Read eggon 2 Ebitru 3 Bible Online

2 Ebitru 3 - eggon bible

2 Ebitru 3

¹Agimi akyemeazba! Akpa he a wo akpa ba oha angyiŋ ba ame e ta gimi. Akpekpa ahaha lo pyeŋ, ame e zga ngre okyku o dzu gimi eshri ayakplo he lo ibu o tne gimi aga la a wo adzi esõ bimi.

²Ame e klo bimi e tne aga odlo ba moarehwĩ ba esesla ba Ahogbrẽ a hom mo otum ogbyigbyi a lu. Nga okyku o da gimi e tne aga odaŋ la o zgi okro ba Adigi-odne ta la Areoshla bi. Odaŋ he lo, moarehwĩ bimi la a nyum oshpa angyiŋ a shri lo a shri a ba.

³Ekplo ba oriori, o raŋ o gre ba agimi e ka e bmye eka ba moakyeŋ á ba a ba omba ba amom-abgo. Okoklo ba egʼba angyiŋ ó ba o ri ekʼpo pa la moare he lo. Moa á lu ega á ygi gimi.

⁴Nga moa á lu mi le, Aŋa a hwim a zga baŋ á ba a ba mbo? A wo ayaŋ? Moadigi moa a sheŋ a kpu bgu, ambo ekployaŋ a mbo e dzu eka ba obiŋ o wo okũ oriori omba ba moa a kpo ekployaŋ a mbo!

⁵Moa a dzu ekplo he lo a zga ototno angyiŋ ba ogbyigbyi omba ba Ahogbrẽ a lu odlo, ambla he nga moa a kpo ongyeŋ ta la obiŋ hi. Moa a kpo obiŋ hi eshyeshyẽ ba amihĩ, la amihĩ.

⁶Nga moa a jygi obiŋ ba ogbyi la amihĩ la a shki obiŋ hi pyeŋ.

⁷Ambo ongyeŋ pyeŋ ta la obiŋ hi la o wo ma ohuhuhi, odlo he lo angyiŋ ó shri lo ó zga ma, okyku o da mo a jygi lo la ovo. Moa a shri lo pyeŋ a zga ma á bli onda ba moa á sõ moarehwĩ ba odlobi ombgu nga á jygi mo.

⁸Agimi akyemeazba, agimi e gre esõ akplo akyekyeŋ he lo e ghre mbo ku-ku! Ekplokyeŋ la e wo ondundum egi ayi ba Adigi-odne agʼbaha ba olum onda okyeŋ ta la eyi ezbi e wo ma mbo. Moaha he lo a wo okyekyeŋ angyiŋ ka la ŋa.

⁹Ahogbrẽ a la a ngingli angyiŋ ta la ekplo baŋ a sheŋ a hwim baŋ á ba a kpo mbo. Moakyeŋ a la a tne aga eka he. Ambo a la a kpo heheŋ ka la gimi okyku eshi a klo ba arekyeŋ a jygi mbo. Ambo a klo ba moare pyeŋ a zhiŋ ogbu á dzu odlobi ba moa a la a kpo á zga.

¹⁰Olum Onda ba Adigi-odne ó gnyu ognyu eka ba asi a la a gnyu ognyu. Onda mi lo ongyeŋ pyeŋ ó blu eka akyuŋ la a zhle. Nga ayakplo la a wo ongyeŋ moa á yla lo la ovo la o vu olo. Nga obiŋ hi ta la ekployaŋ a mbo la e wo ma é dom ya.

¹¹Eka ba moa á ba a jygi ekployaŋ a mbo ozhẽ he lo, o raŋ o gre ba agi e dzu moarehwĩ ba edguyaŋ angyiŋ? O raŋ ba agimi e shri eshri bimi e da Ahogbrẽ ogbukyekyeŋ,

¹²omba ba agimi e la e dzu e bli Olum ba Ahogbrẽ he lo, agimi e zga ayi ngre okyku o da lo o ba shoshoŋ. Olum onda he lo angyiŋ, ongyeŋ pyeŋ ó ri ovo, nga moa á jygi lo. Nga moa á yla ekployaŋ a mbo la e wo ongyeŋ la ovo.

¹³Ambo Ahogbrẽ a sheŋ a hwim okyku ongyeŋ olehe ta la obiŋ olehe. Ahe lo, odlodzi o wo ma. Agi nga e dzu e bli lo.

¹⁴Okyku eka he agimi akyemeazba, eka ba agimi e la e dzu e bli Onda mi lo, e zga ayi ngre okyku o da gimi e kye shasha la akpukyeŋ egi ayi ba Ahogbrẽ mbo, nga okyku o da gimi e dzu opyapyaŋ ka la ŋa.

¹⁵Agimi e ka oheheŋ ba Adigi-odne a shri a da gimi okyku o da gimi e hwiŋ ozhẽ ba o hwiŋ oshla, eka ba anigi la a ri Oblus a sheŋ a ta gimi akpa la okaobmye ba Ahogbrẽ a shri a daŋ.

¹⁶A kpo eka he lo angyiŋ akpekpa pyeŋ baŋ a ta odlo he lo ma. Ayakplo abze a wo ewu akpekpa baŋ lo, nga moare la a wo la evbueshri, pa la moare la a wo kyekye mbo, moa a la a zhiŋ lo la egegŋe ototno, eka ba moa a la a kpo ta la oshpayakplo nzenze Akpa ba Ahogbrẽ, nga moa a tpi emo ayi.

¹⁷Ambo agimi akyemeazba, agimi e sheŋ e yi lo bgu. Agimi e kʼpu, okyku o da akpukyeŋ ba moarehwĩ la a yi odaŋ mbo a ngʼba gimi a sku ozhẽ mbo, nga okyku o da gimi e zgi okro ba odzudum ba agimi e tspi ma he e gbu obiŋ mbo.

¹⁸Ambo agimi e hlu la okpoghwo, ta la oyioyi ba Adigi-odne la a wo Areoshla bi, Eyesu Ekristi. Ekʼpo e dzu e baŋ ohuhuhi ka la gbagbu-amo! Amin.