Read eggon Otsotsa 18 Bible Online

Otsotsa 18 - eggon bible

Otsotsa 18

¹Ambla he nga ame e ka anwyeadgakyeŋ a zgi Ongyeŋ a ba obiŋ. A wo la anyuŋ ekʼpo ma. Ayimom baŋ nga a shki obiŋ hi pyeŋ.

²A ta enzi la anyuŋ enzi a lu mi le, Ashe lo a tsi a gbu! Ababilo agagre a tsi a gbu! Ohuhuhi nga ábili ta la egbgabi ba eshre sha e la e yi ibu baŋ a mo. Edgu awunuyaŋ a mbo la a wo eshre, moa a la a ta eygu mo osku lo eshyẽ,

³okyku eshi aŋa a shri ami anab baŋ a shri a da moare pyeŋ, nga a da mo a kpo ayi ta la lo. Obile ogagre ba ogroayi ta la ayakplo ba eshre angyiŋ a wo ahi lo. Moanyuŋ-areŋ ba obiŋ hi, moa a kpo ayakplo ba eshre ka la ŋa. Okyku baŋ a gro ayi a gre eshri, moa la a ta ekyku obiŋ hi moa a gbu angyiŋ okyku ŋa.

⁴Ambla he nga ame e gno enzi e zgi Ongyeŋ e ba e lu mi le, Agimi arehwĩ me e zgi! Agimi e zgi e sku osku lo! E kpo odlobi ka la ŋa mbo. Nga alo o raŋ o ba agimi e kŋe e bga ka la ŋa ewu he lo mbo!

⁵Okyku eshi odlobi baŋ o ta ma o gre eshri. Ahogbrẽ nga a la a tne aga ayakplobi baŋ a kpo.

⁶O kpo ka la ŋa eka baŋ a mbo a kpo ka la ŋo. O bla ekplo baŋ a kpo ka la ŋo, o kpo ŋa ma engyi eha. O ta ewu baŋ ma engyi eha, eka baŋ a kpo ŋo ewu.

⁷O shri ewu ta la esõ-etpiayi la e gre eshri angyiŋ, o shri o daŋ. Eka ba ekʼpo ta la ognoraŋ baŋ a shri a da eŋa. Okyku eshi aŋa a lu ta la eŋa a lu mi le, Ame ashe la e wo anyuŋ-areŋ e dzu eme ahe! Ame e wo ashe-eshaku angyiŋ mbo. Ame e yi esõ-etpiayi ku-ku mbo!

⁸Okyku eka he nga ewu lo é bga ŋa olum ondakyekyeŋ. Ewu lo angyiŋ e wo olo, ta la eso-etpiayi ta la embyle. Moa á ta ŋa ovo. Okyku eshi Adigi-odne Ahogbrẽ la á sõ ŋa ombgu a wo la ekʼpo nzenze ma.

⁹Moanyuŋ-areŋ ba obiŋ hi la a pu ka la ŋ a ayakplo ba eshre baŋ a la a kpo, ta la ogroayi ayakplo baŋ a la a gro, moa á wu okũ omba ba moa a ka ba osku lo o ri ovo nga o zgi odzo.

¹⁰Moa a kpo eyli ewu baŋ a la a kpo, okyku eka he moa a tspi ogyugyuŋ nga a lu mi le, Ekplo ayiekŋe! Ekplo la e ngro eshri! Aŋo anyuŋ-osku Ababilo la o wo ogagre nga o wo la ekʼpo! Omba ba awa akyekyeŋ sha moa a sheŋ ŋo ombgu boŋ!

¹¹Moarehwĩ la a ta ekyku obiŋ hi, moa a wu okũ okyku ŋa, okyku eshi arekyeŋ la a gbmo anzho mo a wo ma nga mbo.

¹²Arekyeŋ á gbmo azurfa o mbo le ezanariya, ta la ezhim la e wo la amgbaŋ nzenze, ta la ézhim la e shka ayi, ta la anzho mo ba elili, ta la aknye abme, ta la esiliki ta la aknye la a wo abme mbwi nga mbo. Nga arekyeŋ á gbmo ayakplo ba moa a sẽ lo la akiki la a wo adzi a gre eshri, ta la ayakplo ba moa a kpo lo la azhga enyi, ta la akiki la a wo egbmo nzenze, ta la ayakplo ba moa a kpo lo la ahwre abme, ta la ahwre, ta la ézhim la e shka ayi ba moa a bzi lo ma amablo nga mbo.

