Read ejagham Matiyu, echî 28 Bible Online

Matiyu, echî 28 - ejagham bible

Matiyu, echî 28

¹Nji ofú oyoá-biji ane Jus ó chiŋi, ndaŋa-mbá ofú ka ogəm na ofú-ofú, Meri Madarin na Meri nnyo ngá á jak ka oyəm í Jisos, á jí kép.

²Nji á síi ágo, nsi a nyíŋi ekpatə́m, ka énjel Ńtâ Obhasi a bhə̂t a bhák nnyi ósô. A chóe ntáé nnyí a yíghi ka nnyo-mbá oyəm, a kúmi ka ńnyə́ne.

³Ó yen énjel nnyó se nyaŋanya, ḿfô eye a bhárá kpóŋ.

⁴Ane mba á kíi nná á bhábhé oyəm, efup é gyê ábho á kə̂t, ó yen se á kpóe okpó.

⁵Énjel nnyó a sə́re ane-akáé mbá se, “Ka fûp ên, ḿ məŋe bəre ó woma ên Jisos nnyo á kúmi ka ego.

⁶Yê kpó cháŋ mfá. Obhasi a yîm yê a nyə́me ka ekʉ̂ ka ekpak nji yê a sə́re ên. Bhá yén ên eji nji a nuŋ.

⁷Choŋ ên ábhiî-ábhíi, choŋ osə́ré ên atóbhá abhê sê yê a nyə́me ka ekʉ̂, a râŋ ên mbá nnyi Gariri. Tîk o kpúghi ên yê ágo. Kak ên nji n sə́re ên ka echî.”

⁸Ane-akáé mbá á mághe mân oyəm mbí ábhiî-ábhíi na efup, kən na ekpatə́m ogyebhá-ḿbə́ŋé. Á bhéne á jí sə́ré atóbhá abhê ekpak é fábhe.

⁹Á kpó to á yén, Jisos a bhâ kpúghi ábho ka mbá, a sə́re ábho se, “Deê Obhasi a jóe na ên.” Ane-akáé mbá á gbô áfo ka nsi, á fî akát amê, á káre yê ejík.

¹⁰Jisos a sə́re ábho se, “Ka fûp ên, choŋ osə́ré ên atem-abhon-í-nnyen abhə́ré sê á jî nnyi Gariri, tîk á kpúghi ə̂m ágo.”

¹¹Nji ane-akáé mbá á jíi, etʉ̂ ane mba á kíi nná sê á bhábhé oyəm í Jisos á mághe á jak ka eték, á jî sə́re ane-echî akará-agore Obhasi chénchén ejûm nji ábho á yéne.

¹²Nji á sə́re ábho, ane-echî mbá á chə́me achî na ane-akúí eték, á fôn ekubhi. Á káre ane mba á bhábhe nná oyəm mbí njok i ntí.

¹³Á sə́re ábho sê, “Sə́re ên ane sê ane mba á tóbha Jisos nâ á bháe na atʉ́, ebhú ên o kí yae, á bhâ jʉ̂ biji Jisos.

¹⁴Ntûfâm eték á yuk, kən a kére ekpak etat na ên, tîk e gyími ên ka njəm, kpe ejûm tîk á bhó yim ên.”

¹⁵Ane mbá á kâm fə́ne á bhâ yîm ka ekpak nji ábho á kóe ntí sê á yîm. Ta é si égyé, ane Jus á nyə́ne á səra á kamá sê atóbhá Jisos á jʉ́i biji ibhê ojʉ ka oyəm.

¹⁶Ágbán í Jisos ófó na yót á jak ka egúí etat ka Gariri, eji nji Jisos a sə́re se á kpúghí yê.

¹⁷Nji á yéne yê, á gbô yê ka akát, á káre yê ejík. Kən etʉ̂ ábho á nyə́ne á ka kam.

¹⁸Jisos a tên biji á kpúghi ábho a sə́re ábho se, “Á kare ə̂m chénchén ikom ka ósô na ka nsi.

¹⁹Choŋ ên mân ka nték i ngun chénchén, yim ên ane á tóp ə̂m. Fûk ên ábho ayép ka mbiŋ i Ńsé na Mmon na nnyi Obhasi Ebhare Ntʉgantʉ.

²⁰Kpî ên ábho á yîm chénchén nji n sə́re ên. Məŋê ên, ên áfoné, sê n kí joé na ên chénchén ebhú ta ngun a mân.”