Read ejagham Matiyu, echî 27 Bible Online

Matiyu, echî 27 - ejagham bible

Matiyu, echî 27

¹Na ofú-ofú, chénchén ane-echî akará-agore Obhasi na ane-akúí eték, á kúbhi sê á yúí Jisos.

²Á bhôp yê na mkpokobhé, á kô á jak mbâ Piratus. Piratus a ri ntûfâm eték.

³Kən nji Juda nnyo a gurî Jisos a kpô yén se á kam sê á yúí Jisos, nsôn a fî yê ka obhí obhê. A kô abhon iyîm mbá esam njəm ófó nâ ntí mmi á káre yê ka echî Jisos, a jí chəbhé njəm a karé mbâ ntûfâm akará-agore Obhasi na ane-akúí eték. A sə́re ábho se,

⁴“Ń yim obhí nji n kamê n gúri nne nnyo kpe ejûm á ka yim ta á kam sê á yúí yê.” Kən á táme yê sê, “Ágo nâ achot amâ, nji é fóghe êt cháŋ.”

⁵Juda a kô ntí mmí a jî tûp áfo ka nsi ka etím ókʉ́rí achot Obhasi a mághe a jak a jî súni.

⁶Ane-echî akará-agore Obhasi á bhâ bhûp ntí mmí sê, “Ḿfa a ri ntí agyʉ́ŋ, ebhín ejə́ré é chóre sê ntí agyʉ́ŋ á kâ kâk ka eji ntí achot Obhasi.”

⁷Á kúbhi á kâm, á kô ntí mmí á nâm eji nsi ka eji nne nnyo a kí tʉrí abhí sê á kə́na ajéné mba á kpo.

⁸Nâ ńjə́ne ta é si égyé, eji nsi áji á kət á bhiŋá sê nsi agyʉ́ŋ.

⁹É fap fə́ne ka ekpak nji nkara-otîp Obhasi nnyo á kamá se Jeremaya a chorê se, “Á kô abhon iyîm esam njəm ófó nâ ntí mmi ane Isrel á káme ka echî ejê,

¹⁰á nâm eji nsi ka eji ntʉra-abhí ka ekpak nji Ńtâ Obhasi a sə́re ə̂m.”

¹¹Nji á kóe Jisos á bhak ka ochî ntûfâm nnyo a fiî ikom eték, ntûfâm nnyó a bhə̂p yê se, “We nâ o ri ntûfâm ane Jus a?” Jisos se, “Nn̂, é rî ka ekpak o chorê.”

¹²Kən kpe ejûm Jisos á ka támé ka achot mma ane-echî akará-agore Obhasi na ane-akúí eték á nyéra yê.

¹³Piratus a kpô chot na yê se, “O yúghá achot fép mma á chóra áno sê ó yim a?”

¹⁴Kən Jisos á ka támé kpe nchot. É mân kpá ntûfâm nnyó biji kpe-eji.

¹⁵Eyâ kpe njə́n ka ebhú Erom í Ntə̂m Osʉ́ŋ, ntûfâm eték a kí yighí nne yót ka ókúmí nnyo ane eték á wóme.

¹⁶Nne yót a ri ka ókúmí ebhú áji, a kamá se Barabas, nnyo kpe énê a mə́ŋe se á yimá obhí.

¹⁷Ebhú ane á chə́me, Piratus a bhə̂p ábho se, “Barabas kən Jisos nâ o wóme ên se ń yíghi ka ókúmí? Jisos nnyó á kamá se Krayis, nne nnyo Obhasi a túmi se a yim ngun á sém.”

¹⁸Ntûfâm ngá a mə́ŋe se Jisos kpe ejûm á ka yim. Á fíi yê ka é kí yam ábho nji ane etî-etî á tóbha yê.

¹⁹Nji ntûfâm i Piratus á taŋá nchot nnyí, nkáé owe a tûm ane na otîp se, “Sə́re ên ndûm omé a yighí obhô ka nchot ányi, ka nne ányo á ka mom. Nan? Ń yen oseŋe kpe-eji ḿ kpe na nne ányo ka ndem na atʉ́.”

²⁰Ane-echî akará-agore Obhasi na ane-akúí eték á chóe ekam ane nji é rî nná áfo á bhə́p Piratus a yighí Barabas ka ókúmí a karé ikom á yúí Jisos.

²¹Kən Piratus a bhə̂p ábho se, “Ka ane mbá ábháe, ó woma ên sê ń yíghi nnyón?” Á táme sê, “Barabas.”

