Read eggon Eyakubu 5 Bible Online

Eyakubu 5 - eggon bible

Eyakubu 5

¹Agimi moarehwĩ la e wo la angyiŋ ma, e ngli atuŋ e gno odlo me! E wu okũ la amanyi ayi okyku ewu la é hwiŋ gimi!

²Angyiŋ bimi a sheŋ a vrẽ a khwo, nga edne e sheŋ e mbdzi aknye bimi bgu.

³Azurfa bimi ta la ezanariya bimi, omle o shki lo pyeŋ. Omle he lo angyiŋ ó ba o zgi egŋe eshri bimi, nga ó ri egʼba bimi eka ovo. Agimi e pla angyiŋ e shki omba ba amom-abgo he e gre eshri.

⁴Agimi e hre moare la a kpo gimi otum agbi ohre mo mbo. Agimi e ngli atuŋ e gno onyiagla ba moa a la a nyi! Nga okũ moare la a yla algo bimi a shki ibu, alo o gro o gbu atuŋ Ahogbrẽ la a wo Adigi-odne, la a wo ekʼpo pyeŋ!

⁵Odzudzu bimi obiŋ hi, alo o bli la ognoraŋ nzenze. Agimi e vgi egimi e da gimi e gbrẽ, nga e dzu e bli olum onda ba moa á ba a bga gimi.

⁶Agimi e sheŋ e sõ are la a wo la akpu ma mbo ombgu bgu, nga agimi e gba e bga ŋa e ta okom, ambo a kpo ambgu ka la gimi mbo.

⁷Agimi anáŋ, e kpo oheheŋ o tsa ba Adigi-odne a ba. E ka eka ba are la a lbi agbi a la a kpo oheheŋ omba baŋ a la a dzu a bli agbi baŋ okyku o da lo a kpo algo adzadzi. Aŋa a la a dzu heheŋ a bli ogbu ba ori ta la ogbu ba amom-abgo.

⁸Agimi a mbo, o raŋ o gre ba agimi e kpo oheheŋ! Agimi nga e la e dzu la okayiozhẽ la ekhwoekhwo, okyku eshi olum onda ba Adigi-odne á ba a ba o wo osusku a mo.

⁹Agimi anáŋ, e nyi agla ta la egimi mbo, okyku o da Ahogbrẽ a sõ gimi ombgu mbo. Are la a sõ ombgu a wo osusku a mo, aŋa a dzu a bli okyku o gre o ba eshyẽ sha angyiŋ a mo!

¹⁰Agimi anáŋ, agimi e tne aga ba moarehwĩ ba Ahogbrẽ a hom mo otum, moa a la a lu odlo la eshko ba Adigi-odne. Agimi e da mo angyiŋ a dzu egŋe bimi, okyku eshi moa a kpo oheheŋ nga a ghwo esõ omba ba moarehwĩ a la a kpo mo ewu.

¹¹Moa a dzu gble, okyku eka he agi e la e bzi mo ma moarehwĩ la a gno oraŋ. Agimi e sheŋ e gno eka ba Ayuba a ta esõ akpyli, nga agimi e yi eka ba amom-abgo a hwiŋ owlama okro ba Adigi-odne. E ka, Adigi-odne a wo are la a wo la okayiekŋe ta la oklo ma.

¹²Ekplo la e gre ahwõ pyeŋ, agimi anáŋ, e kʼpi ashum omba ba agimi e la e hwim okyku akploltyeŋ mbo. E kʼpi ashum la Ongyeŋ mbo, o mbo le la obiŋ hi, o mbo le la akplokyeŋ mbo ku-ku. O wo ba agimi e bmi le, e bmi, nga o wo ba agimi e tla le, e tla nga o khwo, okyku o da Ahogbrẽ a sõ gimi ombgu mbo.

¹³Arekyeŋ eshki bimi a wo ewu ko? O raŋ o gre baŋ a fa olu. Arekyeŋ eshki bimi a wo la ovye ma? O raŋ o gre baŋ a fu abmo ba ohlueshko.

¹⁴Arekyeŋ eshki bimi a no ko? O raŋ o gre baŋ a bzi moandakʼpo ba Eklisiya, okyku o da mo a fa olu okyku ŋa nga a shri awargi a ygi ŋa eshri eshko ba Adigi-odne.

¹⁵Olu he lo, o wo ba moa a fa lo la obmi ba adlidzi angyiŋ le, alo ó shaŋ are la a no olo lo. Adigi-odne á bla á shri oshye á shri á da are lo. Nga odlobi baŋ a kpo, Ahogbrẽ á kyu ŋa abgo ma.

¹⁶Okyku okũ he lo, agimi e lu odlobi bimi e ygi egimi, nga e fa olu okyku egimi, okyku o da gimi e shaŋ. Olu ba are odlodzi o wo la ekʼpo ma nzenze!

¹⁷Eliya a wo arehwĩ eka bi hi angyiŋ. Aŋa a fa olu la esõ ekyekyeŋ okyku o da ogbu o ba mbo. Okyku lo nga, ogbu o ba mbo okyku eyi etra ta la ehwa efĩ.

¹⁸Ambla he nga a sa a fa olu, nga ogbu o zgi ongyeŋ o ba, nga algo a kpo obiŋ.

¹⁹Agimi anáŋ! O wo ba akyeŋ eshki bimi a ngʼba a sku adlidzi le, nga ba arekyeŋ a bla ŋa a shri a ba le,

²⁰agimi e tne aga e ka, areyaŋ a mbo la a kpaŋ are odlobi a sku ozhẽ ba odlobi le, a daŋ a sa a ngʼba a sku lo, aŋa á shla esõ are he lo abgo ba eku, nga á da mo a kyu ŋa abgo odlobi nzenze baŋ a kpo.