Read eggon Otsotsa 21 Bible Online

Otsotsa 21 - eggon bible

Otsotsa 21

¹Ambla he nga ame e ka ongyeŋ ohe ta la obiŋ ohe. Ongyeŋ ba ori ta la obiŋ ba ori o dam, nga anyuŋ-ondzu a mbo a blu.

²Nga ame e ka Osku ba Esesla, alo angyiŋ o wo Orushalima ohe, alo o zgi okro ba Ahogbrẽ Ongyeŋ o ba. Moa a nyuŋ lo a kpo nga, a dzu a kʼpu eka ba anwyeshe a ghwo anzho a dzu a bli anwyealom baŋ.

³Ame e gno enzi egagre la e zgi okro ba emgbakyiŋ ba oreŋ e la e lu odlo. E lu mi le, Ohuhuhi, odne ba Ahogbrẽ o wo pa la moarehwĩ angyiŋ a mo! Aŋa á dzu pa la mo nga moa á dzu moarehwĩ baŋ. Ahogbrẽ ababgo baŋ a mbo á dzu pa la mo, nga aŋa á dzu Ahogbrẽ mo.

⁴Nga aŋa á khwa amanyi pyeŋ á sku mo ayi. Eku nga é wo ma ku-ku nga mbo, nga esõ-ongʼba ta la owuokũ ta la avuolo moa á wo ma ku-ku nga mbo. Ayakplo agbyi pyeŋ a sheŋ a bre a gre bgu.

⁵Ambla he nga are la a dzu emgbakyiŋ ba oreŋ a lu mi le, Nga ohuhuhi, ame é da ekployaŋ a mbo e dzu elehe! Nga a sa a lu pa la me a lu mi le, O ta odlo he lo akpa, okyku eshi odlo he lo o wo adlidzi angyiŋ nga o wo odlo la o raŋ o gre ba moa a bmi ta la lo angyiŋ.

⁶Nga a lu mi le, Alo o khwo! Ame angyiŋ e wo Alfa ta la Omega, esĩ ta la eygi. Nga ame é fu ami enzhe ami ba esõ é shri é da areyaŋ a mbo ba oŋo o kpo ŋa ototno.

⁷Ame nga é dzu Ahogbrẽ ba areyaŋ a mbo la a kpo a gre, nga aŋa á dzu anwye me.

⁸Ambo moa la a kpo eyli pa la moa la a so moare ayi, pa la moa la a tpi moare ayi, pa la moa la a bga ebga, pa la moa la a kpo ayakplo ba eshre, pa la moa la a kpo ololo pa la moa la a hlu okpko eshko, pa la moa la a sheŋ akpro, enzheovo la e shum ovo nzenze angyiŋ e wo ma okyku mo. Eku he lo angyiŋ e wo eku ba oha.

⁹Akyeŋ eshki moanwyeadga afoha la a wo la atku afoha, la a bli la elolo efoha ba amom-abgo lo, a ba okro me nga a lu mi le, O ba o da me e tsa ŋo Anwyeshe lo. Aŋa angyiŋ a wo ashe ba Anwye Ekylu.

¹⁰Ogbgaodzi o ri oshye me, ambla he nga anwyeadga lo a sko me a shri a gre eshri ba anyuŋ aku. A tsa me osku ba Orushalima, alo angyiŋ o wo Osku ba Esesla. O zgi ibu ba Ahogbrẽ Ongyeŋ o ba obiŋ.

¹¹Alo o shka ayi la ayimom ba Ahogbrẽ. Osku lo o shka ayi eka ba ézhim la e wo egbmo nzenze. O wo eka ba ejaspa, nga o wo zhezheŋ eka ba amihĩ.

¹²Anyuŋ ogli ogagre la o hlu o wo ma. Ayizhẽ otsko a wo ma, nga moanwyeadga otsko moa a tspi ayizhẽ otsko lo. Moa a ta ashko ba egu otsko ba Esrayila ayizhẽ otsko lo.

¹³Ayizhẽ atra a wo agbayaŋ a mbo. Ayizhẽ atra a wo egi etne, nga atra a wo egi ero, nga atra a wo egi esu, nga atra a wo egi olum-ore.

