Read eggon Otsotsa 8 Bible Online

Otsotsa 8 - eggon bible

Otsotsa 8

¹Omba ba Anwye Ekylu a hwile ibu onono ba ibu ba ofoha, ekployaŋ a mbo Ongyeŋ e dzu yoŋ okyku ogbu ba awa akyeŋ.

²Ambla he nga ame e ka moanwyeadga afoha ba moa a tspi egi ayi ba Ahogbrẽ. Moa a shri egbaru efoha a shri a da mo.

³Anwyeadga ahwõ la a wo la atku ba azurfa ba ama la a shka efpi a wo atku lo, a ba a tspi egi ayi ba ambgu ba oshriondba. Moa a shri anzho la a shka efpi nzenze a shri a daŋ okyku o daŋ a shri a ta ta la olu moarehwĩ ba Ahogbrẽ pyeŋ, nga okyku o daŋ a shri lo a shri a ndba ambgu la a tspi egi ayi ba emgbakyiŋ ba oreŋ.

⁴Odzo ba anzho la a shka efpi lo nga o gre ongyeŋ ta la olu moarehwĩ ba Ahogbrẽ. Alo o zgi abgo ba anwyeadga la a tspi egi ayi ba Ahogbrẽ.

⁵Ambla he nga anwyeadga lo a sko atku ba ama la a shka efpi a khwo nga, a fa ovo la o wo ambgu a bli atku lo. Ambla he nga aŋa a shri lo a ndba a ta obiŋ hi. Angyum-ogbu nga a ta akyuŋ, nga akyuŋ a zhle nzenze, ayimom ba angyum-ogbu a shka ayi ŋaŋaŋla, nga obiŋ hi o zhga ara.

⁶Ambla he nga moanwyeadga afoha a nyiŋ a dzu okyku o hlu egbaru mo.

⁷Anwyeadga ba ori a hlu egbaru baŋ. Ambla he nga ehre-ogbu pa la ovo, la moa a kŋe lo a bga pa la amanzhli, moa a gile a ygi obiŋ. Ambla he nga ogʼba okyeŋ eshki ba egʼba etra ba obiŋ hi o ri ovo. Nga ogʼba okyeŋ eshki ba egʼba etra ba akiki a mbo o ri ovo, nga asoso pyeŋ a ri ovo.

⁸Ambla he nga anwyeadga ba oha a hlu egbaru baŋ. Moa a shri ekplokyeŋ la e wo eka ba anyuŋ-akũ la a ri ovo a shri a ta anyuŋ-ondzu. Ambla he nga ogʼba okyeŋ eshki ba egʼba etra ba anyuŋ-ondzu o zhiŋ o dzu amanzhli.

⁹Ambla he nga ogʼba okyeŋ eshki ba egʼba etra, ba ama la a wo la esõ ma anyuŋ-ondzu a kpu. Nga ogʼba okyeŋ eshki ba egʼba etra ba amgblami a jygi.

¹⁰Ambla he nga anwyeadga ba otra a hlu egbaru baŋ. Eyi enzo egagre ekyeŋ la e tra eka ovo obze, e gʼbu e zgi ongyeŋ e gbu obiŋ e khwo nga e shki ogʼba okyeŋ eshki ba egʼba etra ba éhwla ta la anzhe ba ami.

¹¹Eshko ba eyi enzo he lo e ri Ono. Nga ogʼba okyeŋ eshki ba egʼba etra ba amihĩ, a no. Moare nzenze la a wa amihĩ he lo, moa a kpu, okyku ba alo a zhiŋ a no.

¹²Ambla he nga anwyeadga ba onyi a hlu egbaru baŋ. Nga ogʼba okyeŋ eshki ba egʼba etra ba olulum ta la o ba ohwa, ta la o ba eyi enzo, moa a tra lo. Okyku eka he nga ogʼba okyeŋ eshki ba egʼba etra ba ayimom, alo o blu. Ogʼba okyeŋ egʼba etra ba omba ba olulum, ayimom o wo ma mbo, okyukyku a mbo o wo ekakahelo.

¹³Ambla he nga ame e ka asu a la a ta oya. Ame e gno, alo a lu odlo la anyuŋ enzi a lu mi le, Ekplo ongroshri! Ekplo ongroshri! Alo é wo ekplo ewu é gre eshri okro moare la a dzu obiŋ hi omba ba enzi egbaru ba moanwyeadga atra ahwõ é zhle.