Read ejagham Matiyu, echî 21 Bible Online

Matiyu, echî 21 - ejagham bible

Matiyu, echî 21

¹Nji á jen á kpiri Jerusarem, á kpó si eték í Befagi ka Egui Orif, Jisos a yíghi ágbán ábháe a tûm ochî.

²A tíbhi ábho kən á jî se, “Choŋ ên ka eték áji mbá-ochî, tîk o yên ên mfoŋ-anyanyâ etat nnyi á sət á ki, mmon i mfoŋ a gyím ńnyə́ne ka mkpe biji. Kpât ên ḿbə́ne bhák.

³Nne á bhəp ên echî nji ó kpará ên, sə́re ên yê sê ńsé a kí wom a yim ejûm na ḿbə́ne. Tîk a tûm ḿbə́ne ó bhak ntə̂m yə́t.”

⁴Nchot nnyí a fâp fə́ne ka ekpak nji nkara-otîp Obhasi yót ka éməné a chorê se,

⁵“Sə́re abhon eték í Sayon se ntûfâm ábho a kə́ bha. A kə́ bha ka ekone ka njəm i mfoŋ-anyanyâ nnyi chiîŋ.”

⁶Ágbán mbá á jak fə́ne á jî yîm ka ekpak nji Jisos a sə́re ábho.

⁷Á kô mfoŋ nnyí na mmon á bhak mbâ eye. Á sóbhe ḿbə́ne na ḿfô ábho, Jisos a gyʉ̂t a kúmi.

⁸Ane etî-etî á yáe ḿfô ábho ka nsi, etʉ̂ á gbût amâŋ-obhî á tûp ka mbá sê Jisos a chíŋ.

⁹Ekam ane nji é jéna yê mbá-ochî na mbá-njəm á róghe ekónóm á kughá sê, “Deê ekûp na ejík é jóe é káre mmon i Debhit, Deê enare Ńtâ Obhasi é jóe na nne nnyo a kə́ bha ka mbiŋ eye. Deê ekûp na ejík é jóe é káre Obhasi ósô.”

¹⁰Nji Jisos a gyée Jerusarem, eték é nyíŋi. Ane á kí bhəp sê, “Énê nná kpá títí?”

¹¹Kən ane mba á jéne á gyê ka eték na yê á táme sê, “A ri Jisos nnyo nkara-otîp Obhasi. A dʉ eték í Nasaret, ka ebhat í Gariri.”

¹²Jisos a jî gyê ka ókʉ́rí achot Obhasi. A kpo to a gyé, a yên ane ogəm, mba gurúm á gurá, mba namám á namá. A gyê ábho ebhímím. A chóe iyîm mbi ane mba á jéna ogəm í ntí eyóŋóm, a tûp ka nsi, na ḿfə́m ane mba á gúra mbʉ́í.[5]

¹³A sə́re ane se, “Á séŋe se Obhasi se, ‘Njû amé a ri eji á góra ə̂m,’ kən ó kpighi ên ńnyə́ne a chə́bhe njû anyághá-ajʉ̂.”

¹⁴Nji a ri ka ókʉ́rí mbí, atáná-amə̂t na abhə́né á bhâ kpúghi yê, a yîm fə́ne ábho á sôn.

¹⁵Kən ane-echî akará-agore Obhasi na atóŋá-ebhín á kpó to á yén ekpatə́m ntûm okpógha-biji nnyi Jisos á yimá, na ekpak nji abhonche á kugha sê, “Ekûp na ejík é jóe é káre mmon i Debhit,” é yâm ábho é kpô.

¹⁶Á bhâ bhə̂p mân Jisos sê, “O kí yuk ejûm nji abhon mbá á chóra asík a?” Jisos a táme ábho se, “Nn̂, n kí yuk, kən ó ka nok ên obhiŋ tîk ka eji á séŋe ka nwet Obhasi sê, ‘Obhasi a yîm abhonche, kpe mba á rî ka obhô, se á káre yê ekûp na ejík a?’ ”

¹⁷A bhâ mághe mân ábho, a mághe eték a jî kâ ka eték í Betani.