²²A kpô bhə́p ábho se, “O kí wom ên mân sê ń yîm nan na Jisos nnyo á kamá se Krayis, nne nnyo Obhasi a túmi se a yim ngun á sém?” Á táme chénchén sê, “Kûm yê ka ego.”

²³Kən Piratus a kpô bhə́p ábho se, “Nne nnyó a yimî bhaghé obhí?” Kən ekam ane njí á róghe ekughúm na ikom-ikom sê, “Kûm yê ka ego.”

²⁴Piratus a kpô yén se yê á noghá chichi, ebhú tat onyʉk tîk ó gbô. A kô ayép, a sû abhô ka ochî ane chénchén, a sə́re ábho se, “Mme obhô obhámé cháŋ ka ekʉ̂ nne nnyó, a ri ên nâ o məŋê ên.”

²⁵Kən ekam ane njí ndə́m á táme sê, “Á yui yê, deê agyʉ́ŋ amê á jóe êt na abhon abhə́ré ka echî.”

²⁶Piratus a bhâ yíghi Barabas ka ókúmí. A káre ikom se á tə̂m Jisos á kó á jí kúm ka ego.

²⁷Ane-enok í Piratus á kô mân Jisos á gyê óchâm etat ka ókʉ́rí mbí, á fáre yê á kâk. Nsam ábho a chíŋi kpe érôn.

²⁸Á jûk ḿfô eye ka biji, á kâk yê nnyi tat noŋ nnyi ntûfâm.

²⁹Á tʉ́ri itam ajoŋe-ájóŋe á kə́bhe yê, á káre yê esáŋ a fî ka obhô-orûm. Á tə̂m mân arúŋ ka ochî obhê, á róghe yê ntuŋ ekaghám sê, “E kí kup wâ, Ntûfâm ane Jus!”

³⁰Á chôk yê na ason ka biji, á tábhe ítí mfi á káre yê nná á bhúra yê ka echî.

³¹Á kpó to á mân yê ntuŋ ekaghám, á yíghi énoê ḿfô nnyi á kághe nná yê á chə́bhe njəm á kâk yê eye. Á kô yê mân á kí ji á jí kúm ka ego.

³²Nji á kí jen á jak, á kpúghi nne Sirin yót ka mbá nnyo á kamá se Simun. Á fî yê ka ikom, á tábhe ego njí mbâ Jisos, á káre yê sê a kə́n.

³³Á jên ta á sî eji etat nji á bhíŋa sê Gogota, nâ se Ékə́p-Echî.

³⁴Á káre Jisos aməm mma á nyóbhe ejûm etat é yua chík sê a gwó. A kô a yúŋi, kən á ka kam egwóóm.

³⁵Á kûm yê ka ego. Á kô ḿfô eye á tûp ebháŋé sê á mə́ŋe ekpak nji á kí kirí ńnyə́ne.

³⁶Nji á kíri ḿfô eye nnyí, á kúmi mân áfo á bhabha yê.

³⁷Njəm-ósô ego nji á kúmi yê, á sêŋ ejûm nji a yimî kən á kûm yê. Á séŋe sê, “Ḿfa a ri Jisos, ntûfâm ane Jus.”

³⁸Á kûm fə́ne anyághá-ajʉ̂ ábháe ka mbi ábho bigo. Yót á tə̂p mkpe obhô-orûm í Jisos, nnyo tat mkpe obhô-okáé.

³⁹Achíŋá-mbá mba á síi áfo, á mêk ka echî, á kí tu Jisos sê,

⁴⁰“O sə́re se we o kí bhibhi ókʉ́rí achot Obhasi, o gbê mbi fê ka mfín ésá, sém máná ájoé we a ri Mmon Obhasi ka etʉri. Bhət ka ego áji, sî nsi.”

⁴¹Ane-echî akará-agore Obhasi na atóŋá-ebhín na ane-akúí eték á gyê yê fə́ne ntuŋ ekaghám sê,

⁴²“A yîm ane etat á sem, kən biji ibhê á ká bhik oyim. To yê a ri ntûfâm ane Isrel. Deê a bhət a sí nsi nnyí, tîk e kâm mân na yê.

⁴³Yê a kíi ḿbə́ŋé na Obhasi, a sə́rá se yê a ri Mmon Obhasi, é yén kpá ájoé Obhasi tîk a yíghi yê ka ego njí.”

⁴⁴Kpe anyághá-ajʉ̂ mba á kúmi nná fə́ne, á gyê yê etúúm eróŋ.

