Read eggon Eyahuda 1 Bible Online

Eyahuda 1 - eggon bible

Eyahuda 1

¹Akpa he lo a zgi abgo ba Eyahuda awaghrẽ ba Eyesu Ekristi. Eyahuda angyiŋ a wo anáŋ Eyakubu. Akpa he lo a wo okyku moarehwĩ ba Ahogbrẽ a bzi mo, moa la a dzu odzudzu mo ibu oklo ba Ahogbrẽ la a wo Ada, nga ba Eyesu Ekristi a la a kpaŋ mo.

²Nga okayiekŋe ta la opyapyaŋ, ta la oklo, ahi lo pyeŋ, moa a dzu ka la gimi fkatka.

³Agimi akyemeazba! Ame e zga ayi ngre okyku o da me e ta gimi akpa eshri ba oshla ba agi pyeŋ e pu ma. Ambo ohuhuhi ame e ka, alo o sa o raŋ o gre ba ame e ta gimi akpa, okyku o shĩ gimi okyku o da gimi e ta eko o ta-ta la esõ ekyekyeŋ, okyku obmi ba adlidzi ba Ahogbrẽ a shri a da moarehwĩ baŋ odgo okyekyeŋ nga o khwo.

⁴Okyku eshi moarehwĩ la a wo a ba Ahogbrẽ mbo, moa a ta adga shu a ba a gre agʼbaha bi, nga arekyeŋ a yi mbo. Nga moa a la a zhiŋ odlo ba okpoghwo ba Ahogbrẽ la egégŋe, okyku o da mo a hwiŋ anvaŋ a kpo ayakplo ba eshre ba moa a la a kpo. Nga, moa a tla Eyesu Ekristi. Aŋa sha angyiŋ a wo Are ba agi e wo abgo baŋ, nga aŋa sha angyiŋ a wo Adigi-odne. Ogbyigbyi Akpa ba Ahogbrẽ a sheŋ a lu odlo eshri ba ombgu ba moa á sõ mo edgu moare he lo.

⁵Ame e yi ba agimi e sheŋ e yi ekployaŋ a mbo eshri lo, ambo ame e klo e dzu gimi eka ba Adigi-odne a se moarehwĩ ba Esrayila a sku obiŋ ba Amasla. Ambo ambla nga, a jygi moarehwĩ la a bmi ba adlidzi mbo eshki mo.

⁶Agimi e tne aga eshri ba moanwyeadga ba ongyeŋ la a tspi okro ba ekʼpo mo e ygi ma sha mbo. Ambo moa a dzu okro moa a dzu ma a zga. Ahogbrẽ a sheŋ a klu mo a ta evbu ba obiŋ hi eshyẽ. Okro lo o hwĩ evbu o gre eshri. Moa a ta mo aslika la a shye nzenze, nga moa a dzu a bli Onda ba moa á sõ mo ombgu dne a mo.

⁷Agimi e tne aga eshri ba Osodom ta la Ogomora, ta la esku la e wo osusku ta la lo. Moarehwĩ ba ekro he lo moa a kpo eka ba moanwyeadga ba egbga a kpo. Moa a ta ekpa nga moa a kpo ayakplo la a wo shasha mbo. Okyku eka he, ewu mo angyiŋ e dzu ovo ba gbagbu-amo. Nga alo o kpo okyku o sa o nye moahwõ pyeŋ.

⁸Nga ozhezhẽ he lo angyiŋ, moarehwĩ la a nye onyenye ba akpro he lo, moa a ka okoka la o da mo anvaŋ, okyku o da mo a kpo odlobi ta la egʼba mo. Moa a la a dzĩ ekʼpo ba Ahogbrẽ, nga moa a la a dzĩ moare ba esesla la a wo ongyeŋ a mbo.

⁹Amakle la a wo anyuŋ-andakʼpo ba moanwyeadga ba Ahogbrẽ a mbo a kpo eka he lo mbo. Omba baŋ a la a kla okom ba Omusa ta la Eshitaŋ, okyku o da mo a yi are la á ba a sko lo, Amakle a dzĩ Eshitaŋ mbo. Ambo aŋa a lu ta la Eshitaŋ a lu mi le, Adigi-odne á tsa ŋo ewu!

¹⁰Ambo moarehwĩ he, moa a dzĩ ayakplo ba moa a ka lo a bmye mbo. Nga ayakplo ba moa a yi la esõ ba okoklo ba egʼba, a da mo a dzu eka ba ébyi akla, ayakplo he lo angyiŋ a jygi mo.

¹¹O wo ekplo ayiekŋe pa la mo o gre eshri! Moa a sõ ozhẽ ba Akayinu a sõ. Moa a shri eshri mo a zga okyku o kpo ayakplobi okyku amgbaŋ eka ba Abalam a kpo. Moa a bga mo okyku ba moa a shye eshri, eka ba Okora a mbo a shye eshri.

