Read eggon 1 Ebitru 2 Bible Online

1 Ebitru 2 - eggon bible

1 Ebitru 2

¹Agimi e ngʼba e sku ayakplo pyeŋ la a wo abi. O raŋ o gre ba agimi e sheŋ akpro mbo, nga e kpo abibli mbo, nga e ta efpu mbo, nga e lu odlo la o wo odzi mbo.

²Agimi e dzu eka moanwye able ba moa a mbre mo ehehe. Omba-mba pyeŋ agimi e la e kpo ekhwo okyku orga abme ba esõ la a wo tsetsetseŋ, okyku o da gimi e wa nga e hlu nga e hwiŋ oshla,

³eka ba odlo ba Ahogbrẽ o lu mi le, Agimi e sheŋ e tka okpoghwo ba Adigi-odne la olom bimi e ka bgu.

⁴Agimi e ba okro ba Adigi-odne. Aŋa angyiŋ a wo ezhim la e wo esõ ma ba moarehwĩ a tla lo a ta. Ambo Ahogbrẽ a sla lo a zga ekplo ba owlama nzenze.

⁵Agimi e ba eka ba ezhim la e wo la esõ ma, nga agimi e bmi okyku o da mo a mbdzi akulu ba Ogbgaodzi ka la gimi. Ahe lo nga agimi é kpo otum ma eka moandakʼpo olu ba Ahogbrẽ la a wo la esesla ma. Okyku o shri oshriondba ba esõ la o wo shasha e shri e ndba okro ba Ahogbrẽ ibu ba Eyesu Ekristi.

⁶Odlo Ahogbrẽ o lu mi le, Ame e sla ezhim ba owlama. Alo angyiŋ ame e shri lo e ghwo emvygi ba Ezayoŋ. Nga areyaŋ a mbo la a bmi ba adlidzi ka la ŋa aŋa á gbu anzi mbo.

⁷Ezhim he lo e wo owlama nzenze okro bimi la e bmi ba adlidzi. Ambo okro bimi la e bmi ba adlidzi mbo, moa a lu mi le, Ezhim ba moa la a mbdzi a tla lo a ta eka ba alo e wo la owlama mbo, Alo angyiŋ e zhiŋ e dzu ezhim la e wo la anyuanyuŋ e gre pyeŋ.

⁸Odlo ba Ahogbrẽ o sa o lu mi le, Ezhim he lo angyiŋ é ba e da moarehwĩ a sheŋ evgo. Alo angyiŋ é ba e dzu onmwre la ó ba o da moare a tsu a gbu. Moa a sheŋ evgo okyku ba moa a bmi ba adlidzi ta la odlo lo mbo angyiŋ. Ohe lo angyiŋ o wo okoklo ba Ahogbrẽ okyku mo.

⁹E ka, agimi angyiŋ e wo embre ba Ahogbrẽ a sla. Agimi angyiŋ e wo moandakʼpo olu ba Anyuŋ-areŋ he lo. Moarehwĩ he lo a wo esesla. Agimi e wo moarehwĩ ba Ahogbrẽ ababgo baŋ. A sla gimi okyku o da gimi e su otum egbregbre baŋ a kpo. Aŋa angyiŋ a bzi gimi evbu nga a shri gimi a ba ayimom baŋ ba egbregbre.

¹⁰Ayga agimi e wo moarehwĩ ba Ahogbrẽ angyiŋ mbo, ambo ohuhuhi agimi e wo moarehwĩ baŋ. Ayga agimi e ka e yi okayiekŋe ba Ahogbrẽ mbo ku-ku. Ambo ohuhuhi agimi e hwiŋ okayiekŋe baŋ he lo.

¹¹Agimi akyemeazba, ame e vẽ gimi, agimi la e wo moa-zhẽ pa la moarehwĩ la a som ayi okyku ewu angyiŋ obiŋ hi! Agimi e bmi ta la okoklo ba egʼba mbo. Okoklo ba egʼba o la o kyku ebzu ta la okoklo ba esõ ombamba pyeŋ.

¹²O raŋ o gre ba odzudzu bimi egi ayi moaevbu o wo shasha nzenze, okyku o da mo a tne aga edgu otum la o wo shasha ba agimi e kpo, omba ba moa a la a hrẽ gimi, ma agimi e la e kpo otum la o wo shasha mbo. Nga okyku o da mo a hlu Ahogbrẽ eshko Onda baŋ á ba.

