Read eggon Otsotsa 17 Bible Online

Otsotsa 17 - eggon bible

Otsotsa 17

¹Ambla he nga akyeŋ eshki moanwyeadga afoha la a wo la étku efoha lo, a ba okro me nga a lu mi le, O ba o da me e tsa ŋo eka ba moa á ba a nye ashe-eshra la a gbu eshko he lo eda. Aŋa angyiŋ a wo anyuŋ-osku ba moa a mbdzi lo osusku ta la éhwla nzenze.

²Moanyuŋ-areŋ ba obiŋ hi moa a ri eshra ta la ashe-eshra la a gbu eshko he lo. Moarehwĩ ba obiŋ hi nga, moa a da ayakplo ba eshre baŋ a la a kpo a gre mo egʼba.

³Ogbgaodzi o ri oshye me, ambla he nga anwyeadga lo a shri me a gre akla. Ahe lo ame e ka ashekyeŋ a dzu edgu ebyikyeŋ la e wo ebme. Moa a ta ashko la a wo abi a bre egʼba ba ebyi la e wo ebi lo pyeŋ. Ebyi he lo e wo ashri afoha, ta la agzo okʼpo.

⁴Ashe lo a ygi aknye la a wo ahwĩ mlemle ta la abme mbwi eka ba areŋ. Moa a dze anzho ba azurfa ta la ézhim la e wo la egbmo nzenze, ta la ézhim la e shka ayi aknye lo. Ashe he lo a kom etku ba azurfa obgo baŋ. Anzho la a wo eshre a bli etku lo slu. Alo angyiŋ a tsa edgu eshre baŋ a la a kpo.

⁵Moa a ta eshko ba eshyẽ la e wo ogyugyuŋ ondaŋ ashe lo. Eshyẽ lo e wo, Osku ba Ababilo agagre, aŋo angyiŋ o wo animoashe pyeŋ la a ri eshra pa la moa la a tpi moarehwĩ ba obiŋ hi ayi.

⁶Ame e ka e bmye ba ashe he lo a wa amanzhli ba moarehwĩ ba Ahogbrẽ ta la amanzhli ba moarehwĩ ba moa a bga mo okyku ba moa a kpaŋ odlo ba Eyesu. Amanzhli he lo a kpo ŋa ayi. Omba ba ame e ka ŋa, ame e ka egbregbre e gre eshri.

⁷Anwyeadga lo a zhĩ me a lu mi le, Aŋo o ka egbregbre okyku eshi? Ame é hwile eshyẽ ba ashe he lo ta la ebyi la e wo ebi la e shri ŋa he lo é doŋ o ka. Ebyi he lo e wo la ashri afoha ta la agzo okʼpo.

⁸Ebyi boŋ o ka he lo e wo la esõ ma ayga. Ambo e kpu bgu. Alo é ta adzadzi é zgi enzhe la e gyuŋ mgbyimgbyimgbyiŋ a mo, ambo moa a sa á bga lo. Moarehwĩ ba obiŋ hi ba moa a ta ashko mo ayga akpa ba esõ omba ba moa a zga esĩ a kpo obiŋ hi a wo mbo, moa á ka egbregbre omba ba moa a ka ebyi la e wo ebi lo, okyku eshi ayga e wo la esõ ma, ambo e wo la esõ ma ohuhuhi nga mbo, ambo alo é bla é ba.

⁹Odlo he lo o klo okaombye. Ashri afoha he lo angyiŋ a wo akukũ afoha. Ashe lo a dzu akukũ he lo angyiŋ. Ashri afoha a wo moanyuŋ-areŋ afoha angyiŋ.

¹⁰Moa atno eshki mo, moa a sheŋ a kpu bgu, ambo akyeŋ a yi a ra a la a ri oreŋ. Ambo ahwõ a ba a wo mbo. Omba baŋ á ba le, aŋa á ta abyi mbo.

¹¹Nga ebyi la e wo ebi la e wo la esõ ma ayga he lo, e wo la esõ ma nga mbo. Alo angyiŋ e wo anyuŋ-areŋ ba ofote. Aŋa a zgi eshki mo afoha ba oriori, ambo moa a sa á bga ŋa.

¹²Agzo okʼpo boŋ o ka he lo a wo moanyuŋ-areŋ la a zga esĩ ba o ri oreŋ a wo mbo angyiŋ. Ambo moa á ri ekʼpo okyku awa akyeŋ ta la ebyi la e wo ebi otsotse.

¹³Moa okʼpo he lo, moa a wo la edgu aga akyekyeŋ angyiŋ. Nga moa a shri ekʼpo mo ta la oreŋ mo a shri a da ebyi la e wo ebi lo.

¹⁴Moa á kpo ambgu ta la Anwye Ekylu. Ambo Anywe Ekylu pa la moarehwĩ la a lu ŋa ma la adlidzi baŋ a bzi mo nga a sla mo, moa á kpo á gre mo. Okyku eshi aŋa a wo Adigi-odne ba moadigi-odne, ta la Anyuŋ-areŋ ba moanyuŋ-areŋ.

¹⁵Anwyeadga lo a sa a lu pa la me a lu mi le, Ami boŋ o ka ba ashe lo a dzu ma hi, alo a wo moarehwĩ angyiŋ ba eshkiyaŋ a mbo ta la obiŋyaŋ a mbo, ta la olomyaŋ a mbo.

¹⁶Agzo okʼpo ta la ebyi la e wo ebi boŋ o ka he lo, moa á kpo ofpu ta la ashe eshra he lo. Moa á ngʼga ekployaŋ a mbo a sku ŋa abgo, nga moa á dzu ŋa á zga la ososo ototno. Moa á taŋ ebyi ba egʼba baŋ, nga moa á bga ŋa la ovo.

¹⁷Okyku eshi Ahogbrẽ a shri oklo ba o bli ayakplo baŋ a klo, a shri a zga esõ mo. A da mo a kpo lo la esõ ekyekyeŋ, nga moa a shri ekʼpo mo a shri a da ebyi lo okyku o daŋ a ri oreŋ lo, o tsa ba odlo ba Ahogbrẽ o bli.

¹⁸Ashe boŋ o ka he lo a wo anyuŋ osku la o ri ekʼpo eshri moanyuŋ-areŋ ba obiŋ hi pyeŋ.