Read eggon Otsotsa 12 Bible Online

Otsotsa 12 - eggon bible

Otsotsa 12

¹Egŋe egagre e zgi Ongyeŋ. Ashekyeŋ la a ygi ariga la a wo olulum, a wo ma. Nga ashe he lo a pre ohwa adga. Nga éyi enzo otsko e wo etka baŋ.

²Omba o wo osusku baŋ á mbre a mo. Avuolo ba ombrombre a daŋ a wu okũ osheshye.

³Egŋe-ekyeŋ e sa e zgi Ongyeŋ nganga. Emabi ebme la e wo egagre e wo ma. E wo la ashri afoha, ta la agzo okʼpo. Nga etka ba oreŋ e wo eshriyaŋ a mbo.

⁴La eghre baŋ aŋa a gʼbu ogʼba okyeŋ eshki ba egʼba etra ba éyi enzo la e wo ongyeŋ, nga a da mo a ygi obiŋ. A tspi egi ayi ba ashe la a wo osusku ba ombrombre, okyku o daŋ a taŋ anwye ba ashe he lo, omba baŋ a mbre ŋa.

⁵Ambla he nga ashe lo a mbre anwyealom. Aŋa angyiŋ á ba a ri ekʼpo eshri ba émbre pyeŋ la opi ba ahwre. Ambo moa a sko anwye lo a knye, nga moa a shri ŋa a gre okro Ahogbrẽ ta la emgbakyiŋ ba oreŋ baŋ.

⁶Ashe lo a knye a gre akla. Ahe lo nga Ahogbrẽ a nyuŋ ekro a kpo okyku ŋa, okyku o da mo a kpaŋ ŋa okyku elum endgaotsko la elum ekʼpoefĩ.

⁷Ambla he nga eko e kso Ongyeŋ! Amakle pa la moanwyeadga la a wo ka la ŋa moa a ta eko ta la emabi egagre he lo. Emabi lo a mbo e ta eko pa la moanwyeadga baŋ.

⁸Ambo moa a kpo a gre emabi lo. Ambla he nga moa a se ŋa pa la moanwyeadga baŋ a sku Ongyeŋ.

⁹Moa a se anyuŋ emabi lo a sku Ongyeŋ! Aŋa angyiŋ a wo atsoŋ emabi egagre. Moa a bzi ŋa ma Areabi o mbo le Eshitaŋ, aŋa angyiŋ a la a bile obiŋ hi pyeŋ. Moa a shri ŋa pa la moanwyeadga baŋ pyeŋ a shri a ndba a ta obiŋ.

¹⁰Ambla he nga ame e gno anyuŋ enzi e zgi Ongyeŋ e lu mi le, Ohuhuhi angyiŋ oshla ba Ahogbrẽ o ba! Nga ohuhuhi angyiŋ Ahogbrẽ la a wo Anyuŋ-areŋ a tsa ekʼpo baŋ! Ohuhuhi nga Emisiya baŋ a tsa moare ekʼpo baŋ! Okyku eshi are la a tspi egi ayi ba Ahogbrẽ olulum ta la okyukyku nga a klo odlo pa la moanigi, moa a se ŋa a sku Ongyeŋ bgu.

¹¹Okyku amanzhli ba Anwye Ekylu angyiŋ, nga okyku oshpa adlidzi ba moa a la a nyum angyiŋ, moanigi a kpo a gre emabi egagre he lo. Moa a bmi ba o shri eshri mo o shri o di nga ba o kpukpu.

¹²Okyku eka he nga, agimi ongyeŋ pyeŋ, ka la gimi la e dzu ma, agimi e kpo ovye! Ambo ekplo ayiekŋe ta la obiŋ ta la anyuŋ-ondzu! Okyku eshi Areabi a gile a ba okro bimi. A bli la olom, okyku eshi aŋa a yi baŋ a wo la omba ple sha angyiŋ a ra ŋa a mo.

¹³Omba ba emabi egagre lo e ka e tspi ba moa a shri ŋa a ndba a ta obiŋ, a zga esĩ o kyku ashe la a mbre anwyealom he lo.

¹⁴Moa a shri angʼba aha ba anyuŋ asu a shri a da ashe lo okyku o daŋ o kso a yi okro ba odzuma baŋ la o wo akla. Ahe lo nga moa á kpaŋ ŋa okyku eyi etra la ogbu, okyku o da emabi e tka ŋa mbo.

¹⁵Ambla he nga emabi egagre lo e da ami a zgi anyu baŋ a dzẽ a lu ashe lo ma eka ba ondzu, okyku o da oshye ba ami la a dzẽ lo o shri ŋa o yi ero.

¹⁶Ambo obiŋ hi angyiŋ o kpo o ghwo la ashe lo. O hwile anyu nga o mbgi ami la a zgi anyu ba emabi.

¹⁷Ambla he nga esõ e tpi emabi egagre lo ayi ta la ashe lo e gre eshri. Okyku eka he nga, aŋa a gre okyku o ta eko pa la moaembre ba ashe he lo la a ra. Moahi lo angyiŋ a wo moa la a kpaŋ odaŋ ba Ahogbrẽ, nga a tspi kyekye ta la oshpa ba adlidzi ba Eyesu a shri a ba.

¹⁸Emabi e tspi akaŋ ba anyuŋ-ondzu lo.