Read ejagham Matiyu, echî 20 Bible Online

Matiyu, echî 20 - ejagham bible

Matiyu, echî 20

¹Jisos se, “Otúi Obhasi ó rî noŋ nne etat nnyo a fonê ebhin ejê. A bhâ mághe njû eye na ofú-ofú a jí wom ane etûm á bhá yîm ebhin njí.

²A chôt na ábho, á kâm sê tîk a káre ábho ntí mmi kə́n ḿ bîk etûm ofú ndə́m. A tûm mân ábho á jak etûm.

³“Ńkánínká a kpô sí érôn-énî na ofú ábhi, nne nnyó a jak ka éré ogəm, a jî yên ane etat á gyím, ejûm á yíma cháŋ.

⁴A sə́re ane mbá se á jî fə́ne á jí yîm etûm ka ebhin ejê. Se tîk yê a káre ábho mô ntí nnyo a bhighî obhik.

⁵Ane mbá á kâm á jak. “Ńkánínká a kpô sí ófó na ébháe na nchên ányi, na ésá nnyi egu, nne nnyó a kpô wóm ane etûm mba tat a kâk, se á yîm fə́ne ebhin ejê.

⁶“Ta ńkánínká a kí si érôn na egu, nne nnyó a kpô ji ka éré ogəm a jî yên ane etat á gyím. A bhə̂p ábho se, ‘O gyím ên mfá jen o bhíbhá ên ofú ndə́m ka chichi?’

⁷“Ane mbá á táme yê sê ábho á ká yén nne nnyo a kí karé ábho etûm, á kí yim mân nan? Nne nnyó a tô ábho se á jî yîm etûm ka ebhin ejê.

⁸“Egu é kpó to é sí, nne nnyó a bhîŋ nne-echî ane-etûm abhê a sə́re yê se a chəmé chénchén ane mba á yími etûm ka ofú ábhi, a karé ábho ntí. A sə́re yê se deê a róghé ekarám mbâ ane mba yê a kóe nsígha-njə̂m ta a sî ka mba ndaŋa-mbá.

⁹“Nji nne nnyó a kí karé ntí mmí, a káre ane mba á róghe etûm ka ńkánínká érôn na egu, ntí etûm ofú ndə́m.

¹⁰É kpó si ka mba á róghe etûm na ofú-ofú, ane mbá á kí kere sê tîk á káre ábho ntí ń tî ń chíŋi mmi ane mba ngá, kən á káre ábho ntí etûm ofú ndə́m ekan-ékân.

¹¹“Nji á kóe ntí mmí, á róghe mfone ebhin nnyó eməmə́m ka ntuŋ sê,

¹²é kí yim nan a káre ábho ntí ekan na ane mba a kóe ka etûm nsígha-njəm. Ane mbá á yim etûm ka áwa mát, kən ábho á kət ka njúí ofú ndə́m á yim ekpatə́m etûm?

¹³“Kən mfone ebhin nnyó a táme nne ábho yót se, ‘Ntem, ń ka moé ên omoé, ntí mmi n karê ên nâ mmi e kamê na ên sê ń káre ên ka etûm ofú ndə́m.

¹⁴Kô ntí imâ choŋ kʉ́ri. Mme nâ n wóme bəre ń káre nne nnyo nsígha-njəm nnyó ntí ekan noŋ imâ.

¹⁵A ri ntí imámé, ekpak é kóre ə̂m bəre ń yîm na ḿmə́ne, eji é rî nchot oó, cháŋ. É kí yam wâ ḿbə́ŋé, ka n kí toŋe onobhá-eji na ane a?’ ”

¹⁶Jisos a jéghe mân egan ejê se, “Məŋê ên mân sê ane mba á rî ochî, tîk á chə́bhe mbá-njəm, mba á rî mbá-njəm, tîk á chə́bhe ochî.”

