Read ejagham Matiyu, echî 18 Bible Online

Matiyu, echî 18 - ejagham bible

Matiyu, echî 18

¹Ka ebhú áji, atóbhá Jisos á bhâ bhə̂p yê sê, “Énê a faŋê a chíŋi ntem ka otúi Obhasi?”

²Jisos a bhîŋ mmonche a gyími ábho ka ochî.

³A sə́re mân ábho se, “Deê ń sə́ré ên bəre nne nnyo á ka yóŋé ḿbə́ŋé eye, a joé jáé noŋ nnyi mmonche, á bhó yen otúi Obhasi bhúghí-bhúghí.

⁴Məŋê ên mân sê nne nnyo a faŋê a chíŋi ntem ka otúi Obhasi a ri yê nnyo á ko biji se kpe ejûm yê á ka fáp noŋ mmonche ntʉ́ghi nnyó.

⁵Kpe énê nnyo á fi ntʉ́ghi mmon nnyó a kâk ka biji ka mbiŋ amé, a fiî ə̂m áno.”

⁶“Kpe énê nnyo á choe mmonche ntʉ́ghi nnyó a yíghi ḿbə́ŋé nnyi a kíi na mme, é nôp é chîŋ á kô ekpatə́m í ntáé isú á bhôp ntʉ́ghi nne ányo ka ntuŋ, á bhî ka aya.

⁷É bhip é chiŋi ochíŋ na ngun nnyí nji iyîm í rî mbi í kí yim nne a yighí ḿbə́ŋé na Obhasi. Iyîm mbí í rî ka efábhám, kən tîk é bhîp é chîŋ na ntʉ́ghi nne ányo nnyo a kí yim ḿbə́ne í fáp.

⁸“Ájoé mân kpe a ri obhô obhâ kpe ekát nâ í kí kak wâ ka obhí, gbût bhum. É nop é chiŋ sê nne a gyé ka ekpin nji eyô biji ejê jə́t cháŋ, na nji a gyé ka erəmta-ngûn oseŋe ka ótúm-ótúm na ayô biji ekan-ékân.

⁹Ájoé eyə̂t ejâ é kí kak wâ ka obhí, kpaghê ńjə́ne bhum. É nop é chiŋ sê ó gyé ka ekpin na eyə̂t jə́t na nji ó fôn ḿmáne ábháe chénchén, ó gyé ka erəmta-ngûn.”

¹⁰Jisos se, “Nne a kâ kêp kpe mmon yót mfá se kpe ejûm á ka fáp. Deê ń sə́ré ên bəre ka otúi Obhasi, baénjel mba Obhasi a kíi se á bhábhé abhon mbá nâ á kúma á kpira na Ńsé omé ka ósô. [

¹¹Mmon-i-ntem-nne a bháe ka nsi nnyí a bhá yim ane mba á táne, á chə́bhe njəm ka nnyen-i-mbá.]

¹²“Kére ên kpá nchot nnyí. É kó sê nne owəné yót a fôn nsam i mbúi érôn, kən mbúi yə́t a tân. Ó kere ên sê nne nnyó a kí yim nan? A ri a maghé mbi ngá ka eji édî a jí wom nnyi a táne áno.

¹³Deê ń sə́ré ên bəre ebhú nne nnyó á wom kpát ta a yên, a kí fon ogyebhá-ḿbə́ŋé ka obhô mbúi nnyí a chíŋi mbi ngá mbi ó rî ka njû kpe ejûm é ká yim ábho.

¹⁴Ka ekpak njí fə́ne nâ Ńsé owəré ka ósô á ka wóm se kpe mmon nnyó yót a tán.”

¹⁵Jisos se, “Ájoé ntem a yîm wâ obhí, choŋ mbâ eye, yim yê a məŋé ejûm ebhí nji yê a yimî wâ. Ka yîm se ngun ndə́m á mə́ŋe, deê é kə́t na ên ábháe. Ájoé nji o sə́re yê, a yûk, məŋê se ó chəbhe njəm ó ko ekone ó bha ka étíŋanti ejə́né.

¹⁶Kən ájoé á ka yúk, bhiŋ kpe ntem yót, kpe ábháe, choŋ ên mbâ eye, a gyímí wâ noŋ ntî-isê. Kən nchot a joé mfoné nchot, deê atî-isê á jóe á sí ábháe, á sí ásá.

