Read eggon 3 Eyohana 1 Bible Online

3 Eyohana 1 - eggon bible

3 Eyohana 1

¹Akpa he lo a zgi abgo ba Andakʼpo, A yi abgo ba Egayu, arehwĩ ba ame e klo ŋa nzenze.

²Aŋo akyemeazba ba ame e klo ŋo, ame e la e fa olu okyku o da ekployaŋ a mbo e dzu adzadzi ka la ŋo, nga okyku o doŋ o dzu la oshye egʼba, okyku eshi ame e yi boŋ o wo la oshye esõ ma.

³Ame e gno oraŋ e gre eshri omba ba moanáŋ akyeŋ a ba a tsi oshpa a da me eka boŋ o tspi la adlidzi okyku adlidzi, eka boŋ o dzu la adlidzi lo ombayaŋ a mbo.

⁴Alo o raŋ me esõ o gre pyeŋ okyku eka ba ame e gno eka ba moanwye me a la a dzu la adlidzi.

⁵Aŋo akyemeazba, aŋo o kpo otum la adlidzi angyiŋ okyku moanáŋ o wo ba moa a wo moazhẽ a mbo.

⁶Moa a lu odlo eshri oklo boŋ okyku Eklisiya ahe. Ame e vẽ ŋo, aŋo o kpo o ghwo la mo odzi mo he lo, okyku o da Ahogbrẽ a gno oraŋ ka la ŋo.

⁷Okyku eshi moa a wo ozhẽ odzi angyiŋ otum ba Ekristi ba moa a la a kpo. Nga moa a ka a yga okpoghwokyeŋ okro moaevbu mbo.

⁸Agi arehwĩ la e lu Ekristi ma o raŋ o gre ba agi e kpo e ghwo la moarehwĩ he lo, okyku o da gi e pu otum ba moa a kpo okyku adlidzi.

⁹Ame e sheŋ e ta etaŋ akpa e shri e kom Eklisiya, ambo Ediyotrefe la a klo o dzu andakʼpo mo á bmi ta la ekplo ba ame e lu mbo.

¹⁰Ame é lu ekployaŋ a mbo baŋ a kpo omba ba ame é ba. Aŋa a lu odlo ba ototno eshri bi, nga a la a sheŋ akpro a ghwo gi! Nga ohe lo o khwo mbo! Aŋa a tla o yga moanáŋ omba ba moa a ba, nga a nyom moarehwĩ la a klo o yga moanáŋ he lo, nga a zga ngre okyku o daŋ a se mo a sku Eklisiya!

¹¹Aŋo anime, o mbli ekplo la e wo ebi angyiŋ mbo, ambo o mbli ekplo la e wo edzi angyiŋ. Areyaŋ a mbo la a kpo ekplo la e wo edzi le, aŋa a wo arehwĩ ba Ahogbrẽ angyiŋ, ambo areyaŋ a mbo la a kpo ayakplobi le, are he lo a ka Ahogbrẽ a ka mbo.

¹²Areyaŋ a mbo a la a tsom Edemetriyu. Adlidzi a mbo ababgo baŋ a lu odlo la o wo odzi eshri baŋ. Nga agi a mbo e sa e ta egŋe bi e pu ma. Agimi e yi ba ekplo ba agi e lu he lo e wo adlidzi angyiŋ.

¹³Ame e wo la odlo nzenze ba o lu o doŋ, ambo ame e klo e ta lo akpa angyiŋ mbo.

¹⁴Ame e ka ayi ozhẽ ba ame é ba ibu boŋ anvaŋ he, omba mi lo ame é kpla egba ka la ŋo la eyayi.

¹⁵Opyapyaŋ o dzu ka la ŋo. Moakyeŋoazba pyeŋ, moa a shko ŋo. Aŋo o shko moakyegiazba ababgo boŋ.