¹³Agimi e fa olbi e da moarehwĩ la a ri ekʼpo okyku Adigi-odne. E fa olbi e da Ekeza la a wo andakʼpo ekpyemgbyeŋ,

¹⁴pa la moaogomna ba Ekeza a hom mo otum okyku o da mo a kpo moa la a kpo ayakplo shasha mbo ewu. Nga okyku o da mo a vye la moa la a kpo ayakplo la a wo shasha.

¹⁵Okyku eshi ohe lo o wo okoklo ba Ahogbrẽ angyiŋ. A klo ba agimi e tspi la moare la a yi ekplokyeŋ mbo nga a la a lu odlo ba adro, ozhẽ ayakplo la a wo shasha ba agimi e la e kpo.

¹⁶O raŋ o gre ba agimi e dzu eka moarehwĩ la a wo la odzudum ma. Ambo agimi e sko odzudum e kha ekplokyeŋ ebi ba agimi e kpo mbo. Ambo agimi e dzu eka moawaghrẽ ba Ahogbrẽ.

¹⁷Agimi e fa olbi e da moarehwĩ pyeŋ. Agimi e klo moa la a bmi ba adlidzi otsotse ka la gimi. Nga agimi e la e kpo eyli ba Ahogbrẽ, nga e fa olbi e da Ekeza.

¹⁸Agimi anwye-odne, o raŋ o gre ba agimi e kpaŋ odlo ba moadigimi-odne, nga e fa olbi e da mo adzadzi. Agimi e kpo eka he lo pa la moa la a ka ayiekŋe, nga a wo la esõ ble-ble sha mbo, ambo e kpo pa la moa la a la a kpo ayiwlu ka la gimi a mbo.

¹⁹Ahogbrẽ nga á shri owlama á shri á da gimi okyku ohe lo, o wo ba agimi e la e ghwo esõ ta la ewu la e wo ozhẽ mbo, ba moa a la a kpo gimi, okyku bimi e bmi ta la okoklo baŋ.

²⁰Owlamakyeŋ o wo ándzu ba moa a bga gimi okyku ba agimi e ta akpu, o wo ba agimi e ghwo esõ? Ambo o wo ba agimi e ghwo esõ ta la ewu okyku o kpo otum la o wo shasha angyiŋ le, Ahogbrẽ á shri owlama á shri á da gimi okyku lo.

²¹Okyku ohi lo angyiŋ, Ahogbrẽ a bzi gimi. Okyku eshi Ekristi a mbo a kpo ewu okyku gimi, nga a dzu egŋe a zga ma okyku o da gimi a mbo e kpo eka he lo, nga e sõ ozhẽ baŋ a sõ lo.

²²Aŋa a kpo odlobi a ka mbo ku-ku. Arekyekyeŋ a gno odlo ba akpro anyu baŋ a ka mbo ku-ku.

²³Omba ba moa a hre ŋa anyu, aŋa a bla a hre mo anyu mbo. Nga omba baŋ a kpo ewu, aŋa a suŋ mo egʼba mbo ku-ku. Ambo a shri okayiozhẽ baŋ a zga okro ba Ahogbrẽ la a wo are la a sõ ombgu la odlodzi sha.

²⁴Ekristi ababgo baŋ a sko odlobi bi egʼba baŋ a shri a gre egŋe aki, okyku o da gi e dzu eka ba moare la a kpu angyiŋ ta la odlobi. Are la a kpu moa á tka ŋa aŋa a kpo a gbu baŋ a yi mbo. Okyku eka he, are la a kpu okro odlobi, a kpo a gbu baŋ a yi odlobi mbo, nga a dzu okyku o kpo odlodzi. Nga okyku ero ba moa a fa Ekristi egʼba angyiŋ, agimi e hwiŋ oshye.

²⁵Agimi e wo eka ba ékylu la e ta ozhẽ akpu, ambo ohuhuhi moa a shri gimi a bla a ba okyku o da gimi e sõ ozhẽ ba Are la a kpaŋ ékylu. Are he lo angyiŋ a wo are la a kpaŋ esõ bimi.