¹⁴Moa mbdzi ogli ba osku he lo eshri ézhim otsko. Eshri ézhim he lo moa a ta ashko otsko ba moare otsko la a nyum oshpa ba Anwye Ekylu.

¹⁵Anwyeadga la a lu odlo pa la me a wo la opi ba azurfa ba ombganzho okyku o daŋ a mbga osku he lo ta la ayizhẽ, ta la ogli ba osku he lo.

¹⁶Agba ba osku he lo a tsa otsotse pyeŋ. Odzõ lo ta la ohwrẽ lo o tsa otsotse. Anwyeadga ba Ahogbrẽ nga a mbga osku lo la opi ba ombganzho baŋ. Odzõ lo o wo emil ezbikyeŋ la endgaetno. Nga ohlu lo ta la odzõ lo ta la ohwrẽ lo o wo okyekyeŋ.

¹⁷Anwyeadga lo a mbo a sa a mbga ogli lo. Ohlu lo nga o wo adga endgaeha la adga okʼpo la afĩ angyiŋ. Eka ba ema ombganzho baŋ a la a kpo otum ta la alo, alo o wo eka he lo angyiŋ.

¹⁸Moa a mbdzi ogli lo la ézhim ba ejaspa. Moa a kpo osku he lo la azurfa ba adlidzi, alo o wo zhezheŋ eka ba eglas.

¹⁹Nga ézhim ba okũ ba osku he lo, moa a ta lo ozba la edgu ézhim andanda-ndim la e wo egbmo nzenze. Ezhim okũ ba ori e wo ejaspa, nga ezhim ba oha nga e wo esafire, nga ezhim okũ ba otra e wo agati, nga ezhim ba onyi e wo emera.

²⁰Nga ezhim ba otno e wo oneksi, nga ezhim ba ofĩ e wo ekanaliya, nga ezhim ba ofoha e wo okoz, nga ezhim ba ofote e wo eberli, nga ezhim ba otronyi nga e wo otobaz, nga ezhim ba okʼpo nga e wo ekalsedoni, nga ezhim ba okʼpokyeŋ e wo otokoyi, nga ezhim ba otsko nga e wo ameti.

²¹Ayizhẽ otsko lo angyiŋ a wo ézhim otsko ba moa a bzi lo ma epal. Moa a kpo ayizhẽyaŋ a mbo la epal ekyeŋ sha angyiŋ. Moa a kpo anyuŋ-ozhẽ ba osku lo la azurfa ba adlidzi. O wo zhezheŋ eka ba eglas.

²²Ambo ame e ka Anyuŋ-akulu osku lo mbo, okyku eshi Adigi-odne Ahogbrẽ la a wo ekʼpo pyeŋ, ta la Anwye Ekylu angyiŋ, moa a wo Anyuŋ-akulu ba osku lo.

²³Osku he lo o klo ayimom ba olum ta la ayimom ba ohwa mbo, okyku eshi ayimom ba esesla ba Ahogbrẽ a la a tra osku he lo, nga Anwye Ekylu angyiŋ a wo emgbuovo ba osku he lo.

²⁴Nga moare-hwĩ ba obiŋ hi pyeŋ á dzi ayimom ba osku lo. Nga moanyuŋ-areŋ ba obiŋ hi moa á shri angyiŋ mo á shri á ba okro lo.

²⁵Ayizhẽ otsko ba osku he lo, á dzu ayimom ombamba pyeŋ. Moa á shki ayizhẽ lo mbo ku-ku okyku eshi okyukyku ó wo ahe lo mbo ku-ku.

²⁶Nga moa á shri ekʼpo ta la angyiŋ ba moa-rehwĩ ba obiŋ hi pyeŋ á shri á yi osku he lo.

²⁷Ambo ekplo-kyeŋ ba eshre é gre é yi osku he lo eshyẽ mbo ku-ku. Are la a la a kpo ayakplo ba anzi ta la are la a sheŋ akpro, á yi osku he lo mbo. O wo le moarehwĩ ba moa a ta ashko mo akpa ba esõ, ba Anwye Ekylu lo dne á ba a yi osku he lo.