Read ejagham Matiyu, echî 17 Bible Online

Matiyu, echî 17 - ejagham bible

Matiyu, echî 17

¹Nji mfín eságasá a chíŋi, Jisos a bhîŋ Pita na Jems na Jon nnyo mmon-i-nnyen i Jems, a kô ábho ásá á jâk ka ósô ekpatə́m egúí.

²Nji á síi ágo, Jisos a kpíghi ngu. Ochî obhê ó chə́bhe ó yak noŋ njúí, oguŋi mbi a kaghê ó kə̂t ó bhara nâ ebhát ka etʉri.

³Ane mbá ásá mba yê a kóe nná a jak á yên Mosis na Erayija á fâp á kí kubhí na Jisos.

⁴Kən Pita a sə́re Jisos se, “Ntûfâm, é nop êt e ri mfá. Ájoé ó kot, tîk m gbê ntəm ésá, jə́t mbâ eya, nji tat mbâ Mosis, nji ngá mbâ Erayija.”

⁵Nji Pita á chorá áno, átʉ́k í ngurobhú á bhara kpóŋ, á bhúi ábho ka eji njí. Eyum é fâp ka átʉ́k áma se, “Ḿfa a ri Mmon okot omé nnyo ḿ foná ekpatə́m ogyebhá-ḿbə́ŋé. Yûk ên yê.”

⁶Nji ágbán mbá á yúghi nchot nnyí, á fôn ekpatə́m efup, á gbô nkə́p na ochî ábho ka nsi.

⁷Jisos a bhâ kə́me mân ábho a sə́re ábho se, “Duî ên ngyím, ka kpó fup ên.”

⁸Nji á yúŋi echî á kêp, kpe nne á ká kpo yen é ká chiŋi Jisos átíŋ.

⁹Ebhú á kí bhət egúí njí á chə́bhe njəm, Jisos a sə́re ábho se, “Ka sə́ré ên kpe nne yót ejûm nji o yéne ên ta ofú ó sî mbi á kí yim Mmon-i-ntem-nne a nyəmé ka ekʉ̂.”

¹⁰Ágbán í Jisos á bhâ bhə̂p yê sê, “Jen nji atóŋá-ebhín á kí chot sê Erayija tîk a râŋ mbá a bhák?”

¹¹A táme ábho se, “Ka etʉri, Erayija a fonê ka ebháám, a bhá tʉrí chénchén achot a kí.

¹²Kən n kí səre ên bəre Erayija ta a bhâ kən ane á ká məŋé sê nâ yê. Á yîm nji-nji á kóre na yê. Nâ ekpak á kí karé fə́ne Mmon-i-ntem-nne oseŋe.”

¹³Nji Jisos a sə́re ábho ejûm njí, ane abhê á mə́ŋe mân sê Erayija nnyo yê á chorá áno a ri Jon nnyo mfúgha-ane-ayép.

¹⁴Nji á chə́bhe njəm á bhâ kpúghi ekam ane njí óséré egúí, nne yót a bhâ gbô Jisos ka akát,

¹⁵a chôt se, “Ntûfâm, ri mmon omé nsôn, ichʉk mfi í rî yê ka biji í son í chiŋ. Ebhú í fi yê, á gbok ka ayép ebhú tat, nji tat a gbok ka ngûn.

¹⁶N kóe yê m bák bəre ágbán abhâ á yîm yê a son, kən kpe nne nnyo a məŋê oyim cháŋ.”

¹⁷Jisos a kpíghi a sə́re atóbhá abhê se, “Abhon ebhú njí, obhí jen na ên? Echî ó bhó ki ên ḿbə́ŋé na Obhasi a ri jen? Ó woma ên sê ta ń ká nan na ên? Ń kúmi na ên ka nyâ é bhík? Kô ên mmon ányo bhák ên ngá.”

¹⁸Nji á kóe mmon nnyó á bhak, Jisos a nyân ojê mbí ó mághe yê. Biji í sôn mmon nnyó ka ngyím ányi.

¹⁹É kpó kət, ágbán abhê á bhə̂p yê njəm-ńjə̂m sê, “Jen é yími kən é ka məŋé oyighí ojê mmon ányo?”

²⁰Kən Jisos se, “Ḿbə́ŋé eyəné nnyi o kíi ên na Obhasi á ka son. Deê ń sə́ré ên bəre ebhú sê ḿbə́ŋé nnyi o kíi ên na Obhasi a ri kpe mkpât noŋ nkap i mósta eê, kə́n o kí bhik ên esə́rə́m egúí ńjî se, é rúi ka eji é gyím, é yóŋé eji. Egúí fə́ne é kí yuk ên. Kpe ejûm nji kə́n ó bhó bhik ên eyimím cháŋ.[

²¹Kən deê ó mə́ŋe ên sê a ri njaé ekáám na egoróm Obhasi nâ í kí yim nne a mə́ŋe oyighí ntʉ́ghi ojê mbí, kpe ejûm etat cháŋ.]”

²²Nji ágbán abhê chénchén á chə́me ka Gariri, Jisos a sə́re ábho se, “Tîk á fî Mmon-i-ntem-nne á káre mbâ ane

²³mba tîk á yúi yê. Kən ka osúí mfín ésá, Obhasi tîk a yîm yê a chə́bhe njəm ka ekpin.” Nsae a súi óbhə́ŋé ágbán abhê kpe-eji nji á yúghi nchot i ńsé ábho nnyí.

²⁴Nji Jisos na ágbán abhê á síi Kapanom, ane mba á bhə́bha ntí mmi kpe énê a fonê ka etúbhúm ka ókʉ́rí achot Obhasi á bhâ bhə̂p Pita sê, “Nâ-ngá ńsé owəné a ri ágo a túbhá ntí ókʉ́rí achot Obhasi a?”

²⁵Pita a táme se, “Á bhó tup nná jen?” Pita a gyê mân njû a tôp Jisos, kən Jisos nâ a raŋê mbá a chôt se, “Pita, sə́ré ə̂m! Énê nnyo a fonê ka etúbhúm ntí ókʉ́rí achot Obhasi? Énê nnyo a fonê ka ekarám ntí-echî mbâ atúi-ofâm í ngun nnyí? Afoná-nsi kən ajéné?”

²⁶Pita a táme yê se a ri ajéné. Jisos se, “Áno. Nâ é fap sê afoná-nsi á ká fon ka etúbhúm ntʉ́ghi ntí mmí.

²⁷Kən é ká nop sê é yîm ḿbə́ŋé a yám ane mbá. Choŋ ka aya na óyôp obhâ. Ndaŋa-mbá nsí nnyi ó yəp, tîk o yên ntí ka nnyo nsí ányi. Ntí mmí ḿ bik mmi êt ábháe e kí tup. Deê mân ó jî túp, ó káre ábho.”