Read eggon Otsotsa 9 Bible Online

Otsotsa 9 - eggon bible

Otsotsa 9

¹Ambla he nga anwyeadga ba otno a hlu egbaru baŋ. Ame e ka eyi enzo e gʼbu e zgi ongyeŋ e gbu obiŋ. Moa a shri emakuli ba enzhe la e gyuŋ mgbyimgbyimgbyiŋ a shri a daŋ.

²Eyi enzo he lo e hwile enzhe lo e khwo nga, odzo o zgi enzhe lo kyukyukyu eka ba odzo o la o zgi aku la a ri ovo. Ahrẽ pyeŋ a gbu evbu okyku odzo la o zgi enzhe he lo.

³Amgbatso e zgi odzo lo ongyeŋ a ba obiŋ. Moa a shri edgu oshye ba énaŋ angyiŋ a shri a da mo.

⁴Moa a shĩ mo ma moa a ta asoso ta la akiki etsa mbo ku-ku ta la amahwõ la a la a hlu. Ambo moa a shri ekʼpo a shri a da mo okyku o da mo a ta moarehwĩ la a wo la egŋe ba Ahogbrẽ ondaŋ mo mbo sha angyiŋ etsa.

⁵Ambo moa a da engomagba he lo ekʼpo okyku o da mo a bga moarehwĩ he lo mbo ku-ku. Ambo moa a da mo ekʼpo okyku o da mo a kpo mo ewu okyku ehwa etno sha. Avulo ba engomagba he lo a wo eka ba avulo ba enaŋ e fu are.

⁶Omba ba ehwa etno he lo, moare he lo moa á klo eku, ambo moa á hwiŋ eku lo mbo. Nga moa á klo o kpu-kpu, ambo eku é knye é sku mo.

⁷Amgbatso he lo a wo eka ényma la e dzu e gno ba o yi ohwĩ ba eko. Emakyeŋ eka ba ekpmyeshri ba azurfa e wo eshri mo. Eyayi mo nga e wo eka ba eyayi ba moarehwĩ.

⁸Amasẽ-eshri mo a dzõ nzenze, nga azhga mo a wo eka ba azhga ba embdze.

⁹Moa a shri emakyeŋ la e wo eka ba ombyli ba ahwre angyiŋ a shri a shki eshaku mo. Angʼbo mo a la a kpo akyuŋ eka ba akyuŋ ba amatu ba enyma a la a kpo omba ba moa a knye oŋe a yi ohwĩ ba eko.

¹⁰Moa a kpo éghre, ta la ekʼpi eka ba ekʼpi ba énaŋ. Nga moa a wo la ekʼpo ma okyku o kpo moare ewu la éghre mo he lo angyiŋ okyku ehwa etno.

¹¹Areŋ la a ri ekʼpo eshri mo angyiŋ a wo anwyeadga la a kpaŋ enzhe la e gyuŋ mgbyimgbyimgbyiŋ e gre eshri. Eshko baŋ olom moaEyahuda e ri Abadoŋ. Nga la Egrise alo e ri Apoliyoŋ, alo o dzu, Ebga.

¹²Ewu ba ori lo o khwo. Ambo ambla he nga ewu edgu eha e yi é ba.

¹³Ambla he nga anwyeadga ba ofĩ a hlu egbaru baŋ. Ame nga e gno enzi, alo e zgi émvygi ba ambgu ba azurfa la a tspi egi ayi ba Ahogbrẽ.

¹⁴Enzi he lo e nyuŋ anwyeadga ba ofĩ la a wo egbaru ma e lu mi le, Aŋo o se moanwyeadga anyi ba moa a klu mo a ta akaŋ ondzu ogagre ba Oyufrati!

¹⁵Ambla he nga moa a se moanwyeadga anyi lo. Moa a nyuŋ a kpo okyku omba he lo ta la onda ba oha ba eyi he lo, okyku o da mo a bga ogʼba okyeŋ eshki ba egʼba etra ba moarehwĩ ba obiŋ hi pyeŋ.

¹⁶Moa a lu a da me ma moanwyeakyuŋ la a vre ényma a wo emiliyo endgaeha.

¹⁷Nga okoka ba ame e ka, ame e ka ényma lo, pa la moanwyeakyuŋ la a vre lo. Ombyli ba ahwre ba moa a wo la alo ma o wo obme mbwi eka ba ovo, nga o sa ahwĩ mlemle eka ba etu. Nga o sa o wo abme mlemle eka ba eri ba azhi. Ashri ba ényma lo a wo eka ba ashri ba émbdze. Ovo ta la odzo, ta la eŋe la e bmye ovo e gre eshri e zgi anyu mo.

¹⁸Ovo ta la odzo, ta la eŋe la e bmye ovo e gre eshri, moa a zgi anyu ba ényma lo, nga moa angyiŋ a bga ogʼba okyeŋ eshki ba egʼba etra ba moarehwĩ ba obiŋ hi.

¹⁹Oshye ba ényma lo o wo anyu mo, ta la éghre mo. Éghre mo e wo eka ba amabi la a wo la ashri ma. Nga la alo angyiŋ moa a la a shri avuolo a kom moare.

²⁰Moarehwĩ ba obiŋ hi la a ra, ba ewu he lo e bga mo mbo, moa a ka a ngʼba a sku ayakplo ba mo ababgo mo a kpo mbo. Moa a ka a ngʼba a sku egbga ba moa a la a hlu mo eshko mbo. Nga moa a ka a ngʼba a sku okpko ba azurfa ta la ezanariya, ta la agbro, ta la ezhim, ta la aki, ba moa a la a hlu mo eshko mbo. Okpko o wo la ayi ba moa a ka a gbu mbo, nga moa a wo la atuŋ ba moa a gno mbo, nga moa a dzi a gbu mbo.

²¹Moarehwĩ he lo moa a kyu ebga abgo mbo. Moa a dzu gaŋ ta la ololo moa a la a kpo, ta la ayakplo ba eshre ba moa a la a kpo, nga moa a la a si esi.