⁴⁵Nji ńkánínká a síi ófó na ébháe nnyi nchên, njúí a tân. Ejírim é bhúi eték ndə́m tata a sî ésá nnyi egu.

⁴⁶Ńkánínká ésá a kpo to a sí, Jisos a kûk káŋ káŋ káŋ se, “Erayi! Erayi! lámá sabatani?” Nâ é fap se, “Obhasi omé! Obhasi omé! O jiŋî ə̂m jen?”

⁴⁷Etʉ̂ ane mba á gyím áfo á kpó to á yúk, á kí səre sê, “Yûk nne nnyó a kí bhiŋ Erayija.”

⁴⁸Ka ngyím ányi, nne yót a bhéne a jî kô égúsá a bhî ka ekâ aməm, a bhôp ka echî étí, a tóne ágo se Jisos a gwó.

⁴⁹Kən atem sê, “Chik kpá é yén ájoé Erayija a kə́ bha a bhá yim yê a sém.”

⁵⁰Jisos a kpô kúk, a sére.

⁵¹Nji a sére, íkpéghé mfi á bhúi ka nnyo-mbá ókʉ́rí achot Obhasi í yâ mbat ébháe é róghé ka ósô ta o sî esə́n. Nsi a nyíŋi, akpatə́m atáé á jogha.

⁵²Ayəm á rə́bhe, ane Obhasi etî-etî mba á kpóe ta éməné, á chə́bhe njəm á nyə́me.

⁵³Ebhú Jisos a kpô chəbhé njəm ka ekpin, ane Obhasi mbá á chə̂m á jak na yê ka eték achot Obhasi,[7] ane á yên ábho.

⁵⁴Ntûfâm ane-enok na ane abhê mba á rî áfo á bhabha Jisos, á kpó yen nsi a nyíŋi, a yên fə́ne iyîm mbi í fábhe, efup é gyê ábho á kâm mân sê, “Ka etʉri, ńgyê Mmon Obhasi.”

⁵⁵Ane-akáé á rî etî-etî áfo á gyím nyáŋé-nyáŋé á yena achot mma á fábhe. Ane-akáé mba nâ mba á bháe na Jisos nnyi Gariri, á kaghá yê obhô.

⁵⁶Ka ane-akáé mbá, Meri nnyo Madarin a ri, Meri nnyo nnyen i Jems na Jusep a ri, na nnyen abhon í Sebedi.

⁵⁷Nji egu é síi, nne nyúp yót, a dʉ eték Aramatiya, a kamá se Jusep, a bhák. Nne nnyó ka biji ibhê a ri ntóbhá Jisos.

⁵⁸A yə̂p a jak mbâ Piratus, a sə́re yê se a karé yê ékpoê biji Jisos yê a jí kən. Piratus fə́ne a káre ikom se á yíghi Jisos ka ego á káre mbâ Jusep.

⁵⁹Jusep a kô Jisos a bhôp ka ébháré-éfô mfê-mfê,

⁶⁰a jî núŋi yê ka oyəm mbi fê mbi yê a sə́me ka eránám. A chóe mân ekpatə́m í ntáé a bhúi ka nnyo oyəm, a jak.

⁶¹Meri Madarin na Meri nnyo tat á kûn áfo, á kébhe oyəm ábhi.

⁶²Ntem-ofú, egu ofú oyoá-biji é chiŋ, ane-echî akará-agore Obhasi na ane Jus mbâ echəme Farasi á jak mbâ Piratus.

⁶³Á sə́re yê sê, “Ntûfâm, é tit sê ebhú nne-áfúbhí ányo a nyə́ne ka ekpin, a sə́re ane se yê á kpo a kâ mfín ésá, yê a kí chəbhé njəm ka ekpin.

⁶⁴E kí wom kə́n ó kâk ane á jí bhábhé oyəm obhê ta mfín ányi ésá a sí. Áno asík, tîk atóbhá abhê á bhâ chîŋ á jʉ̂ yê á yíghi, á sə́ré ane sê a chə́bhe njəm ka ekpin. Áfúbhí mmá tîk á bhîp mân á chíŋi mma ndaŋa-mbá.”

⁶⁵Piratus a kâm na ábho a sə́re ábho se, “Kô ên ane, choŋ obhábhé ên oyəm obhê ka ekpak o kére ên.”

⁶⁶Ane mbá á jak mân á jî kô ejûm á kûm ka ntáé nnyi a ri nná ka nnyo-mbá oyəm. Á mághe mân ane áfo sê á bhábhé ḿbə́ne.