¹³Nga arekyeŋ á gbmo ama la a shka efpi ba moa a bzi lo ma esinamo, ta la emgbabi, ta la ama la a shka efpi, ta la emri, ta la efaraki nga mbo. Nga moa á gbmo ajige, ta la awargi, ta la eko, ta la esekʼpa, ta la andu, ta la ékylu, ta la ényma, ta la amatu ba ényma, pa la moawaghrẽ, ta la ámu moarehwĩ nga mbo.

¹⁴Moa la a ta ekyku a nyuŋ ŋa a lu mi le, Ayakplo adzadzi pyeŋ boŋ o klo o wo la alo ma a blu ohuhuhi. Nga angyiŋ boŋ pyeŋ, ta la oraŋ boŋ o la o gno moa a blu, nga aŋo ó hwiŋ lo ku-ku nga mbo!

¹⁵Moa la a ta ekyku nga a hwiŋ angyiŋ okyku osku he lo, moa á tspi la ogyugyuŋ ta la osku he lo, okyku eshi ewu ba osku he lo o dzu mo ekplo eyli. Nga moa á wu okũ nga á gbu ogbrẽ.

¹⁶Nga moa á lu mi le, Ekplo ayiekŋe! Ta la ekplo la e ngro eshri angyiŋ okyku osku ogagre he lo. Aŋa a la a bʼbu aknye ba elili la a wo ahwĩ mlemle, ta la abme mbwi eka ba areŋ. Nga aŋa a la a shki eŋa la aknye ba moa a dze azurfa, ta la ézhim la e wo la egbmo nzenze, ta la epal ma!

¹⁷Nga omba ba awa akyakyeŋ sha angyiŋ, angyiŋ he lo a jygi! Moandakʼpo ba amgblami pa la moa la a dzi amgblami, pa la moare la a kpo otum amgblami, pa la moahwõ la a la a hwiŋ algo mo anyuŋ-ondzu, moa a tspi la ogyugyuŋ,

¹⁸nga moa a lu odlo angyangyeŋ omba ba moa a ka odzo ba osku lo o ri ovo. Moa a lu mi le, Oskukyeŋ eka ba anyuŋ-osku hi ó wo ma ku-ku nga mbo!

¹⁹Moa a fa obiŋ a tsiŋ eshri nga moa a wu okũ nga a gbu ogbrẽ. Moa a gbu ogbrẽ a lu mi le, Ekplo ayiekŋe! Ekplo la e ngro eshri angyiŋ e wo ta la anyuŋ-osku he lo. Osku he lo angyiŋ o shri angyiŋ o da areyaŋ a mbo la a wo la amgblami ma! O ka, ekployaŋ a mbo ba osku he lo e jygi omba ba awa akyeŋ sha!

²⁰Ekployaŋ a mbo la e wo Ongyeŋ, e kpo ovye okyku ba moa a jygi osku he lo! Agimi arehwĩ ba Ahogbrẽ pa la moa la a nyum oshpa, pa la moarehwĩ ba Ahogbrẽ a hom mo otum, e kpo ovye! Okyku eshi Ahogbrẽ a sõ ashe lo ombgu okyku ayakplo ba osku he lo o kpo gimi!

²¹Ambla he nga anwyeadga la a wo oshye a sko ezhim la e wo eka ba anyuŋ eghwo a khwo nga a shri lo a ndba a ta anyuŋ-ondzu. Nga a lu mi le, Moa a ndba Ababilo anyuŋ-osku he lo a mbo á ta ekakahelo angyiŋ. Nga moa á ka ŋa nga mbo ku-ku!

²²Ambo moa la a bmyi égbani pa la moa la a bmyi ama, pa la moa la a hlu angom ta la angzo, moa á gno enzi mo osku he lo eshyẽ ku-ku nga mbo! Are ba otum ba abgo ba edguyaŋ a mbo moa á hwiŋ ŋa osku he lo eshyẽ ku-ku nga mbo. Nga moa á gno akyuŋ moa a gbga algo eghwo osku he lo eshyẽ ku-ku nga mbo!

²³Moa á ka ayimom ba ovo osku he lo eshyẽ ku-ku nga mbo, nga enzi ba anwyeshe ta la enzi ba anwyealom la a kyu ashe, moa á gno lo osku he lo ku-ku nga mbo. Ayga moarehwĩ boŋ la a ta ekyku a wo oshye pyeŋ a gre obiŋ hi. Nga aŋo o bile moarehwĩ ba obiŋ hi pyeŋ la agum boŋ ba akpro!

²⁴Moa a kpo Ababilo ewu okyku eshi moa a hwiŋ amanzhli moarehwĩ ba Ahogbrẽ a hom mo otum ta la amanzhli moarehwĩ ba Ahogbrẽ osku he lo, amanzhli moarehwĩ ba moa a bga mo obiŋ hi pyeŋ.