¹⁷Ájoé ó jî chôt ên na ntem nnyó kən á ka yóŋé, sə́re mân nchot nnyí ka echəme atóbhá abhámé. Nji á ka kpó yuk fə́ne mfá, nâ kêp ên yê ńgô chichi noŋ nne nnyo á ka bhik ejoóm ka echəme ejə́né. Kêp ên yê fə́ne noŋ nyima-obhí.

¹⁸“Deê ń sə́ré ên bəre kpe jen nji ó səre ên ka nsi nnyi sê nne a kâ yîm áno, nâ noŋ á kí ko fə́ne ka ósô. Nji ó kam ên sê nne a yim áno, nâ noŋ á kí ko ka ósô.

¹⁹“Deê ń sə́ré ên m kpê bəre kpe bhaghé ebhú nji ane ábháe mba á tóbha Obhasi á kumí ka eji á kâm sê á góre Obhasi a yim ejûm a karé ábho, Ńsé omé ka ósô a kí yim ńjə́ne a karé ábho.

²⁰Kpe bhaghé eji nji ane á kumí á sî ábháe na ásá, ka mbiŋ amé, mme n di áfo na ábho.”

²¹Pita a bhâ bhə̂p Jisos se, “Ntûfâm, ntə̂m ébhík nâ ntem a kí yim ə̂m obhí kən n dik yê nsôn? Ntə̂m enígisá a?”

²²Kən Jisos a táme yê se, “Deê ń sə́ré wâ bəre ntə̂m enígisá asík. O kí ri ntem nsôn ntə̂m nsam ésá njəm ófó, ntə̂m-ntə̂m enígisá.

²³Echî aŋ? Otúi Obhasi ó rî áno noŋ egan í ntûfâm yót nnyo a timî se yê a jeghé nchot arə́m mma ágbán abhê á fíi yê.

²⁴A róghe ábho ebhiŋím, a bhə́bhá. Ka ebhú áji, á kô ḿgbán yót á gyê nnyo a fiî yê ntí ka otâk, ka otâk.

²⁵Nji ḿgbán nnyó á ka fon ntí mmí ḿ bík, ntûfâm nnyó a sə́re se á gúri ḿgbán nnyó na nkáé na abhon noŋ asʉ́ŋ. Se á gúri fə́ne iyîm ibhê chénchén, á fé yê ntí imê.

²⁶Kən ḿgbán nnyó a gbô ńsé ka akát, a góre yê se, ‘Ńsé, ń gore wâ, karê ə̂m mô ebhú, tîk n gôm arə́m amâ chénchén.’

²⁷Nsôn a yîm ńsé owe nnyó kpe-eji, a sə́re yê se a kpéré a kə́t na arə́m áma.

²⁸“Nji ḿgbán nnyó a maghê a jak, a jî kpúghi ntem-ḿgbán nnyo a fiî yê mô mkpât arə́m. A fî ntem nnyó ka ntuŋ se a gom arə́m amê ka ngyím ányi.

²⁹“Kən ntem nnyó a gbô ḿgbán nnyó ka akát a góre yê se, ‘Ń gore, karê ə̂m mkpât ebhú, tîk n gôm arə́m amâ.’

³⁰“Kən ḿgbán nnyó á ka kam, a kô ntem nnyó a jak ka esup, á kûm yê sê ta a gôm arə́m mmá á mân, kən a fábhá.

³¹Ágbán mba ngá á kpó yen ejûm njí, nsôn a súi óbhə́ŋé ábho kpe-eji. Á jâk á jî sə́re ntûfâm nnyó ejûm nji ḿgbán owe ányo a yimî.

³²“Ntûfâm nnyó a bhîŋ ḿgbán nnyó a sə́re yê se, ‘We a ri mfoné-mfoné nne mbí. Ń di wâ nsôn ka ekpatə́m arə́m mma o fiî ə̂m, ka o gorê ə̂m se ń dî wâ nsôn.

³³O fonê kə́n ka eriím atem nsôn ka arə́m mma á díi wâ, noŋ mme n diî wâ nsôn eróŋ.’

³⁴É yâm ntûfâm nnyó é kpô. A kâk ḿgbán nnyó ka ókúmí á kpə́re yê se ta a gôm arə́m amê chénchén kən a fábhá eróŋ.”

³⁵Jisos mân se, “Nâ noŋ Ńsé omé ka ósô a kí yim na ên ájoé ó bhó ri ên atem nsôn na ḿbə́ŋé fép ka obhí mbi á yími ên.”