¹⁸Ntem-ofú nji Jisos a kí chəbhé njəm nnyi Jerusarem, njaé a róghe yê eyámám.

¹⁹A yên étí fîk ka mkpe mbá, a yáre a jak a jí kep ájoé kpe ejûm é rî, yê a bhóŋ a dí. Kən a kpô sí ka ndə́p étí ányi, kpe ejûm ka ósô á ka yén təm ájé-ájê áma. A sə́re étí njí se, “Nkap ó ro kpo fon ta ngun a mân.” Nji a chorê nná, etʉri-étʉ́ri áji, étí njí é kpô é mân oman.

²⁰É kpô ane mba á tóbha yê biji kpe-eji, á kí bhəp sê, “Étí njí é yími nan é kpô mfá-mfá njí nná?”

²¹Kən Jisos a táme se, “Deê ń sə́ré ên bəre nne á ki ḿbə́ŋé, á ka fon efup se kpe ka oseŋe obhê Obhasi a ri na yê, nne a kí bhik eyimím noŋ n yimî nná. A kí bhik fə́ne esə́rə́m egúí njí se é jî gbô ka aya, é kí fap ka ekpak áji.

²²Ájoé ó ki ḿbə́ŋé na Obhasi, kpe bhaghé ejûm nji ó goré se yê a karé wâ, o kí fon ńjə́ne.”

²³Jisos a chə́bhe njəm ka ókʉ́rí achot Obhasi, a kí kpi ane achot. Kən ane-echî akará-agore Obhasi na ane-akúí eték, á bhâ bhə̂p yê sê, “O fonê bhaghé ikom kən o kí yim iyîm mbí? Énê a karé wâ ḿfə́ne?”

²⁴Jisos a táme ábho se, “N kí bhəp ên ebhə̂p jə́t. Ó tame ên ə̂m, tîk n sə́re ên ekpak ikom mfi m fonê kən n kí yim ntûm nnyí.

²⁵Sə́re ên ə̂m ikom mfi Jon a fonê kən a kí fuk ane ayép, í dʉ̂ mbâ énê? Í dʉ̂ mbâ Obhasi kən mbâ ntem-nne?” Ane mbá á róghe efírím ábho-ábhô sê, “Ájoé é tame sê Obhasi nâ a karê Jon ikom, a ri a bhə́p echî nji e rô kam na Jon.

²⁶Kən é səre fə́ne sê ikom í Jon í dʉ̂ mbâ atem-ane, e kí fup ejûm nji ane kpáŋ á yîm êt. Echî aŋ? Ane chénchén á kâm sê Jon a ri nkara-otîp Obhasi.”

²⁷Á táme mân Jisos sê, “É ka məŋé.” A táme ábho fə́ne se, “Mme eróŋ ḿ bó səre ên mbâ ikom ifámé í dʉ̂ kən n yimá ntûm nnyí.”

²⁸Jisos se, “Kére ên nchot nnyí. Nne yót a fôn abhon ábháe, a jî sə́re nnyo nne-nkúí se, ‘Mmon omé, choŋ oyim etûm ka ebhin égyé.’

²⁹Kən mmon nnyó se yê á bhó ji. É kpô kə́t mkpât ebhú, a yóŋe ḿbə́ŋé eye a jak.”

³⁰“Kən ńsé a mághe a jak mbâ nnyo mmonche, a jî sə́re yê ejûm njí jə́t. Mmon nnyó a kâm se yê tîk a jak, kən á ka ji.”

³¹“Ka ifə́né íkíkéré, nnyón ka abhon mbá ábháe nnyo a yimî ejûm nji ńsé a wóme?” Chénchén ane á táme sê, “Nnyo nne-nkúí.” Á kpó to á táme, Jisos a sə́re ábho se, “Deê ń sə́ré ên bəre ane-akáé-ejen na abhə́bhá-ntí-echî mba ó kera ên sê ane chichi, tîk á gyê otúi Obhasi kən ên ó sí ên ágo.