¹⁷Ebhú Jisos a kí ji nnyi Jerusarem, a bhîŋ ágbán abhê ófó na ábháe a sə́re ábho kəma-kəma se,

¹⁸“Yûk ên, é jak áno nnyi Jerusarem. Tîk á fî Mmon-i-ntem-nne, á káre mbâ ane-echî akará-agore Obhasi na atóŋá-ebhín. Tîk ane mbá á kími nchot sê á yúí yê,

¹⁹á kô yê á káre mbâ ajéné. Ajéné mbá tîk á kâk yê ntuŋ, á tə̂m yê, á kûm yê ka ego. Kən ebhú á kpo á kə̂n yê, a kâ mfín ésá, tîk Obhasi a yîm yê a chə́bhe njəm ka ekpin.”

²⁰Nnyen abhon í Sebedi a kô abhon abhê a bhák mbâ Jisos, a bhə́ne yê ka akát a góre yê se a yim ejûm etat a karé yê.

²¹Jisos a bhə̂p yê se, “Jen?” Nne-nkáé nnyó se, “N kí wom ó chimi se ebhú ó kumí ka otúi obhâ, tîk o yîm abhon abhámé mbá ábháe, yót a kúmi wâ mkpe obhô-orûm, yót mkpe obhô-okáé.”

²²Kən Jisos se, “Ó ka məŋé ên ejûm nji ó bhəbha áno. Deê ḿ bə́p ên kpá ebhə̂p. Nâ-ngá tîk o kâm ên o yên ên oseŋe mbi tîk n yên a?” Á kâm sê, “Nn̂.”

²³A sə́re mân ábho se, “Ka etʉri, tîk o kâm ên oseŋe obhámé, kən ń ka fon ikom mfi n kí saŋ ane mba á kí kumí ə̂m mkpe obhô-orûm na mkpe obhô-okáé. Ngûm nnyí a ri mbâ ane mba Ńsé omé a sâŋ se á kúmi.”

²⁴Nji ágbán mba ngá ófó á yúghi nchot nnyí, á fôn ekpatə́m oyámá-ḿbə́ŋé na abhon-í-nnyen mbá ábháe.

²⁵Kən Jisos a bhîŋ ábho chénchén a chôt se, “Ó məŋe ên sê ka ekpin i ngun, atúi-ofâm ábho nâ á fóne ikom, kpe nnyón nne a ri ka óséré ábho.

²⁶Kən áno asík é kí joé na ên. Nne owəné nnyo a kí wom a joé nne-echî, a ri a joé noŋ ḿgbán mbâ atem mba ngá chénchén.

²⁷Nne owəné fə́ne nnyo a kí wom a joé ochî, deê a gbo osʉ́ŋ a karé atem.

²⁸Noŋ Mmon-i-ntem-nne nnyo á ka bhá se ngun á tʉ́k yê, kən a bháe ngun otʉ́k. A bháe okaré fə́ne ekpin ejê se ane etî-etî á sém.”

²⁹Nji Jisos a kí maghé Jeriko, ekpatə́m ekam ane á tôp ábho á kí ji.

³⁰Atáná-amə̂t ábháe á kûn ka mkpe mbá. Nji á yúghi sê Jisos nâ á chiŋa, á róghe ekúghúm sê, “Ntûfâm, Mmon i Debhit, ri êt nsôn.”

³¹Ane ka ekam njí á nyân ábho sê á mághe ejok. Kən á ká maghé, á kpére á kûk mân na ikom-ikom sê, “Ntûfâm, mmon i Debhit, ri êt nsôn.”

³²Jisos a gyími, a bhîŋ ábho a bhə̂p se, “Ó woma ên ń yîm jen ń káre ên?”

³³Á táme sê, “Ntûfâm, e kí wom ó yîm êt é yén mbá.”

³⁴Jisos a rî ábho nsôn, a râŋ amə̂t ábho. Ka ngyím ányi, amə̂t ane mbá á rə́bhe, á róghe fə́ne yê etóbhóm.