Read eggon Eyakubu 4 Bible Online

Eyakubu 4 - eggon bible

Eyakubu 4

¹Ambgu ta la okʼpioha pyeŋ eshki bimi moa a zgi ayaŋ a ba? Moa a zgi okayiogro bimi la o wo obi angyiŋ. Moa a la a kpo ambgu egʼba bimi ombamba pyeŋ.

²Agimi e klo anzho, ambo agimi e kpo e gbu ba agimi e hwiŋ alo mbo. Okyku eshi, agimi e zga esõ ba o bga ebga, nga agimi e kpo ekhwo anzho la a wo ewu ba agimi e hwiŋ alo. Okyku eka he lo angyiŋ agimi e la e kla odlo nga e la e kʼpi oha. Agimi e wo la ayakplo ba agimi e klo mbo, okyku eshi agimi e vẽ Ahogbrẽ okyku lo mbo.

³Nga o wo ba agimi e vẽ ŋa a mbo, agimi e la e hwiŋ alo mbo, okyku eshi aga esõ bimi a wo adzi mbo ku-ku. Agimi e la e vẽ okyku anzho la á ba a shri oraŋ á shri á kom gimi sha.

⁴Agimi arehwĩ la e kpo adlidzi mbo! Agimi e yi mbo, ba agimi e dzu moafpu ba Ahogbrẽ angyiŋ o wo ba agimi e dzu moakyeŋazba ba obiŋ hi? Areyaŋ a mbo la a klo o dzu akyeŋazba ba obiŋ hi le, á dzu afpu ba Ahogbrẽ.

⁵Agimi e ka eka ba odlo ba Ahogbrẽ o wo odlo ototno angyiŋ mbo. O lu mi le, Ogbga ba Ahogbrẽ a da lo o dzu esõ bi o la o wo la ekhwo la e lbi.

⁶Ambo okpoghwo ba Ahogbrẽ a shri a di, alo o wo oshye o gre pyeŋ. Okyku eka he, odlo ba Ahogbrẽ o lu mi le, Ahogbrẽ a tla moare la a nyom egʼba, nga a la a kpo a ghwo la moare la a wo esõ ble-ble.

⁷Okyku eka he, agimi e shri eshri bimi e shri e da Ahogbrẽ. E tla Eshitaŋ la osheshye, nga á knye á sku gimi.

⁸Agimi e ba osusku ta la Ahogbrẽ, Ahogbrẽ a mbo á ba osusku ka la gimi. Agimi moarehwĩ ba odlobi, e ndza abgo bimi! Agimi abibli moarehwĩ, e ndza esõ bimi!

⁹Agimi e da lo o shri esõ ebili o kom gimi, nga e wu okũ la amanyi ayi. Agimi e kyu eŋo abgo nga e wu okũ. Nga e kyu ovye abgo nga e gbu ogbrẽ!

¹⁰E ta eshri bimi ble-ble egi ayi ba Aho-gbrẽ. Aŋa nga á da gimi é vre.

¹¹Agimi anáŋ, o raŋ o gre ba agimi e lu odlo ototno eshri egimi mbo. Areyaŋ a mbo la a lu odlo eshri anáŋ o mbo le a sõ ŋa ombgu le, o dzu eka baŋ a tla odaŋ, nga a sõ odaŋ ombgu angyiŋ. O wo boŋ o la o sõ odaŋ ombgu le, o dzu eka boŋ o wo are la a kpaŋ odaŋ lo nga mbo, ambo aŋo o dzu are la a sõ ombgu la odaŋ lo angyiŋ.

¹²Ahogbrẽ sha a wo are la a jygu odaŋ nga a sõ ombgu. Aŋa sha angyiŋ a kpo a gbu baŋ a shla are o mbo le a jygi are. Aŋo o ka aŋo o wo ayi angyiŋ boŋ o sõ anóŋ ombgu?

¹³Agimi la e lu mi le, Anye o mbo le akyi, agi é dzi é yi oskukyeŋ. Ahe lo, agi é ta ekyku okyku eyi ekyeŋ okyku o da gi e hwiŋ amgbaŋ nzenze.

¹⁴Agimi e ka e yi eka ba esõ bimi é ba e dzu akyi mbo! Okyku eshi agimi e wo eka ba awluedzi a la a kso ple sha. Awluedzi lo a kso kpwi a khwo nga a sa a blu.

¹⁵Okyku okũ he lo, o raŋ o gre ba agimi e lu mi le, O wo ba Ahogbrẽ a bmi le, agi é dzu ma, nga é kpo eka he, o mbo le eka mi.

¹⁶Ambo ohuhuhi agimi e la e hre egʼba. Edgu onyomegʼba he lo o wo akpu angyiŋ.

¹⁷Okyku eka he are la a tla o kpo ayakplo baŋ a yi ba alo o raŋ o gre baŋ a kpo lo le, o wo baŋ a kpo lo mbo a kpo odlobi angyiŋ.