³²Echî aŋ? Jon nnyo á fugha ane ayép a bháe a tóŋá ên ekpak o kí fon ên ekpin ka nnyen-i-mbá, ó ka kam ên na yê. Kən ane-akáé-ejen na abhə́bhá-ntí-echî á kâm na yê. Kpe ebhú o yéne noŋ ane-akáé-ejen na abhə́bhá-ntí-echî á káme na Jon, o táŋe ên sê ó bhó yoŋe ên ḿbə́ŋé eyəné ó kâm fə́ne.”

³³Jisos a sə́re ábho se, “Yûk ên egan nji tat. Mfone njû yót a fôn ebhin-í-nkap ejê. A gbê ebhám a fáre ńjə́ne. A gbê etəm nji á kí kumí á bhabha nkap eye ka ebhin. A tʉ́ri eji aməm eyámám. Kən a kô ane a kâk se á yimá ebhin njí á kará yê eye nkiri. A bhâ mághe a jak ejen.

³⁴“Ebhú ebhin efʉʉ́m é kpó si, nne nnyó a tûm ágbán abhê se á jí kó eye nkiri ebhin á bhá káre yê.

³⁵Ane mba á kóe nná ebhin njí, á kpo yen ágbán mbá, á fî ábho á tə̂m yót. Á yúi nnyo tat. Á tûp nnyo tat na atáé.

³⁶Nne nnyó a kpô túm ágbán mba tat á tî á chíŋi mba ndaŋa-mbá. Kən ane mbá á kpô yim ekpak ejûm njí jə́t na ábho.

³⁷“A bhâ yíghi mân mmon owe a tûm, a kérá se ane etûm mbá tîk á káre mmon owe ejík.

³⁸Kən á kpó yen mmon nnyó, á sə́re atem sê, ‘Ńgyê ndígha-ekʉ̂. Bhák é yúí yê, tîk e fôn iyîm í ńsé.’

³⁹Á bhâ fî mmon nnyó á yúi, á bhûm ka etə́m.”

⁴⁰Jisos a bhâ bhə̂p mân ane se, “Ó kere ên sê ebhú mfone ebhin nnyó á bha, a kí yim nan na ane etûm mbá?”

⁴¹Á táme sê, “Mfone á bha, a kí yui ane abhí mbá, a tábhe ebhin ejê a káre mba ane etat mba tîk á yimá ebhin njí á kará yê eye nkiri ka ebhú efʉ.”

⁴²A bhâ kpô bhə́p mân ane se, “Ó ka nok obhiŋ ên nji á séŋe ka nwet Obhasi sê, ‘Isôk mfi agbeghá-ojû á bhúmi se í ká nop njû egbeém, ḿfə́ne í bhâ chə́bhe mfoné-mfoné isôk mfi í fíi njû.’ Ńtâ Obhasi nâ a yimî áno se é jóe ka ekpak njí. A ri okpógha-biji nchot.”

⁴³A sə́re mân ábho se, “Deê ń sə́ré ên bəre á kí tabhé otúi Obhasi ka obhô obhə́né, á káre mbâ ane mba á kí toŋe ka ekpin ábho sê ábho á mə́ŋe nchot Obhasi. [

⁴⁴Kpe énê nnyo á kobhé ka isôk mfí, a gbô a kí joghe a mân. Nne fə́ne nnyo á kam se isôk mfí í gbo yê ka biji, í kí gok yê ogok.”]

⁴⁵Ane-echî akará-agore Obhasi na ane echəme Farasi á kpó to á yúk ngan i Jisos nnyí, á mə́ŋe sê á chorá na ábho.

⁴⁶Á nôk ka ekpak nji á kí fi yê áfo, kən á kí fup njok ane mba á rî nná ka eji njí. Echî aŋ? Kpe énê a kâm se Jisos a ri nkara-otîp Obhasi.