Read eggon Otsotsa 6 Bible Online

Otsotsa 6 - eggon bible

Otsotsa 6

¹Ambla he nga ame e ka Anwye Ekylu, a hwile onono ibu ba ori eshki ba onono ofoha ba moa a reŋ. Nga ame e gno enzi ba ebyi ekyeŋ eshki ba ébyi enyi he lo. E lu odlo la enzi ba angyum-ogbu e lu mi le, Aŋo o ba!

²Ame e zhiŋ e ka nga, ame e ka enyma ekyle. Are la a vre enyma he lo a kom ota obgo, nga moa a shri okpmyeshri a shri a daŋ. Aŋa a zgi eka ba are la a ta eko nga a kpo a gre, nga okyku o daŋ a ri moare.

³Ambla he nga Anwye Ekylu a ngʼga onono ba ibu ba oha. Nga ame e gno ebyi ba oha e lu mi le, Aŋo o ba!

⁴Ambla he nga enyma ebme e zgi. Moa a shri ekʼpo a shri a da are la a vre lo okyku o daŋ a da eko e kso obiŋ hi, okyku o da moare a la a bga emo. Nga moa a shri anyuŋ akõ angyiŋ a shri a da are he lo.

⁵Ambla he nga Anwye Ekylu a sa a ngʼga onono ba ibu ba otra. Nga ame e gno egyi ba otra e lu mi le, Aŋo o ba! Ame e zhiŋ e ka nga, ame e ka enyma ehwĩ. Nga are la a vre lo a kom eskeli obgo baŋ.

⁶Nga ame e gno emakyeŋ eka ba enzi, alo e zgi okro ba ébyi enyi he lo angyiŋ e ba. E lu mi le, Angongo ba esekʼpa a wo okyku ohre ba olum okyeŋ. Nga angongo atra ba aglu-agbi a wo okyku ohre ba olum okyeŋ. Ambo agimi e tpi awargi ba olivi ta la ami anab ayi mbo!

⁷Ambla he nga, Anwye Ekylu a ngʼga onono ba ibu ba onyi. Nga ame e gno ebyi ba onyi e lu mi le, Aŋo o ba!

⁸Ame e zhiŋ e ka nga, ame e ka enyma la e wo ehwĩ mlemle. Eshko ba are la a vre lo e ri Eku, nga are la a ri Ahades a la a lu ŋa ma osususku. Moa a shri ekʼpo eshri ogʼba okyeŋ eshki ba egʼba enyi ba obiŋ hi a shri a da mo, okyku o da mo a kpo otum ta la akõ, ta la aguembyle, ta la ololo, ta la ébyi ba akla la e wlu ayi, okyku o da mo a bga moare.

⁹Ambla he nga Anwye Ekylu a ngʼga onono ba ibu ba otno. Nga ame e ka esõ ba moare ba moa a sheŋ a bga mo okũ ba ambgu. Moa a bga moahi lo okyku ba moa a su odlo ba Ahogbrẽ, nga okyku ba moa a zgi egŋe baŋ la adlidzidzi.

¹⁰Moa a lu odlo la enzi egagre a lu mi le, Adigi-odne la a wo ekʼpo pyeŋ, aŋo o wo la esesla pa la adlidzi ma! Ombayaŋ aŋo ó ba o sõ moarehwĩ ba obiŋ hi ombgu, nga ó ba o kpo mo ekŋe okyku ba moa a bga gi?

¹¹Moa a shri ariga akyle a shri a da areyaŋ a mbo eshki mo. Moa a lu a da mo ma moa a dzu a dum ple ayga, okyku o da eygi ba moare la a kpo otum pa la mo, pa la moanimo ba moa á ba a bga mo eka ba moa a bga moahi lo, e bli ayga dne.

¹²Ambla he nga ame e ka Anwye Ekylu. A sa a ngʼga onono ba ibu ba ofĩ. Ambla he nga obiŋ hi o zhga ara nzenze. Olum nga o zhiŋ o dzu ohwĩ eka ba oknye ohwĩ. Ohwa nga o zhiŋ o dzu obme eka ba amanzhli.

¹³Éyi enzo e gʼbu e zgi ongyeŋ e ygi obiŋ, eka ba ezhba ebze e la e hom e ygi obiŋ omba ba ogbga o hlu la osheshye.

¹⁴Ahrẽ nga a blu eka ba anyuŋ ogbga ogbu o bʼba aku o ta ayimom hu. Nga akũyaŋ a mbo ta la anwye-obiŋyaŋ a mbo, moa a gʼbu a sku okro ba moa a wo ma.

¹⁵Ambla he nga, moareŋ ba obiŋ hi, pa la moare la a ri ekʼpo, pa la moandakʼpo ba moanwyea-kyuŋ, pa la moangyiŋ, pa la moa la a gbu eshko, pa la moare pyeŋ, moawaghrẽ pa la moa la a wo moawaghrẽ mbo, moa a yi a ghre éhwla, ta la akukũ.

¹⁶Nga moa a bzi akukũ ta la ézhim a lu mi le, Agimi e zhiŋ e shum gi okyku o da are la a dzu emgbakyiŋ ba oreŋ a ka gi mbo. Nga okyku o da ombgu ba Anwye Ekylu o hwiŋ gi mbo!

¹⁷Okyku eshi anyuŋ olum onda ba ombgu he lo o ba bgu, nga ayi a kpo a gbu baŋ a nyom olum he lo a gbu?