Read eggon Eyakubu 3 Bible Online

Eyakubu 3 - eggon bible

Eyakubu 3

¹Agimi anáŋ! O raŋ o gre ba moare nzenze angyiŋ eshki bimi a dzu moa la a nye mbo, okyku eshi agi la e nye moa á sõ gi ombgu la o vu olo á gre moahwõ.

²Agi pyeŋ e la e ta akpu ayakplo nzenze ombamba. Are la a ta akpu ekplokyeŋ baŋ a lu a ka mbo le, aŋa a bli, nga a wo are la a kpo a gbu baŋ a kpaŋ egʼba baŋ pyeŋ.

³Agi e la e ghwo ogbu ahwre anyu ba ényma okyku o da mo a kpo ekplo ba agi e klo. Nga agi e la e da mo a yi okroyaŋ a mbo ba agi e klo ba moa a yi.

⁴Agimi e sa e tne aga eshri ba anyuŋ amgblami, a wo agagre nga ogbga la o shye o la o mu lo, ambo ela ekla la e wo tsitsi sha angyiŋ e la e zhiŋ lo. Nga amgblami he lo a la a yi ayaŋ a mbo ba are la a tpi lo a klo ba alo a yi.

⁵O wo eka he angyiŋ ta la olom ba o lu odlo. Alo o wo tsi sha, ambo o la o lu anyuŋ edlo eshri ayakplo. Nga agimi e tne aga e ka eka ba embyliovo etsitsi sha e kpo e gbu ba alo e da ohwoŋ o ri ovo!

⁶Olom o wo eka ovo angyiŋ. O wo ekplokyeŋ la e tpi obiŋ ayi pyeŋ. Alo nga o hwiŋ odzudzu baŋ egʼba bi, alo o da ekpre e la e tpi egʼba bi ayi pyeŋ. Alo o la o ta egʼba bi pyeŋ ovo. Ovo he lo o zgi enzheovo angyiŋ o ba.

⁷Arehwĩ a kpo a gbu baŋ a nye ebyi akla anda-ndandim nga a sheŋ a nye ebyi ba akla ta la awunu, ta la atsa, ta la ebyi ba amanzhli mo a bʼbu eka ba amabi ta la ayla.

⁸Ambo arekyeŋ a kpo a gbu baŋ a nye olom baŋ mbo. Alo o lu ayakplo la a wo abi, nga moa a kpo ekʼpo ta la lo a gbu mbo. Ekpre ba alo e wo ebi e gre eshri!

⁹La alo angyiŋ agi e la e vye Adigi-odne, ta la Adigi, nga la alo angyiŋ agi e la e ta ogbukyu e ygi moarehwĩ edgu bi ba moa a kpo mo la emle ba Ahogbrẽ!

¹⁰Anyu akyakyeŋ angyiŋ a la a vye a khwo nga a la a sa a ta ogbukyu. Agimi anáŋ! Agimi e da edgu ayakplo he a kpo mbo ku-ku!

¹¹Eyi-ami e la e zgi la ami la a raŋ ta la ami la a no ogbukyekyeŋ mbo!

¹²Agimi anáŋ, esĩ ebro e kpo e gbu ba alo e fu agbro ba olivi mbo, nga eyi-ami la e zgi la ami ba eŋe, e kpo e gbu ba alo e zgi la ami la a raŋ mbo.

¹³Arekyeŋ la a wo la okaobmye nga baŋ a yi ayakplo a wo eshki bimi? O raŋ o gre baŋ a tsa oyioyi baŋ ozhẽ ba odzudzu baŋ la o wo odzadzi, ta la otum odzadzi baŋ a la a kpo la opresõ-obiŋ ta la okaobmye.

¹⁴Ambo o wo bimi e wo abi angyiŋ esõ bimi le, nga agimi e la e kpo efpu nga e klo eshri le, o raŋ o gre bimi e hre egʼba nga e sheŋ akpro eshri adlidzi he lo mbo.

¹⁵Edgu okaobmye he lo o zgi ongyeŋ angyiŋ o ba mbo ku-ku. Edgu okaobmye he lo o wo okaobmye ba obiŋ hi angyiŋ, nga alo o wo okaobmye ba aga ba egʼba angyiŋ, nga alo o wo okaobmye ba egbgabi.

¹⁶Okro-yaŋ a mbo ba efpu ta la okloeshri o wo ma le, odzu opyapyaŋ o wo ma mbo, nga edgu ayakplobi andandandim a wo ma.

¹⁷Ambo akplo ba ori, okaobmye la o zgi ongyeŋ angyiŋ o wo kye. Okaobmye lo o wo la opyapyaŋ ma, nga o wo ble-ble ta la ekpom, nga o wo la okayiekŋe nzenze, nga okaobmye lo o fu agbro ba otum la o wo odzi. Nga alo o wo la aga la a wo la evevom ma mbo, nga alo o kpo ayakplo la a wo abibli mbo.

¹⁸Eyi ba moarehwĩ la a shri opyapyaŋ a zga agʼbaha moare a fu ibu opyapyaŋ, alo e shri owlama ba odlodzi e shri e ba.