¹²Moarehwĩ he lo angyiŋ a wo moare la a shri eshre a shri a ba okro ba agimi e la e ri algo ba ekpom ma. Moa a la a wa a kpo ayi, nga moa a wo la anzi mbo ku-ku. Moa a yi eshri mo nga o khwo. Moarehwĩ he lo a wo eka ba etabro ba ogbga o hlu lo, ambo o da ogbu o ka o ba mbo. Moarehwĩ he lo a wo eka ba asĩ aki la a fu agbro mbo angyiŋ. Moa a wo eka ba asĩ aki ba moa a gʼbu lo emgbʼbo angyiŋ omba oflu, nga moa a mom pyeŋ.

¹³Moarehwĩ he lo a wo eka ondzami ba anyuŋ-ondzu la o wlu ayi o gre eshri. Moa a la a kpo ayakplo ba ototno la a wo eka afumvu ototno ba ami ba anyuŋ-ondzu. Moa a wo la anzi ma mbo. Moa a wo eka ba éyi enzo la e la e dzi wayawaya. Ahogbrẽ a sla okro la o wo evbu mgbyimgbyimgbyiŋ angyiŋ a shri a zga ma okyku mo.

¹⁴Enoko a wo arehwĩ ba embre ba efoha ba Adamu. Aŋa a sheŋ a lu odlo eshri mo a sheŋ a gre ayayga. A lu mi le, Agimi e ka! Adigi-odne á ba la moanwyeadga baŋ ba esesla, moa á wo ezbi nzenze,

¹⁵okyku o daŋ a sõ moarehwĩ pyeŋ ombgu. Nga á vu moarehwĩ ba odlobi la a kpaŋ odlo ba Ahogbrẽ mbo ombgu, okyku ayakplobi ba moa a kpo, ta la ekployaŋ a mbo la e wo shasha mbo ba moa edgu moarehwĩ he lo a lu eshri ba Ahogbrẽ!

¹⁶Moarehwĩ he lo a nyi agla ombamba pyeŋ, nga moa a hrẽ moahwõ. Moa a la a klo ayakplo ba ekhwo ba egʼba, ba moa a la a gno oraŋ ta la lo sha. Moa a la a nyom egʼba ta la emo, nga moa a la a tsom moahwõ okyku o da mo a hwiŋ anvaŋ o kpo ekplo ba moa a klo.

¹⁷Ambo agimi akyemeazba e ka! Agimi e dzu ayakplo ba moarehwĩ la a nyum oshpa ba Adigi-odne Eyesu Ekristi a lu a da gimi ayga.

¹⁸Moa a lu ka la gimi a lu mi le, Omba ba amom-abgo o ba bgu le, moare la á ba a lu ega á ygi gimi moa á ba. Edgu moarehwĩ he lo moa á kpo ayakplobi ba esõ mo e klo angyiŋ.

¹⁹Edgu moarehwĩ he lo angyiŋ moa a la a shri ogogʼba a shri a ba. Okoklo ba egʼba sha angyiŋ o ri ekʼpo eshri mo. Ogbgaodzi angyiŋ o la o ri ekʼpo eshri mo mbo.

²⁰Ambo agimi akyemeazba, agimi e zga gble nga e mbdzi egimi obmi ba adlidzi bimi ba esesla la o gre pyeŋ. Agimi e fa olu la ekʼpo ba Ogbgaodzi.

²¹Nga e dzu la oklo ba Ahogbrẽ omba ba agimi e dzu e bli Adigi-odne Eyesu Ekristi, okyku eshi okyku okayiekŋe baŋ he lo angyiŋ aŋa á ba a shri esõ ba gbagbu-amo á shri á da gimi.

²²Agimi e ka moa la a fu eha ayiekŋe.

²³Agimi e sko mo e sku ovo okyku o da mo a hwiŋ oshla. Agimi e ka moahwõ ayiekŋe la eyli, ambo e tla ayakplo ba eshre ba odlobi ba moa a la a kpo.

²⁴Okyku ŋa la a kpo a gbu baŋ a kpaŋ gimi a sku ibu ba otsugbu, aŋa a kpo a gbu baŋ a da gimi e dzu shasha la ovyevye egi ayi ba esesla baŋ,

²⁵okyku baŋ sha a wo Ahogbrẽ nga a wo Areoshla bi ibu ba Eyesu Ekristi la a wo Adigi-odne. Esesla, ta la oreŋ, ta la oshye, ta la ekʼpo, moa a dzu a baŋ a zga omba la o sheŋ o bre o gre pyeŋ, ta la ohuhuhi, ka la gbagbu-amo! Amin.