a mbga gimi la edgu ombambga anda-ndandim.

³Okyku eshi o wo ba obmi ba adlidzi o kpo o gre ombambga he lo angyiŋ le, agimi é hwiŋ oghwo-esõ.

⁴Ambo agimi e zga gble okyku o da oghwo-esõ he lo o shri gimi o yi o fu ta la osheŋonye mbo, okyku o da gimi e bli nga e dzu shasha, nga okyku o da gimi e gbaŋ la emakyeŋ mbo.

⁵Ambo o wo ba arekyeŋ eshki bimi a gbaŋ la okaobmye le, o raŋ o gre baŋ a vẽ Ahogbrẽ. Aŋa á shri lo á shri á daŋ, okyku eshi Ahogbrẽ a la a shri ekployaŋ a mbo a shri a da areyaŋ a mbo la ovyevye ta la oklo.

⁶Ambo o raŋ o gre bimi e wo la obmi ba adlidzi ma omba bimi e la e fa olu. E fu esõ eha mbo ku-ku. Okyku eshi areyaŋ a mbo la a fu esõ eha le, a wo eka ba ondze-ami ba ogbga o mu lo anyuŋ-ondzu.

⁷Areyaŋ a mbo la a kpo edgu he lo, a ka eka baŋ á ba a hwiŋ ekplokyeŋ okro ba Adigi-odne mbo,

⁸okyku eshi aŋa a la a fu eha ekployaŋ a mbo baŋ a kpo.

⁹Anáŋ la a wo ekŋe, o raŋ o gre baŋ a vye la Ahogbrẽ omba baŋ a hwile ŋa ozhẽ ba ohwihwiŋ.

¹⁰Nga anáŋ la a wo angyiŋ ma, a kpo ovye omba ba Ahogbrẽ a daŋ a tsi a gbu. Okyku eshi moangyiŋ a mbo á bre ayi ototno eka ba ambu-mbwi ba asĩ afpu.

¹¹Olum nga o la o zgi la ovovo, nga o dzõ asĩ afpu. Ambumbwi ba alo a wo ta la ozba lo, o kpo nga o kpu. Are angyiŋ a mbo, moa á jygi ŋa ozhezhẽ he lo angyiŋ omba baŋ a la a kpo otum baŋ.

¹²Are la a tspi kye omba ba moa a mbga ŋa le, aŋa á wo la ovye ma. Okyku eshi moa á shri esõ angyiŋ á ba a shri á daŋ omba baŋ a kpo a gre ombambga he lo. Ahogbrẽ a hwim pa la moarehwĩ la a klo ŋa, baŋ á ba a shri egbre he lo angyiŋ á ba a shri á da mo.

¹³Areyaŋ a mbo, omba ba obile o vu ŋa le, a lu mi ma Ahogbrẽ angyiŋ a da obile o vu ŋa mbo, okyku eshi odlobikyeŋ o bile Ahogbrẽ o gbu mbo, nga Ahogbrẽ ababgo baŋ a mbo a bile arekyeŋ mbo.

¹⁴Ambo obile o la o ba omba ba aga abi ba esõ are a kom ŋa a hwro a gre ogyu-gyuŋ, nga a gbu amgbaŋ ba okoklo ayakplo la a wo abi.

¹⁵Omba ba aga abi ba esõ baŋ he lo a kpo onyi, a kpo nga a mbre odlobi, nga odlobi a mbo o hlu o khwo nga, o sa o mbre eku.

¹⁶Agimi anáŋ, agimi e da mo a bile gimi mbo!

¹⁷Okpogbu odzadzi pyeŋ, ta la ototno la o bli pyeŋ, moa a zgi Ongyeŋ okro ba Ahogbrẽ angyiŋ o ba. Aŋa angyiŋ a kpo ayimom pyeŋ la a wo ongyeŋ. Ahogbrẽ a wo eka ba ayimom ta la amu la e nyiŋ ombamba mbo. Aŋa a la a nyiŋ mbo ku-ku.

¹⁸La oklo ba esõ baŋ angyiŋ, a kpo gi ozhẽ ba odlo ba adlidzi okyku o da gi e hwiŋ okro ba anyuanyuŋ angyiŋ e dzu ma eshki ba ayakplo pyeŋ baŋ a kpo.

¹⁹Agimi anáŋ, agimi e tne aga ekplo he lo! O raŋ o gre ba areyaŋ a mbo a ngli atuŋ a gno adzadzi, nga a lu odlo tsutsutsku mbo, nga a la a da esõ e vre ŋa shoshoŋ mbo.

²⁰Okyku eshi esõ-evre ba arehwĩ e wo la owlamakyeŋ okyku o da Ahogbrẽ a kpo ayakplodzi baŋ a klo o kpo-kpo mbo ku-ku.

²¹Okyku okũ he lo, agimi e kyu edgu ayakplo bimi e la e kpo la a wo eshre, ta la edgu eda ebi abgo. Agimi e shri eshri bimi e shri e da Ahogbrẽ, nga e yga odlo a yle lo esõ bimi. O kpo o gbu ba alo o shri oshla o shri o da gimi.

²²E bile egimi mbo, nga e ngli atuŋ e gno odlo ba Ahogbrẽ lo o gno sha mbo. Ambo e kpo otum ta la alo a mbo ko-ko.

²³Areyaŋ a mbo la a la a gogno sha, ambo a la a kpo otum ta la alo mbo le, a wo eka are la a la a yi a ka eŋa akpaokayi eka baŋ a wo.

²⁴Aŋa a ka eŋa eka baŋ a wo a khwo nga a zhiŋ ogbu a gre eŋa. Ambla fi nga a gre esõ a ghre eka baŋ a wo.

²⁵Ambo areyaŋ a mbo la a ka odaŋ he lo la o bli shasha, la o shri oshla o ba, nga a la a zga ayi a yi ma, a dzu are la a gno ogno sha nga a gre esõ a ghre mbo, ambo a la a kpo otum ta la alo. Ahogbrẽ á shri owlama á da are he lo ekployaŋ a mbo baŋ a kpo.

²⁶Arekyeŋ a la a ka eka baŋ a wo are la a kpaŋ odlo ba Ahogbrẽ adzadzi? O wo baŋ a la a nyunyuŋ a la a lu odlo mbo le, okpo-kpo baŋ he lo o wo o ba ototno angyiŋ. Nga a la a bile eshri baŋ.

²⁷E kpaŋ moanwye-ayieku pa la moashe-eshaku e sku ewu ba moa a la a kpo. Nga e da ayakplo ba obiŋ hi a tpi gimi ayi mbo, okyku eshi Ahogbrẽ la a wo Adigi, a sko ohe lo angyiŋ a zga oluŋama la a wo kye ta la adlidzi.