Read eggon Otsotsa 13 Bible Online

Otsotsa 13 - eggon bible

Otsotsa 13

¹Ambla he nga ame e ka ebyi la e wo ebi, e zgi anyuŋ-ondzu lo. E wo la agzo okʼpo ta la ashri afoha. Ekpmye-shri e wo agzoyaŋ a mbo. Moa a ta eshko ebi a bre ashri baŋ.

²Ebyi la e wo ebi ba ame e ka lo e wo eka ba egbyi. Adga lo nga a wo eka ba adga ba egbaga. Anyu lo nga a wo eka ba anyu ba embdze. Emabi egagre lo e shri ekʼpo baŋ ta la emgbakyiŋ ba oreŋ baŋ, pa la moarehwĩ baŋ a ri oreŋ eshri mo pyeŋ a shri a da ebyi la e wo ebi he lo.

³Eshri ba ebyi lo ekyeŋ, e wo eka ba moa a bga lo. Ambo ero la e ngro eshri he lo e sheŋ e shaŋ. Moarehwĩ ba obiŋ hi pyeŋ moa a ka egbregbre nga moa a lu ebyi he lo ma.

⁴Moarehwĩ pyeŋ moa a hlu emabi egagre lo eshko okyku baŋ a shri ekʼpo baŋ pyeŋ a shri a da ebyi he lo. Moa a la a hlu ebyi he lo eshko a lu mi le, Ayi a wo eka ba ebyi he lo? Ayi a kpo ambgu ta la ebyi he lo a gbu?

⁵Moa a bmi a da ebyi ebi lo okyku o daŋ a lu ayakplo ba ototno la a gre eshri. Nga moa a bmi okyku o daŋ a ri ekʼpo okyku ehwa ekʼpoenyi la ehwa eha.

⁶Alo e ta ogbukyu o ygi Ahogbrẽ, nga e dzĩ eshko ba Ahogbrẽ, nga e dzĩ okro ba Ahogbrẽ a dzu ma pa la moarehwĩ baŋ la a dzu ma Ongyeŋ.

⁷Moa a bmi okyku o daŋ a kpo ambgu pa la moarehwĩ ba Ahogbrẽ, nga okyku o daŋ a kpo a gre mo. Ambla he nga moa a shri ekʼpo eshri embreyaŋ a mbo ta la olomyaŋ a mbo, pa la moarehwĩ ba obiŋyaŋ a mbo a shri a daŋ.

⁸Nga moarehwĩ pyeŋ ba obiŋ hi ba moa a ta eshko mo akpa ba esõ mbo omba ba moa a ka a kpo obiŋ hi a mbo a wo mbo, moa á hlu ŋa eshko. Akpa ba esõ he lo a wo akpa ba Anwye Ekylu ba moa a bga ŋa.

⁹Agimi e ngli atuŋ e gno odlo o wo ba agimi e wo la atuŋ ba o gno odlo!

¹⁰Areyaŋ a mbo ba moa a sheŋ a zga ba moa á vu ŋa, moa á vu ŋa omgbybi. Nga areyaŋ a mbo ba moa a sheŋ a zga ba moa á bga ŋa, moa á bga ŋa omgbybi la akõ. Okyku eka he, o raŋ o gre ba moarehwĩ ba Ahogbrẽ a ghwo esõ, nga ba moa a tspi osheshye ta la obmi ba adlidzi mo.

¹¹Ambla he nga ame e ka ebyi la e wo ebi ekyeŋ e sa e zgi obiŋ eshyẽ e ba. E wo la agzo aha ma. Agzo lo a wo eka ba agzo ba anwye ekylu, ambo e lu odlo eka ba emabi egagre lo.

¹²E kpo otum ta la anyuŋ ekʼpo ba ebyi la e wo ebi ba ori he lo egi ayi baŋ. Nga e vu obiŋ hi, pa la moarehwĩ ba obiŋ hi e da mo a hlu ebyi ba ori eshko. Ebyi ba ori he lo e wo ero la e ngro eshri ma, ambo e sheŋ e shaŋ.

¹³Ebyi la e wo ebi ba oha lo e kpo anyuŋ ayakplo ba egbregbre. Alo e da ovo o zgi ongyeŋ o ba obiŋ hi egi ayi moarehwĩ pyeŋ.

¹⁴Ambla he nga e bile moarehwĩ la a dzu obiŋ hi pyeŋ la ayakplo ba egbregbre. Moa a bmi okyku o daŋ a kpo ayakplo ba egbregbre he lo egi ayi ba ebyi la e wo ebi ba ori. Ebyi he lo e da moarehwĩ ba obiŋ hi pyeŋ a mbdzi ambgu okyku o hlu ebyi ba moa a ta lo etsa la e ngro eshri la akõ, nga ba alo e kpu mbo, eshko.

¹⁵Moa a bmi okyku o da ebyi ba oha e hlu ayaŋ ba esõ e ygi ambgu ba ebyi ba ori lo, okyku o da ambgu he lo a kpo a gbu nga a kpla egba, nga okyku o da lo a bga moare la a tla okyku o hlu lo eshko.

¹⁶Ebyi la e wo ebi he lo e vu moare pyeŋ omgbybi, moa la a wo akplokyeŋ mbo, pa la moa la a wo la ekʼpo, moaekŋe, pa la moangyiŋ, pa la moawaghrẽ, pa la moa la a wo moawaghrẽ mbo, nga a shri egŋe lo a shri a bre obgori mo, ta la ondaŋ mo.

¹⁷Arekyeŋ a kpo a gbu baŋ a gbmo emakyeŋ, o mbo le a shri emakyeŋ a shri a gbmo mbo, o wo le a wo la egŋe he lo ma ayga dne. Egŋe he lo e wo eshko ba ebyi la e wo ebi lo, o mbo le alamba la a wo okyku eshko ba ebyi he lo angyiŋ.

¹⁸Ohi lo o klo ba moa a kpo otum la okaobmye. Nga areyaŋ a mbo la a wo la okaobmye ma, a kpo a gbu baŋ a hwile eshyẽ ba alamba ba ebyi la e wo ebi he lo. Okyku eshi alamba he lo a wo eshko ba arehwĩ angyiŋ. Alo a wo endgaefĩ la ekʼpoefĩ la afĩ.